2023: Pahr en Pwunod​—⁠Dahme Paipel Mahsanih?

Erein pahr 2023, soahng tohto wiawi nin sampah pwon me kin kasalehda ni sansal me kitail kin momour ni ahnsou me Paipel mahsanih “imwin rahn akan.” (2 Timoty 3:1) Tehk duwen soahng kan me wiawi limwahtail eh duwehte dahme Paipel kohpada duwen atail ahnsou.

Paipel oh soahng kan me wiawi nin sampah pwon

“Mahwen oh rongen mahwen.”—Madiu 24:6.

• “Pepei kin lalaudla nan wasa tohto nin sampah.”a

“Ehuehu wasa rerrer en sahpw.”—Mark 13:8.

• “Sang nin tepin 2023 leledo met, rerrer en sahpw me kehlail sang magnitude 7 wiawiher pak 13 nin sampah pwon, ih met me keieu tohto nan sounpar ehu sangete ahnsou me tepida kileldi.”b

“Soahng kamasepwehk kan.”—Luk 21:11.

• “Ahnsoun karakar nin sampah pwon imwisekla; ahnsoun pwopwoail nin sampah pwon samwadohr.”​—António Guterres, UN secretary-general.c

“Lehk lapalap.”—Madiu 24:7.

• “2023: Pil wia pahr en kapwunod laud ong irail kan me kin apwalki kamwenge arail peneinei kan.”d

“Ahnsou apwal oh keper.”—2 Timoty 3:1.

• “Emen sang rehn aramas welimen nan sampah pwon kin ahneki kahpwal en roson en madamadau.”e

Dahme kitail kak kasik nan pahr 2024?

Sohte me ese dahme pahn wiawi nan pahr 2024. Ahpw dahme wiawi nin sampah kin kasalehda me Wehin Koht de koperment en nanleng pahn kereniongehr wiliandi koperment en aramas akan oh katokehdi soahng koaros me kin kahrehda aramas en lokolok oh pwunod.—Daniel 2:44; Kaudiahl 21:4.

Erein atail kin awih met, ma kitail pwunodada, kitail kak likih Koht oh peki sawas. Paipel kin mahsanih:

“Ni ei kin masepwehkada, I kin patohwan likih komwi.”—Melkahka 56:3.

Ia duwen atail kak kasalehda me kitail likih Koht? Se kin lukeiuk en kalaudehla omw esehla inou kan nan Paipel duwen ahnsou kohkohdo me sohla lokolok. Song at koasoandi en koasoiapene duwen Paipel pwe ken kilang ia duwen kowe oh omw peneinei ar kak paiekihda inou kan nan Paipel.