Ahng Karakar en Summer 2023 nan Sampah Pwon—Dahme Paipel Mahsanih?

Aramas akan nan sampah pwon apwalkihda karakar laud me saikinte pak ehu wiawi sangete mahso oh kahpwal teikan me kohsang karakar en lahng. Tehk ripoht pwukat:

•  “Sounpwong en June wet me keieun karakar me kileldier sangete ahnsou me aramas tepida sohng karakar en sampah, nan erein sounpar 174.”—National Oceanic and Atmospheric Administration, U.S. Department of Commerce, July 13, 2023.

•  “Italy, Spain, France, Germany oh Poland sohsohpai ahng karakar kehlail ehu, oh uwen karakar en dekehn Sicily oh Sardinia kak lella 118°F [48°C] – met kakete sosohng en karakar me keieu laud me kileldier nan Europe.”—European Space Agency, July 13, 2023.

•  “Ni sampah wet eh wie karakarala, kitail kasik me keteu mosul pahn kalapw wiawi, oh met pahn katohtohwehla lapake laud kan.”—Stefan Uhlenbrook, director of hydrology, water and cryosphere at the World Meteorological Organization, July 17, 2023.

Ke kin pwunodki tohtohlahn ripoht kan me pid suwedlahn mesenleng? Tehk dahme Paipel mahsaniheki met.

Suwedlahn mesenleng kapwaiada kokohp en Paipel?

Ei. Ahng karakar nan sampah pwon oh soahng teikan me kohsang suwedlahn mesenleng kin pahrekiong dahme Paipel kohpada duwen atail ahnsou. Karasepe, Sises ketin kohpada me kitail pahn kilang “soahng kamasepwehk kan” de “kilel kapwuriamwei kei.” (Luk 21:11; Pwuhk Sarawi ni Mahsen en Pohnpei) Pwehki lalaudlahn karakar nan sampah pwon, aramas tohto kin masak me aramas akan pahn kauwehla sampah.

Aramas akan sohla pahn kak kousoan nin sampah?

Soh. Koht ketin kapikada sampah pwehn wia atail wasahn kousoan kohkohlahte; e sohte pahn ketin mweidohng aramas akan en kauwehla. (Melkahka 115:16; Eklesiasdes 1:4) Ni mehlel, e ketin inoukihda me e pahn ketin “kauwehla irail kan me kin kauwehla sampah.”—Kaudiahl 11:18.

Paipel kasalehda me Koht kak oh pahn ketin pere sampah sang ohlahn sahpw, sehd oh nan wehwe.

•  “[Koht] ketin kamwelehdi wasa, oh kameleileidi iloak kan.” (Melkahka 107:29) Koht sapwellimanki manaman en kaunda mesenleng. E kak ketin kamwahwihala kahpwal akan me kin kahrehda suwedlahn mesenleng me aramas akan kin lokolongki.

•  “Komw ketin kasalehda omwi kupwure sampah ni omwi kin ketin kalamwurehki keteu; komw ketin audehkihla wahnsahpw oh pwehl mwahu.” (Melkahka 65:9) Sampah pahn wiahla paradais pwehki sapwellimen Koht kapai.

Ma ke men kalaudehla omw ese duwen inoun Paipel me pid onohnsapahldahn irair en sampah, wadek oaralap “Who Will Save the Earth?”