Lapake Laud kan—Dahme Paipel Mahsanih?

Me tohto kin apwalkihda lapake laud kan nan sampah pwon. Tehk ripoht pwukat:

•  “Erein rahn riau de siluh nekier ko, poasen kaun en China kasalehda me nan erein sounpar 140, ih met uwen keteu me keieu laud me re alehdier. Sang Rahn Kaunop lel Niesil, uwen keteu me re alehdi mi ni ins 29.3 (744.8 mm).”—AP News, August 2, 2023.

•  “Melimel Khanun kahrehda keteu mosul oh kisinieng kehlail ni palieir en Sapan ni keriaun rahn Niepengo, e kemehla aramas riemen. . . . Melimelo kakete kahrehda keteu laud me pahn kohda lel ni piht 2 (0.6 m) ni nahna kan nanwerengen Taiwan.”—Deutsche Welle, August 3, 2023.

•  “Nan erein sounpar 50, keteu mosul me keieu laud me wiawiher ni pelien sehd en Atlantic Canada kahrehda lapake laud wiawi ni wihkendo [nan Nova Scotia].”—BBC News, July 24, 2023.

Dahme Paipel mahsaniheki duwen mwekid pwukat?

Kilel en “imwin rahn akan”

Paipel kasalehda me kitail momour ni ahnsou me adaneki “imwin rahn akan.” (2 Timoty 3:1) Sises ketin kohpada me nan atail ahnsou, kitail pahn kilang “soahng kamasepwehk kan,” de mwekid kamasepwehk kan. (Luk 21:11) Pwehki wekwekilahn mesenleng kahpwal laud en mesenleng kin wiawi ni soh kasikpe, tohtohla oh kehlailla.

Mie kahrepen koapworopwor

Paipel mahsanihong kitail me soahng kamasepwehk tohto me kin wiawi nin sampah rahnwet kak kihong kitail koapworopwor. Dahme kahrehda? Sises mahsanih: “Ni amwail pahn kilang mepwukat ar pahn wiawi, kumwail en ese me Wehin Koht kerendohr.”—Luk 21:31; Madiu 24:3.

Mwekid pwukat me kitail kin kilang kasalehda me Wehin Koht pahn kereniongehr kaunda douluhl irair en sampah, iangahki mwekimwekid en pihl kan.—Sohp 36:27, 28; Melkahka 107:29.

Pwehn kalaudehla omw ese ia duwen Wehin Koht eh pahn kamwahwihala kahpwal akan nin sampah, menlau kilang oaralap “Who Will Save the Earth?”