sinceLF/E+ via Getty Images
POUSEHLAHTE MWASAMWASAHN!
Ihs me Pahn Doarehla Aramas akan me Kaidehn Sounpei?—Dahme Paipel Mahsanih?
United Nations ripohtki:
Sangete October 7 lel October 23, 2023, mahwen me wiawi nanpwungen Gaza oh Israel kahrehda aramas daulih 6,400 mehla oh meh 15,200 ohla, pali laud en irail kaidehn sounpei kei. Patehng met, aramas lopw samwa kohkohsang ni imwarail kan.
Leledo September 24, 2023, mahwen me wiawi nanpwungen Russia oh Ukraine kahrehda aramas 9,701 me kaidehn sounpei mehla oh meh 17,748 ohla nan Ukraine.
Soangen koapworopwor dah me Paipel kin kihong irail kan me wie lokolok pwehki mahwen?
Mie kahrepen koapworopwor
Paipel kohpada me Koht pahn “ketin katokehdi mahwen wasa koaros nin sampah.” (Melkahka 46:9) E pahn ketin doadoahngki koperment en nanleng de wehi ehu, pwehn wiliandi koperment en aramas koaros. (Daniel 2:44) Wehin Koht pahn wadohng aramas akan nsenamwahu.
Tehk dahme Sises Krais, Nanmwarkien Wehin Koht pahn ketin wia:
“E kin ketin kapitala me semwehmwe kan me kin likweriong, oh pil irail kan me paisuwedlahr oh me lekdekla kan. E kin ketin kupwurkalahngan ong me luwet oh semwehmwe kan; e kin doarehla mouren me paisuwed kan. E kin ketin kapitirailla sang nan arail kehnaudek oh angkehlail kan.”—Melkahka 72:12-14.
Koht pahn ketin doadoahngki sapwellime Wehio oh ketikihsang douluhl nsensuwed oh lokolok me kin kohsang ni mahwen oh tiahk lemei.
“E pahn ketin limwihasang pilen masarail kan koaros, oh mehla solahr pahn wiawi, solahr mwahiei, solahr sengiseng oh solahr medek. Mehkan en mahso sohralahr.”—Kaudiahl 21:4.
Kereniongehr Wehin Koht pahn wekidala douluhl irair en sampah. Rahnwet kitail kin kilang “mahwen oh rongen mahwen” kan me Paipel kohpada. (Madiu 24:6) Soahng pwukat oh mwekid teikan kin kasalehda me kitail momour ni “imwin rahn akan” en kaundahn aramas.—2 Timoty 3:1.