Mehn Kasukuhl Sang Ahn Seikop Kokohp ko—Pali 2

1. Dahme kitail pahn koasoiapene nan iren onop wet?

NEIN Seikop pwutak ko kohpene oh rong mwahu ni arail pahpao me mahlahr eh kapaia emenemen irail. Nan iren onop en mwoweo, kitail sukuhlki me Seikop ndaiong Rupen, Simion, Lipai, oh Suda soahng kan me ele irail sohte kasik. Eri irail kakete medemedewe dahme Seikop pahn ndaiong nah pwutak welimen teiko. Kitail pahn kilang mehn kasukuhl dah kan me kitail kak sukuhlkihsang dahme e ndaiong Sepulon, Isakar, Dan, Kad, Aser, Napdali, Sosep, oh Pensamin.a

SEPULON

2. Dahme Seikop ndaiong Sepulon, oh ia duwen met eh pweida? (Senesis 49:13) (Pil kilang kakon.)

² Wadek Senesis 49:13. Seikop koasoia me keinek en Sepulon kan pahn kousoan limwahn oaroahr, paliepeng en Sapwen Inowo. Daulih sounpar 200 mwuhr, keinek en Sepulon alehdi sapwarailo me mi nanpwungen Sehd en Kalili oh Mediderenien. Moses kohpada: “Sepulon paiamwahula nan eh doadoahk en netinetseli nan madau kan.” (Deud. 33:18) Mwein met wehwehki me keinek en Sepulon kak mengei en seiloakla ni oaroahr en sehd riauo oh mengei en pwainda oh netikihla soahng kan nan ekei wasa. Sohte lipilipil dahme wiawi, keinek en Sepulon kan ahneki kahrepe mwahu en nsenamwahu.

3. Dahme kak sewese kitail en itarki dahme kitail ahneki?

³ Dahme kitail kak sukuhlki? Sohte lipilipil wasa kitail mi ie de irair dah kan me kitail ahneki, kitail ahneki kahrepe mwahu en peren. Pwehn ahnekihte peren, kitail anahne itarki dahme kitail ahneki. (Mel. 16:6; 24:5) Ekei pak e kak mengei en medemedewe dahme kitail sohte ahneki a kaidehn soahng mwahu kan me kitail kin nsenamwahuki. Eri song en tamataman soahng mwahu kan me ke ahneki oh perenki soahng pwukat.—Kal. 6:4.

ISAKAR

4. Dahme Seikop ndaiong Isakar oh ia duwen met eh pweida? (Senesis 49:​14, 15) (Pil kilang kakon.)

⁴ Wadek Senesis 49:​14, 15. Seikop kapinga Isakar pwehki eh kin doadoahk laud. E koasoia me Isakar kehlail duwehte mahn me kin wahda wisik toutou kan. Seikop pil koasoia me Isakar pahn sapweniki sahpw me kaselel. Oh ahn Seikop kokohp ko pweida pwehki keinek en Isakar alehdi sahpw pwelmwahu me karanih Pillap Sordan. (Sos. 19:22) Irail kin doadoahk laud pwehn apwalih sapwarailo, ahpw irail pil kin doadoahk laud pwe meteikan en paiekihda. (1 Nan. 4:​7, 17) Karasepe, ni ahnsou me Sounkopwung Parak oh soukohp liho Debora peki ren mahweniong Sisera, keinek en Isakar iei ehu keinek me men iang sawas. Oh pil ni ahnsou teikan re kin men iang mahwen.—Sounkopwung 5:15.

5. Dahme kahrehda kitail anahne doadoahk laud?

⁵ Dahme kitail kak sukuhlki? Siohwa kin ketin kesempwalki atail doadoahk laud nan sapwellime doadoahk duwehte eh kin ketin kesempwalki doadoahk laud en keinek en Isakar. (Ekl. 2:24) Karasepe, medewehla brother kan me kin doadoahk laud pwehn apwalih mwomwohdiso. (1 Tim. 3:1) Brother pwukat sohte anahne iang pei nan mahwen kan, ahpw re kin doadoahk laud pwehn pere Kristian kan sang soahng kan me kak kauwehla arail nanpwungmwahu rehn Siohwa. (1 Kor. 5:​1, 5; Sud 17-23) Irail pil kin doadoahk laud pwehn kaunopada oh wia padahk kangoang kan me pahn kakehlaka mwomwohdiso.—1 Tim. 5:17.

DAN

6. Pwukoa dahieu me keinek en Dan alehdi? (Senesis 49:​17, 18) (Pil kilang kakon.)

⁶ Wadek Senesis 49:​17, 18. Seikop koasoia me Dan duwehte sineik me kin peiong mahn laud kan, duwehte oahs me aramas kin doadoahngki nan mahwen. Keinek en Dan kin eimah oh onopada en mahweniong imwintihti en wehin Israel. Keinek en Dan kin alu mwurin keinek kan koaros ni arail seiloak kolahng Sapwen Inowo. Oh e kin pere wehio ni eh “wia silepen pwihnlap kan.” (Nemp. 10:25) Mendahki keinek teikan sohte kak kilang soahng koaros me keinek en Dan kin wia mwurirail, arail pwukoau uhdahn kesempwal.

7. Ia pahn atail pepehm ong pwukoa kan me kitail alehdi nan sapwellimen Siohwa doadoahk?

⁷ Dahme kitail kak sukuhlki? Mie pak ke apwalih pwukoa ehu me meteikan mwomwen sohte kin pohnese? Mwein ke kin iang sewese kamwakele de apwalih Wasahn Kaudok, iang sawas ni kapokon ehu, de apwalih pwukoa teikan. Ma ei, se kapinga iuk! Ahnsou koaros tamataman me Siohwa ketin mwahngih oh kesempwalki soahng koaros me ke kin wiahiong ih. E kin keieu ketin kupwurki ni omw papah ih, kaidehn pwehki ke men meteikan en kapinga iuk, ahpw pwehki ke men kasalehda uwen laud en omw poakohng ih.—Mad. 6:​1-4.

KAD

8. Dahme kahrehda e mengei ong imwintihti en mahweniong keinek en Kad? (Senesis 49:19) (Pil kilang kakon.)

⁸ Wadek Senesis 49:19. Seikop kohpada me pwihn en loallap suwed ehu pahn peiong Kad. Sounpar riepwiki mwuhr, keinek en Kad sohsohkihdi sahpw ehu me mi palimesehn Pillap Sordan, limwahn sapwen imwintihti kan. Wasao, imwintihti kan sang wehi ko kak mengei en mahweniong irail. Ahpw, keinek en Kad kan men mihla wasao pwehki mie mwaht tohto me neirail mahn kan kak kang. (Nemp. 32:​1, 5) E sansal me keinek en Kad kan wia aramas eimah kei. Laudsang met, irail likih me Siohwa pahn ketin sewese kalowehdi arail imwintihti kan oh pere sahpwo me e ketikihong irail. Erein sounpar tohto, irail pil kin kadarala neirail sounpei kan pwehn sewese keinek teikan en kalowehdi sahpw me mi palio Pillap Sordan. (Nemp. 32:​16-19) Irail likih me Siohwa pahn ketin pere neirail seri kan oh arail pwoud erein ohl ako sohte mie. Siohwa ketin kapaia irail pwehki ar eimah oh sewese meteikan pil ni ahnsou me met sohte mengei.—Sos. 22:​1-4.

9. Ma kitail kin likih Siohwa, pilipil dah kan me kitail pahn wiahda?

⁹ Dahme kitail kak sukuhlki? Pwehn papah Siohwa ni atail lelohng kahpwal kan, kitail anahne pousehlahte likih ih. (Mel. 37:3) Me tohto rahnwet kin kasalehda arail likih Siohwa sang ni arail wiahda tounmetei tohto pwehn iang kauwada wasahn kaudok kan, papah wasa me mie anahn laud, de apwalih pwukoa teikan. Irail kin wia met pwehki re likih me Siohwa pahn ketin ahnsou koaros apwalih irail.—Mel. 23:1.

ASER

10. Dahme keinek en Aser sohte wia? (Senesis 49:20) (Pil kilang kakon.)

¹⁰ Wadek Senesis 49:20. Seikop kohpada me keinek en Aser pahn kepwehpwe oh ih met me wiawi. Keinek en Aser sohsohki sahpw me uhdahn pwelmwahu. (Deud. 33:24) Sapwarailo mi limwahn Sehd en Mediderenien oh kahnimw kepwehpweo Saidon mi wasao. Ahpw keinek en Aser sohte kihsang mehn Kenan kan sang sahpwo. (Sounkopwung 1:​31, 32) Pwehki arail kepwehpwe oh mehn Kenan ko wia mehn kahlemeng suwed, e mwomwen me keinek en Aser tepida sohla nsenohki wia kupwuren Siohwa. Karasepe, ni ahnsou me Sounkopwung Parak peki mehn Israel ko en sewese mahweniong sounpei en Kenan ko, keinek en Aser sohte men sawas. Eri irail sohte kilang soahng kapwuriamwei kan me Siohwa ketin doadoahngki pwehn sewese mehn Israel ko en kana, ni eh ketin doadoahngki “ni keilen piletik en Mekiddo.” (Sounkopwung 5:​19-21) Ele keinek en Aser namenekda ni ar rong Parak oh Depora koulki: “Aser mwomwohd sohte mwekid ni oaroahro.”—Sounkopwung 5:​17, NW.

11. Dahme kahrehda kitail anahne kolokol madamadau pwung ong kepwe kan?

¹¹ Dahme kitail kak sukuhlki? Kitail men patohwanohng Siohwa uwen atail kak koaros. Pwehn wia met, kitail anahne soikala madamadau en sampah wet ong kepwe oh mwohni. (Lep. Pad. 18:11) Kitail anahne kolokol madamadau pwung ong mwohni. (Ekl. 7:12; Ipru 13:5) Kitail sohte kin doadoahngkihla atail ahnsou oh kehl pwehn alehdi soahng kan me kitail sohte uhdahn anahne. Ahpw, kitail kin wia uwen atail kak koaros ong Siohwa. Kitail ese me ma kitail lelepekte, Siohwa pahn ketin katingih kitail nan sampah kapwo.—Mel. 4:8.

NAPDALI

12. Ia duwen ahn Seikop kokohpo duwen Napdali eh pweida? (Senesis 49:21) (Pil kilang kakon.)

¹² Wadek Senesis 49:21. Seikop kohpada me Napdali pahn kin koasoia “koasoi lingan kan.” Ele met dokedoke mwomwen Sises eh kin mahsen nan eh doadoahk en kalohk. Sises ketin doadoahngki ahnsou laud nan kahnimw en Kapernaum wasa me keinek en Napdali mi ie. Ihme kahrehda Kapernaum adaneki ‘sapwellime kahnimw.’ (Mad. 4:13; 9:1; Sohn 7:46) Oh Aiseia kohpada me Sises pahn ketin duwehte “marain lapalap ehu” ong aramas akan en Sepulon oh Napdali. (Ais. 9:​1, 2) Sang ni dahme e kin ketin padahngki, Sises ketin wia “marain mehlelo me kin kihda marain ong soangsoangen aramas koaros.”—Sohn 1:9.

13. Ia duwen atail kak tehk mwahu me atail koasoi kin kaperenda Siohwa?

¹³ Dahme kitail kak sukuhlki? Dahme kitail kin nda oh mwomwen atail koasoi kin kesempwal ong Siohwa. Ia duwen atail kak koasoia “koasoi lingan kan” me kin kaperenda Siohwa? Kitail anahne kin koasoi mehlel. (Mel. 15:​1, 2) Kitail kak kangoange meteikan sang ni atail nda soahng kan me kin kangoange irail. Karasepe, kitail kak kapinga soahng mwahu kan me re kin wia oh dehr koasoia arail sapwung de kaulim. (Ep. 4:29) Oh kitail kak wiahda mehn akadei en kamwahwihala atail kin tepida koasoiong aramas akan oh eri padahkihong irail duwen rongamwahwo.

SOSEP

14. Ia duwen kokohpo duwen Sosep eh pweida? (Senesis 49:​22, 26) (Pil kilang kakon.)

¹⁴ Wadek Senesis 49:​22, 26. Seikop uhdahn pohlki Sosep kahrehda ih me ‘pilipilda rehn rie ko.’ Seikop kahdaneki ih “tuhke pwoat me wah tohto.” Seikop me tuhkeo, oh nah pwutako Sosep duwehte rahn tuhkeo. Sosep iei nein Seikop tepin pwutak, ong Resel. Seikop kohpada me Sosep pahn alehdi sohsohn mesenih, a kaidehn Reupen, nein Lia tepin pwutak. (Sen. 48:​5, 6; 1 Kron. 5:​1, 2) Kokohp wet pweida ni ahnsou me nein Sosep pwutak riemeno Epraim oh Manase wiahla keinek riau en Israel oh ira koaros sohsohkihdi pein sapwara.—Sen. 49:25; Sos. 14:4.

15. Ia duwen Sosep eh mwekidki wiewia sapahreko?

¹⁵ Seikop pil koasoia me sounkesik ketieu kan pahn “kasikih [Sosep] oh kin usehlahte kailongki.” (Sen. 49:​23, NW) Met kin dokedoke rie pwutak ko me kin luwangki, wiakauwe oh kahrehiong en lokolongki soahng tohto. Ahpw, Sosep sohte kailongkihla rie pwutak ko de kapwopwohnki Siohwa dahme wiawio. Duwehte me Seikop koasoia: “[Sosep] kadangpeseng nah kesik ketieu oh sohte rerrer.” (Sen. 49:24) Sosep dupungkihong rie pwutak ko mahk oh limpoak, irair pwukat duwehte ketieu me kin kemehla kailok. Sosep likih Siohwa erein eh kahpwal kan oh e sohte mahkohngte rie pwukat ko ahpw e pil kadekohng irail. (Sen. 47:​11, 12) Sosep mweidohng kahpwal ko en kahrehiong en wiahla aramas mwahu men. (Mel. 105:​17-19) Imwilahn met, Siohwa kak ketin doadoahngki ih pwehn wia soahng kesempwal tohto.

16. Ia duwen atail kak kahlemengih Sosep ni atail lelohng kahpwal kan?

¹⁶ Dahme kitail kak sukuhlki? Kitail en dehr mweidohng kahpwal kan en katohreikitailsang Siohwa de riatail Kristian kan. Tamataman me Siohwa kak ketin pousehlahte kaiahne kitail ni atail kin pousehlahte papah ih ni ahnsou apwal kan. (Ipru 12:​7, ntp.) Kaiahn wet kak sewese kitail en kakairada irair en Kristian kan me duwehte kadek oh mahk. (Ipru 12:11) Ni atail kin dadaurete duwehte Sosep, Siohwa pahn ketin katingih kitail.

PENSAMIN

17. Ia duwen kokohpo duwen Pensamin eh pweida? (Senesis 49:27) (Pil kilang kakon.)

¹⁷ Wadek Senesis 49:27. Seikop kohpada me keinek en Pensamin pahn duwehte kidi en wel men oh koahiek en mahwen. (Sounkopwung 20:​15, 16; 1 Kron. 12:2) Tepin nanmwarki en Israel Sohl, kohsang keinek en Pensamin. Oh Sohl kehlail en peiong mehn Pilisdia kan. (1 Sam. 9:​15-17, 21) Sounpar tohto mwuhr, Lih Nanmwarki Ester oh Mordekai me kohsang keinek en Pensamin, doarehla mehn Israel kan sang kamakamala.—Est. 2:​5-7; 8:3; 10:3.

18. Ia duwen atail kak alasang ahn Pensamin eh loalopwoatohng sapwellimen Siohwa koasoandi kan?

¹⁸ Dahme kitail kak sukuhlki? Keinek en Pensamin kan ele uhdahn perenkihda Sohl me kohsang arail keineko eh wiahla arail nanmwarki. Ahpw mwuhr, Siohwa ketin wiahiong Depit me kohsang keinek en Suda, en wiahla nanmwarki. Ahpw keinek en Pensamin kan kedekedeo utungada Depit. (2 Sam. 3:​17-19) Sounpar kei mwuhr, ni ahnsou me keinek teiko uhwongada, keinek en Pensamin loalopwoatohngete Suda oh nanmwarkio me kohsang peneinei en Depit. (1 Nan. 11:​31, 32; 12:​19, 21) Kitail pil kak loalopwoatohngete irail kan me Siohwa ketin idihada pwehn kaweid sapwellime aramas akan rahnwet.—1 Des. 5:12.

19. Ia duwen atail kak paiekihda ahn Seikop kokohp ko?

¹⁹ Kitail kak paiekihda ahn Seikop kokohp ko. Atail kousapahlih duwen met kakehlaka atail pwoson oh likih me sapwellimen Siohwa kokohp kan pahn uhdahn pweida. Oh kitail pil kak wehwehkihla mwahu ia duwen atail kak kaperenda Siohwa.