Halloween Tepisang Ia?

Paipel sapengki

Paipel sohte koasoia duwen Halloween, rahnen kasarawi ehu me aramas tohto kin wia ni October 31 nan pahr koaros. Tiahk kan de soahng kan me pidada Halloween sangete mahs kin uhwong padahk kan en Paipel.

Nan artikel wet

• Poadopoad oh tiahk kan en Halloween

• E kesempwal en ese Halloween tepisang ia?

• Dahme kahrehda e adaneki Halloween?

Poadopoad oh tiahk kan en Halloween

• Samhain: Ehu pwuhk me adaneki The World Book Encyclopedia koasoia me Halloween tepisang “kasarawi ehu me mehn Celts kan mahso kin wia daulih sounpar 2,000 samwalahro. Mehn Celts kan kamehlele me aramas melahr kan kak iang me momour kan alialu ni ahnsowo. Erein Samhain, me momour kan kak ehuiong me melahr kan.”—Menlau kilang “Dahme Kahrehda E Adaneki Halloween?”

• Likoun Halloween, kanti, oh “trick or treat”: Nin duwen me ehu pwuhk koasoia, ekei mehn Celts kan kin likawih de kapwatki soahng kan me duwehte mwomwen ngehn suwed kan pwe ngehn suwed kan en dehr lidere irail. Ekei kin kihong ngehn kan kanti pwe ren dehr lingeringerda de kamedekihirailla.a

  

  Nan Iurop, erein pahr 500 lel 1,500, kaunen pelien lamalam en Kadolik tepida iang wia tiahk pwukat me pelien lamalam teikan kin wia. Irail padahkihong tohn arail sarawio en kohla ihmw lel ihmw likawih likoun Halloween oh peki kisakis kan.

• Eni kan oh siet kan: Soahng pwukat kin iangete ngehn suwed kan sangete mahs. Ehu pwuhk me adaneki Halloween Trivia koasoia me “eni pwukat” kin “pidada laud mehla, me melahr kan, de masak mehla.”

• Pwengkin en Halloween, de lamp me adaneki “jack-o’-lanterns”: Nan Britain, erein pahr 500 lel 1,500, aramas akan kin “kohla ihmw lel ihmw oh peki en kapakapki me melahr kan ma tohnihmwo kihong kanarail mwenge,” oh re kin wahda “wahn tuhke me adaneki turnip me irail kihsang kanenge oh kihong kandehla ehu loale, oh met kin wehwehki ngenen emen me selidi nan pwurkadorio.” (Halloween—From Pagan Ritual to Party Night) Ekei soupoad koasoia me lamp ko kin kadoadoahk pwehn kausasang ngehn suwed kan. Erein pahr 1800 samwa nan North America, irail uhd wiliankihdi turnip kan pwengkin pwehki e tohto oh mengei en kihsang kanenge oh parada.

E kesempwal en ese Halloween tepisang ia?

Ei. Ekei aramas medewe me Halloween wiahte kasarawi kaperen ehu me sohte keper. Ahpw soahng kan me aramas akan kin wia pwehn kasarawi Halloween kin uhwong dahme Paipel mahsanih. Halloween kin poahsoankihda padahk likamw duwen me melahr kan oh ngehn akan, de ngehn suwed kan.

Tehk iren Paipel pwukat me kasalehda sapwellimen Koht madamadau ong padahk kan me pid Halloween:

• “Kumwail dehpa . . . kin katieni.”—Deuderonomi 18:10-12.

  Met wehwehki: Koht sohte ketin kupwurki emen en ehuiong me melahr kan de pil mwomwehda koasoiong irail.

• “Me melahr akan sohte ese mehkot.”—Eklesiasdes 9:5.

  Met wehwehki: Pwehki me melahr kan sohte ese mehkot, irail sohte kak koasoiong me momour kan.

• “[Dehr] ehuong tepil kan. Kumwail sohte kak nimpil sang nan sapwellimen Kaun-o dahl oh pil nimpil sang nan nein tepil kan dahl.”—1 Korint 10:20, 21, Pwuhk Sarawi ni Mahsen en Pohnpei.

  Met wehwehki: Irail kan me men kenikenla rehn Koht anahne soikala ehuiong ngehn suwed kan.

• “Pelianda kehlail widing kan en Tepil; pwehki kaidehn nta oh uduk me kitail kin peiong, ahpw . . . ong ngehn suwed kan.”—Episos 6:11, 12.

  Met wehwehki: Kristian kan anahne pelianda ngehn suwed kan, oh dehr mwomwehda iang irail kasarawi.