Koht Ketin Ieias?
Paipel sapengki
Ei, Paipel kin kihda mehn kadehde kehlail me Koht ketin ieias. E kin kangoange kitail en kalaudehla atail pwoson Koht sang ni atail kin doadoahngki atail “koahiek en madamadau” oh “koahiek en dehdehkihla mwahu,” a kaidehn uhdahte kamehlele dahme pelien lamalam kan kin padahngki. (Rom 12:1; 1 Sohn 5:20) Medewehla duwen mehn kadehde pwukat sang nan Paipel:
Mwomwen audepen lahng oh sampah eh soandi mwahu kadehdehda me mie Sounkepikpik men. Paipel mahsanih: “Mehlel, ihmw koaros mie emen me kin wiahda, ahpw me kin ketin wiahda mehkoaros iei Koht.” (Ipru 3:4) Mendahki kawehwe wet mengei, ahpw e kin kamwakid laud aramas tohto me sukuhl laud.a
Kitail aramas akan ipwidihte ahneki ineng en men esehla ia wehwehn oh ia kahrepen mour, oh soangen ineng wet kin mihmihte pil mwurin atail apwalihalahr atail anahn en war kan. E wia kisehn dahme Paipel kasalehda duwen atail kin “anahne Koht,” me iangahki atail men esehla Koht oh kaudokiong. (Madiu 5:3; Kaudiahl 4:11) Anahn wet sohte kasalehdahte me Koht ketin ieias, ahpw e pil kasalehda me e wia Sounkepikpik limpoak men me ketin kupwurki kitail en kaitarala anahn wet.—Madiu 4:4.
Kokohp oaritik kan nan Paipel ntingdi sounpar epwiki kei mwohn ahnsou me re wiawi oh re pweida nin duwen me kokohpdahr. Uwen pwung oh oaritik en kokohp pwukat kasalehda ni mehlel me re kohsang emen me manaman sang aramas.—2 Piter 1:21.
Sounnting en Paipel kan ese soahng kan duwen sains laudsang dahme aramas teikan en ahnsowo kin wehwehki. Karasepe, mahso aramas tohto kamehlele me sampah mi pohn mahn emen, duwehte elipant, pwihk en nanwel, de kouwol men. Weksang met, Paipel mahsanih me Koht kin ketin “tenekihda sampah en langalang nan wehwe.” (Sohp 26:7) Pil duwehte met, Paipel kawehwehda ni pwung me sampah “pwonopwon.” (Aiseia 40:22, New World Translation of the Holy Scriptures) Aramas tohto medewe me sounnting en Paipel kan ese mepwukat pwehki Koht me ketikihong irail dahme re pahn ntingihada.
Paipel kin sapengala peidek apwal tohto, soangen peidek kan me kak kahrehiong emen en sohla kamehlele Koht ma re sohte alehdi pasapeng pwung. Karasepe: Ma Koht ketin limpoak oh sapwellimanki soangen manaman koaros, a dahme kahrehda miehki lokolok oh suwed nin sampah wet? Dahme kahrehda pelien lamalam kan kin kalapw kahrehda soahng suwed kan a kaidehn soahng mwahu kan?—Taitus 1:16.
a Karasepe, sounkasawih usu oh planet men me melahr me adaneki Allan Sandage nda met duwen audepen lahng: “I sohte leme me mehkot me kin soandi mwahu kak kohsang mehkot liseliping. Uhdahn mie mehkot me kin kaukaweid soahng pwukat. E uhdahn apwal ong ie en wehwehki me Koht ketin ieias, ahpw ihte ahl en kawehwehda dahme kahrehda soahng kan kin mie iei ma mie sounkepikpik men.”