Dainah Lelohng Apwal

KE KAK kilang ihs me Dainah kohkohlahng tuhong? E mwemweitla rehn serepein kan en sahpwen Kenaan. Iaduen, ah pahpa Seikop pahn perenki wiewia wet? Pwen sapeng peidek wet, kitail en tamanda me Apram oh Aisek sohte kin pwungki lih kan en Kenaan.

Apram mwahuki nah pwutak Aisek en pwoudkihda emen serepein sang Kenaan? Soh, e sohte mwahuki. Aisek oh Rihpekah mwahuki neira pwutak Seikop en pwoudkihda emen serepein en Kenaan? Soh, re pil sohte mwahuki. Ke ese dahme kahrehda?

Pwehki aramas en nan sahpwen Kenaan kin kaudokiong koht likamw akan. Irail pil kaidehn aramas mwahu me emen en men pwoudki, lih de ohl, oh irail pil kaidehn aramas mwahu en kin werekiong. Eri kitail uhdahn kak ese me Seikop sohte pahn perenki nah serepeino mwemweitla rehn kompoakpe serepein en Kenaan kan.

Mehlel ong met, Dainah lelohng apwal. Ke kak kilang ohl en Kenaan nan kilel wet me kangkakil Dainah? Eden ohlo Sikem. Ehu rahn Dainah eri mwemweitla, Sikem ahpw parokedi ih oh engkehlail ong ih oh wendi reh. Met inenen sapwung, pwe sohte emen me sohte pwopwoud lih de ohl pwung en wendipene. Me suwed me Sikem wiaiong Dainah kahrehda kahpwal tohto mwuhri.

Ni ansou me rien Dainah pwutak kan rongada dahme wiawi, irail mwakarada kowahlap. Riemen rehrail, Simion oh Lipai uhdahn mwakar, ira eri alehda kedlas oh kohieila nan kahnihmwo oh parokedi ohl ko. Ira oh riara kan kamehla Sikem oh ohl teikan. Seikop uhdahn mwakarkihda wiewia suwed me nah pwutak ko wia.

Iaduen kahpwal pwukat koaros tapiada? Koaros tapikihda ahn Dainah wiahkihla kompoakpah aramas kan me sohte peikiong kosonned kan en Koht. Kitail sohte men wiahki kompoakpatail soahngen aramas duwehte mwo, kaidehn?