Sosep Kasonge Rie Kan

SOSEP men ese ma rie 10 ko kin duduwehte lemei oh soh kadek. Ih eri inda: ‘Kumwail lipahrok kei. Kumwail kohdohn kilang duen luwet en aht wehi.’

‘Soh, kaidehn kiht lipahrok kei,’ irail inda. ‘Kiht ohl loaloapoat kei. Kiht koaros pirien ehu. Kiht me 12. Ahpw emen sohlahr mie, oh me keieu pwulopwul mi rehn aht pahpa.’

Sosep ahpw mwomwehda me e sohte kamehlele irail. Ih eri ale emen riarail ko me adaneki Simion oh kihong nan imweteng, oh mweidong mehteikan en alehda mwenge oh pwurala sapwarail. Ahpw e padahkiong irail: ‘Ni omwail pahn pwurohdo, kumwail pahn wahdo riomwail me keieu pwulopwul.’

Ni arail leldohng arail wasa nan Kenaan, pirieno eri padahkiong samarail Seikop soahng kan koaros me wiawiehr. Seikop inenen pahtouki mehlel. ‘Sosep sohlahr mie,’ e indahda, ‘oh met Simion pil sohlahr. I sohte pahn mweidong kumwail en alehda nai pwutak pwulopwul Pensamin.’ Ahpw ni ansou me mwenge kan sohlahr itar, Seikop eri mweidong irail en kahrehda Pensamin oh kohla Isip pwe ren pil netiada kenarail mwenge.

Met Sosep kilang rie kan kohkohdo. E inenen perenki kilang rie pwutak pwulopwulo Pensamin. Ni mehlel, sohte emen irail ese me ohl kesempwal menet Sosep. Met Sosep wia mehkot pwen kasonge rie ohl 10 ko.

E padahkiong nah ladu ko en audehki mwenge arail ehd ko koaros. Ahpw ni arail sehse, e ale ehu ah dahl silper oh pwilikihdi nan ahn Pensamin ehd. Mwehrin irail koaros mwesel oh kohkohwei ekis doh pohn ahlo, Sosep kadarala nah ladu ko mwehrin irail. Ni en ladu ko leldo rehrail, re inda: ‘Dahme kahrehda kumwail pirapehla ahn soumwas kepo?’

‘Se sohte mwahn pirapehla ah kepo,’ irail pirieno inda. ‘Ma ke pahn diar kepo rehn emen kiht, aramaso en kamakamala.’

Ladu ko eri tehk arail ehd ko koaros, oh re diarada me kepo mi nan ahn Pensamin ehd, duwehte me ke kilang met. Ladu ko inda: ‘Kumwail koaros kak doululwei, ah Pensamin uhdahn pahn kohdo iang kiht.’ Dahme irail pirieno me 10 kak wia?

Irail koaros pwurohdo iang Pensamin ong ni ihmwen Sosep. Sosep eri padahkiong rie ko: ‘Kumwail koaros kak pwurala sahpwomwail, ah Pensamin uhdahn pahn wiahla ai ladu.’

Sudah eri met koasoaiada, oh indahda: ‘Ma se pahn pwurala oh pwutaken sohte iang kiht, sahmat pahn mehla pwehki e inenen poakepoake menet laud. Ihme menlau, ke pahn ale ie oh wiahkihla ie ahmw ladu, ah mweidong pwutak menet en kohla nan aht wasao.’

Sosep kilangehr me rie kan wekilahr. Re sohlahr lemei oh soh kadek. Kitail pahn kilang dahme Sosep wia met.