Depit oh Kolaiad

KADEKADEO mehn Pilisdihn kan pil kohdohng mahwiniong Israel. Rien Depit pwutak laud silimen kin iang sounpei kan en Saul. Ehu rahn Sehsi padahkiong Depit: ‘Alehda ekei krein oh lopwon en pilawa wahla ong riomw kan. Kilang ma ia irerail.’

Ni ansou me Depit leldohng wasa me sounpei ko mi ie, e tangala wasa me kerenlahng imwintihti ko pwen rapahki rie kan. Ohl emen, mehn Pilisdihn, emen kodon me ede Kolaiad eri kohieido kapailoke mehn Israel kan. E kin wiewia met ni menseng oh ni soutik koaros impan rahn 40. E kin wer: ‘Pilada emen ohl sang rehmwail pwen peiong ie. Ma e kana oh kameiehla, se pahn wiahla omwail ladu kan. Ahpw ma I kana oh kamehla ih, kumwail pahn wiahla aht ladu. Kumwail koaros masapwehk, sohte emen kak kohdo peiong ie.’

Depit idek rehn sounpei ko: ‘Dahme ohl emen pahn ale ma e kamehla ohl en Pilisdihn menet oh kihsang Israel sang kanamenek wet?’

‘Saul pahn kihong ohlo kepwe tohto,’ sounpeio sapeng ih. ‘Oh e pil pahn kihong ih nah serepein en pwoudki.’

Ahpw mehn Israel kan koaros masak Kolaiad pwehki e inenen kalaimwun. Ohl menet reireiki piht 9 (mihter 3), oh mie emen ohl me kin weuwah nah mehn pereper.

Ekei sounpei me rong kohla oh padahkiong Nanmwahrki Saul me Depit mwahuki peiong Kolaiad. Ahpw Saul indaiong Depit: ‘Ke sohte kak peiong ohl en Pilisdihn menet. Ke kisin pwutak men, ah ohlo kin sounpei men erein ah mour.’ Depit sapeng: ‘I kamehla emen pehr oh emen laion me tangahki nain semei sihpw. Oh mehn Pilisdihn menet pahn pil duwehte irail. Siohwa pahn sewese ie.’ Saul eri inda: ‘Kohla, oh Siohwa en ieiang uhk.’

Depit eri kohieidihla nan kisin pihlo oh pwekada takai tikitik medendel limau, oh kihong nan ah ehd. Mwuhri e kohieila ale nah poad oh kohla pwen tuhong Kolaiad. Ni ansou me Kolaiad kilangada ih, e inenen sohte kak kamehlele. E lemeleme me e pahn mengei en kamehla Depit.

‘Kohdohng ie,’ Kolaiad inda, ‘oh I pahn kihong paliwaromwen mahn oh menpihr kan ren kangala.’ Ahpw Depit inda: ‘Ke kohkihdo kedlas oh ketieu, ahpw I kohkihdo mwaren Siohwa. Rahnwet Siohwa pahn ketikihong uhk nan pehi oh I pahn kameiuhkala.’

Ni ansouohte Depit tangwong Kolaiad. E alehda ehu takai sang nan ah ehd, kihong nan nah poad, likasih oh kateki ohlo. Takaio pihrla oh lel mwoangen Kolaiad, ih eri pwupwedi mehla! Ni ansou me mehn Pilisdihn kan kilang me arail sampion pwupwediehr, irail koaros pirekekla oh tang. Mehn Israel kan ahpw pwakihwei irail oh kana ni mahwino.