Depit Sohte Masepwehk

Dahme ke kin wia ma ke masepwehk?— Mwein ke kin kohla rehn ahmw nohno oh pahpa peki sawas. Ahpw mie emen tohrohr me pil kak sewese iuk. Ih me keieu kehlail sang koaruhsie. Ke ese ihs met?— Ei, Siohwa Koht. Nna, kitail pahn koasoiapene duwen pwutak men nan Paipel me adaneki Depit. E ese me Siohwa pahn ketin ahnsou koaros sewese ih. Eri e sohte masepwehk.

Sangete ni en Depit eh seri pwelel, eh pahpa nohno padahkihong ih en poakohng Siohwa. Met sewese Depit en sohte masepwehk mendahki soahng kamasepwehk kan wiawihong ih. Depit ese me Siohwa iei kompoakepah oh E pahn ketin sewese ih. Ehu ahnsowo, Depit apwahpwalih ekei sihpw, a emen lapalahn laion kohdo ngalisdi emen sihpw ko oh pahn tangahki! Ke ese dahme Depit wia? E pwakih laiono oh doadoahngkihte pehko oh kemehkihla laiono! Oh ni ahnsou me emen pehr kohdohng wahsang nah sihpw, Depit pil kemehla! Ihs me ke leme sewese Depit?— Ei, Siohwa.

Pil mie ehu pak me Depit uhdahn eimah. Mehn Israel kan mahweniong aramas kei me adaneki mehn Pilisdia. Emen sounpei en mehn Pilisdia, uhdahn ohl reirei men. Ih kodon men! Ede Kolaiad. Kodon menet kin kemenkouruhrki sounpei en Israel ko oh Siohwa. Kolaiad kasonge sounpei en Israel ko ma re pahn kak eimah oh peiong ih. Ahpw koaros mehn Israel ko uhdahn masak peiong ih. Ni ahnsou me Depit rong duwen met, e ndaiong Kolaiad: ‘I pahn peiong uhk! Siohwa pahn ketin sewese ie, oh I pahn kaloweiukedi!’ Ia duwe, ke leme me Depit eimah?— Ei, e uhdahn eimah. Ke men ese dahme wiawi mwurin met?

Depit ale nah mehn kos takai oh takai medendel limau, oh e kohla pwehn peiong kodono. Ni Kolaiad eh kilang uwen pwulopwul en Depit, e kemenkouruhrki ih. Ahpw Depit ndaiong ih: ‘Ke kohkohdohng peikihong ie kedlahs, a ngehi I pahn peikihong uhk mwaren Siohwa!’ Ih eri kihong ehu takai nan nah mehn kos takaio, tangalahng Kolaiad, oh kadaralahng takaio. Takaio lelete nanpwungen mesen Kolaiado, ih eri pwupwudiong nanpwel oh mehla! Mehn Pilisdia ko uhdahn masepwehkada oh tangasang. Ia duwen pwutak men duwehte Depit eh kak kalowehdi kodon men?— Siohwa ketin sewese ih, oh Siohwa uhdahn kehlail sang kodono!

Dahme ke kak sukuhlki sang Depit?— Siohwa kehlailasang koaruhsie. Oh ih kompoakepahmw. Eri ni ahnsou me ke masepwehk, tamataman me Siohwa kak ketin seweseiuk ken eimah!