Dahme Kahrehda Depit en Uhdahn Tangwei

MWEHRIN Depit kamehla Kolaiad, kaun en sounpei en Israel Apner kahrehdo ih rehn Saul. Saul uhdahn perenkihda Depit. E kasapwilada ih en wiahla kaun en sounpei oh luhkehdo ih en kousoan nan ihmwen nanmwahrkio.

Mwuhri, ni ansou me sounpei kan pwurohdo sang arail mahwiniong mehn Pilisdihn kan, lih kan en wasao kokoul: ‘Saul kamehla kid kid, ahpw Depit kamehla nen nen.’ Met kahreong Saul en peirinkihda, pwehki Depit kin ale wahu laud sang Saul. Ahpw nain Saul pwutak Sonadan sohte peirinki. E inenen poakong Depit laud, oh Depit pil poakong Sonadan. Ihme me riemenet wiahda inou nanpwungara pwe ira pahn pirien kohkohlahte.

Depit emen me semen kesengih arp, oh Saul kin pil perenki rong en Depit kin keseng. Ahpw rahn ehu ahn Saul peirin kahreong ih en wia mehkot me inenen suwed. Ni en Depit wia kesekeseng, Saul doakoahki ih mehn dok, indahda: ‘I pahn doakoah ong Depit ni dido!’ Ahpw Depit sarek, oh ketieu sohte lel ih. Mwuhri Saul pil doakoah Depit oh pil sohte lel ih. Depit eri eseiehr me anahne en kanahieng.

Ke tamataman inou me Saul wiahda? E inda me e pahn kihong nah serepeino pwen pwoudki ohl me kamehla Kolaiad. Ahpw Saul met indaiong Depit me e kak ale nah serepeino Maikel, ahpw mahs e anahne kamehla arail imwintihti mehn Pilisdihn 100. Nna medemedewe met! Saul uhdahn lemeleme me mehn Pilisdihn kan pahn kamehla Depit. Ahpw irail sohte kamehla ih, Saul eri kihong nah serepeino en pwoudki Depit.

Ehu rahn Saul indaiong Sonadan oh nah ladu kan koaros me e men kamehla Depit. Ahpw Sonadan indaiong seme: ‘Dehr wiaiong mehkot suwed Depit. E saikinte wia mehkot sapwung ong uhk. Ahpw, soahng koaros me e wia kin sewese iuk laud. E mehndakihla ah mour ni ah kamehla Kolaiad, oh ni ahmw kilangada, ke perenkihda.’

Saul rong nah pwutak, oh e inoukihda me e sohte pahn wia me suwed ong Depit. Irail eri kapwurehdo Depit, oh e papahong Saul nan ihmweo duwehte me e kin wia mwowe. Rahn ehu, Depit pil wia keseng, Saul pwurehng doakoahki Depit mehn dok. Depit sarek, oh ketieu lel did. Ansou wet kasilipak! Depit ese met e anahne tang!

Ni pwongo Depit kohieila nan pein ihmwe. Ahpw Saul kadarala ohl kei pwen kamehla ih. Maikel ese dahme seme pilaniehda pwen wia. Ih eri padahkiong ah pwoud: ‘Ma ke sohte pahn tang pwonget, lakapw ke pahn mehla.’ Ni pwongo Maikel sewese Depit pwen pidoi nan ehu wanihmwtok. Impan sounpahr isuh Depit kin rukuruk wasa kan pwe Saul en sohte kak diarada ih.