Depit Kasapwilda Nanmwahrki

SAUL pil pwurehng song en parokedi Depit. E kahrehda nah sounpei 3,000 me keieu koahiek en kohla rapahki Depit. Ni ansou me Depit esehda duen met, e kadarala lipahrok kei pwen kilang iawasa Saul oh nah kan kommoaldi ni pwong. Depit eri idek rehn nah ohl riemen: ‘Ihs rehmwa me pahn iang ie kohla wasa me nain Saul kan mihmi ie?’

‘I pahn,’ Apisai sapeng. Apisai iei nain rien Depit lih Seruiah. Ni ansou me Saul oh nah kan memeir, Depit oh Apisai kerepwla ni soh ngihle lelahng wasa me re mi ie. Ira eri pwekada nain Saul mehn dok oh mehn deupen pihl, me mi limwahn ah uluhl. Sohte emen rong oh kilang pwehki irail koaros memeir.

Ke kak kilang Depit oh Apisai met. Ira pitilahr, oh miehr pohn kadoken nahnao. Depit eri ngihl laud likwer lahng kaun en sounpei en mehn Israel kan: ‘Apner, dahme kahrehda ke sohte sinsile ahmw soumwas, nanmwahrkio? Kilang! Ia nah ketieu oh ah mehn deupen pihl?’

Saul eri pwourda. E pohnese ngihlen Depit, oh idek: ‘Kowe, Depit?’ Ke kak kilang Saul oh Apner mihmi palio nan kilel wet?

‘Ei, ai kaun nanwahrki,’ Depit sapeng Saul. Oh Depit idek: ‘Dahme ke raparapahki pwen parokeiehdi? Suwed da me I wiahda? Iet noumw ketieu, Maing, nanmwahrki. Emen noumw kan en kohdo oh ale.’

‘I wiahdahr me sapwung,’ Saul wehkada. ‘I wia me pweipwei.’ Ni ansouo Depit eri kohieila nan apwoat ahl, oh Saul pwurala nan ah wasa. Ahpw Depit indaiong pein ih: ‘Ehu rahn Saul pahn kameiehla. I pahn tangala nan sahpwen mehn Pilisdihn.’ Oh ihme e wiahdahr. Depit kohla oh pitihdi mehn Pilisdihn kan pwe ren kamehlele me e iangalahr arail pali.

Ansoukis mwuhri mehn Pilisdihn kan kohieila mahwiniong mehn Israel kan. Nan mahwino, Saul oh Sonadan kamakamala. Met kahreong Depit en pahtoukihla mehlel, oh e intingihda koul kasehlel ong wiewia wet, ni ah kin koulki: ‘I pahtoukin uhk, riei Sonadan. Komwi mehd kompoake ong ie!’

Mwehrin met Depit pwurohdohng Israel nan kahnihmwen Epron. Mie mahwin ehu me wiawi nanpwungen ohl kan me pilada nain Saul ohl Isposed pwen nanmwahrki oh ohl teikan me men Depit en nanmwahrki. Ahpw ni imwisekela nain Depit ohl akan kana. Ansouwet Depit mahkiehr sounpahr 30 ni ah wiahla nanmwahrki men. Sounpar isuh elep e kin kakaun nan Epron. Ekei nah pwutak kan ipwidi wasao, iei Amnon, Apsalom oh Adonaisah.

Ansou lelehr me Depit oh nah kan en kohdahla oh kalowehdi kahnihmw kasehlel me adaneki Serusalem. Sowap, emen nain rien Depit lih Seruiah, tiehngala mwowe nan mahwin wet. Ihme kahrehda Depit kasapwilada Sowap en wiahla kaun en nah sounpei kan. Mwehrin met, Depit tapiadahr kaunda sang nan kahnihmwen Serusalem.