Nanmwahrki Loalokong Solomon

SOLOMON pwutak pwulopwul ansou me e kasapwilda nanmwahrki. E inenen poakong Siohwa, oh e kin peikiong kaweid mwahu kan koaros me ah pahpa Depit kaianekin ih. Siohwa inenen perenkihda me Solomon wia, oh ihme ehu pwong e mahsanih ong ih nan auramen: ‘Solomon, dahme ke men I en kihong uhk?’

Eri Solomon sapeng: ‘Siohwa ai Koht, Ngehi me pwulopwul oh I sehse duen ai pahn kaunda. Ihme kihong ie erpit pwe I en kak kaun sapwellimwomwi aramas kan ni ahl pwung.’

Siohwa inenen perenkihda me Solomon peki. Ih eri mahsanih: ‘Pwehki ke kin peki rei erpit ah kaidehn mour werei de kapwehpwe, I pahn kihong uhk erpit laud sang aramas koaros me mourehr. Ahpw I pil pahn kihong uhk me ke sohte peki, kapwehpwe oh lingan.’

Ansoukis mwotomwot mwuhri lih riemen kohdohng Solomon oh wahdo ehu apwal laud. ‘Lih menet iang ie mi nan ihmw tehieu,’ emen ira inda. ‘I neitikihdi emen pwutak, oh rahn riau mwuhri lih menet pil neitikihdi pwutak men. Eri pwong ehu nah serio mehla. Ahpw ni ai memeir, lih menet pwilikihdi nah seri mehlao limwahi oh alehda nai serio. Ni ai pwourda oh kilang serio mehlahr, I diarada me kaidehn nai.’

Emen lih ko ahpw pil inda: ‘Soh! Seri me mouro nai, oh serio me mehlahr nah!’ Keieun liho pil sapeng: ‘Soh! Serio me mehlahr noumw, oh seri mouro nai!’ Ihduen akamai me lih riemenet wia. Dahme Solomon pahn wia?

E ilekla apwoat kedlas en wisikdo, oh, ni ah wisikdohr, e inda: ‘Pelepesang seri mouro pali riau, oh kihong apali emen lih oh apali emen.’

‘Soh!’ uhdahn nohno en serio sengeseng. ‘Menlau dehr kamehla serio. Kihong liho!’ Ahpw emen lih ko inda: ‘Dehr kihong emenemen kiht; lepukpesang serio.’

Ni imwisekela Solomon eri koasoaia: ‘Dehr kamehla serio! Kihong keieu en liho. Ih me uhdahn nohno en serio.’ Solomon ese met pwehki uhdahn nohno en serio poakong serio laud oh sohte mwahuki serio en kamakamala, e mehndahki ma lih teio naineki. Ni en aramas kan rongehr duen ahn Solomon rapahkihda pwung en kahpwal wet, re inenen perenkihda me arail nanmwahrkio emen me erpit.

Erein ahn Solomon kaunda, Koht kapaiada aramas kan oh kahreong pwel en mwahu oh mwetuwel kan pweida mwahu duwehte wihd oh parlih, kreip oh wahn pik kan oh ekei mwenge tohto teikan. Aramas kan ahniki likou mwahu oh mi nan ihmw mwahu kan. Soahng koaros itar me mwahu ong mour en aramas koaros.