Solomon Kauwada Ihmwen Kaudok

MWOHN Depit mehla, e kihong Solomon pilahn ehu me kohsang rehn Koht ong duen kaukauwpen ihmwen kaudok en Siohwa. Ni kapahieu en pahr en ah kaunda, Solomon tapiada kauw ihmwen kaudok, oh e kauwki sounpahr isuh elep oh kaimwisekela. Aramas nen nen kei wia doadoahk ong ihmwen kaudok, oh ihmwo pweilaud mehlel, mwohni laud me kadoadoahkiong. Met pwehki kohl oh silper tohto me kadoadoahkiong ihmwen kaudoko.

Ihmwen kaudoko pere riau mihmi loale, duwehte ihmwen kaudok likou me re kin doadoahngki mahs. Ahpw pere riau wet kalaimwun sang me mi nan ihmwen likouo. Solomon wahdo kohpwa en inou oh pwilikihdi nan pere en pali loale, oh dipwisou teikan en ihmwen likouo e pwilikihdi nan pere teio.

Ni ansou me ihmwen kaudoko imwisekela, isimwas laud wiawi. Solomon ahpw kelepwikidi mwohn ihmwen kaudoko oh kapakap, duen me ke kilang nan kilel wet. ‘Nan lahng pwon sohte itar en kolokol komwi,’ Solomon patohan ong Siohwa, ‘ia wen soh itar, ihmw wet en kak kolokol komwi. Ahpw, Maing ai Koht, menlau rong sapwellimomwi aramas kan ni ahr kapakap ong wasaht.’

Ni en Solomon kaimwisekela ah kapakap, kisiniei mwerdihdo sang nanleng. E isikadahr arail isihs meirong me re wiahdahr. Marain ehu sang rehn Siohwa ahpw kadirehla ihmwen kaudoko. Met kasansalehda me Siohwa ketin rongerong, oh me e ketin pwungki ihmwen kaudoko oh kapakap me Solomon wia. Ihmwen kaudoko uhd wiahlahr wasa me aramas pahn kohdo pwen kaudok, ah sohlahr ihmwen kaudok likou.

Ansou werei Solomon kin kakaun ni erpit, oh aramas kan insenamwahu. Ahpw Solomon pwoudkihdahr lih tohto sang wehi tohto kan me sohte kaudokiong Siohwa. Ke kak kilang emen irail kaudokiong dikadik? Kadekadeo ah pwoud kan kahreong ih en pil iang kaudok ong koht likamw kan. Ke ese dahme wiawiong Solomon ansou wet? E sohlahr kadek ong nah aramas ko. E wiahla emen kaun lemei, oh aramas kan sohlahr peren oh insenamwahu.

Met kahrehda Siohwa en engiengda rehn Solomon, oh padahkiong ih: ‘I pahn kihsang uhk wehi oh kihong emen aramas. I sohte pahn wia met nan erein ahmw mour, ahpw ni mwehin noumw pwutak. Ahpw I sohte pahn kihsang aramas koaros noumw pwutak.’ Kitail pahn kilang dahme wiawi.