Sesepel—Lih Nanmwahrki Suwed

MWEHRIN Nanmwahrki Seropoam mehla, emenemen nanmwahrki kan koaros me kaunda kainok 10 en Israel pil suwed. Nanmwahrki Ehap me keieu suwed. Ke ese dahme kahrehda? Ehu kahrepe pwehki ah pwoud, Lih Nanmwahrki suwed Sesepel.

Sesepel kaidehn lih en Israel men. Ah pahpa iei nanmwahrki en Saidon. Lih menet kin kaudokiong koht likamw Paal, oh e pil kahreong Ehap oh mehn Israel tohto en kaudokiong Paal. Sesepel kailongki Siohwa oh kamehla sapwellime soukohp tohto. Ekei tangwei nan nahna oh rukala nan pwoahr pwen pitsang kamakamala. Ma Sesepel pahn mwahuki mehkot, e pil pahn kamehla aramaso pwen alehda me e mwahuki.

Ehu rahn Nanmwahrki Ehap pahtou mehlel. Sesepel eri idek reh: ‘Dahme ke pahtouki rahnwet?’

‘Pwehki me Napod indaiong ie,’ Ehap sapeng. ‘I men pwainda ah mwetin wain. Ahpw e indaiong ie me I sohte kak ahniki.’

‘Dehr insensuwed,’ Sesepel inda. ‘I pahn ale ong uhk mwetuwelo.’

Sesepel eri intingihda kisin likou kan kadaralahng me lapalap kan nan kahnihmwo wasa me Napod kin mi ie. ‘Alehda ekei aramas mwahl en koasoaia me Napod kariala Koht oh nanmwahrkio,’ lih suwedo indaiong irail. ‘Eri ale Napod wahla likin kahnihmwo oh kateh ih pwen mehla.’

Ni ansou me Sesepel eseiehr me Napod mehlahr, ih eri indaiong Ehap: ‘Met ke kak kohla oh ale ahmw mwetin wain.’ Ke soh pwungki me Sesepel uhdahn konehng en lokolok pwehki soahngen ah wiewia suwed?

Kadekadeo, Siohwa eri kadarala emen ohl me adaneki Sehu pwen kaloke lih menet. Ni ansou me Sesepel rongada me Sehu kohkohdo, ih eri kohieila oh kapwatehda mese oh pwuhrieng nan likou kasehlel pwen mwohmw mwahu. Ahpw ni en Sehu leldo oh kilangada Sesepel nan wanihmwo, e likwerlahng ohl akan me mi nan ihmwo: ‘Kasehdi ih!’ Ohl ko peikiong, duen me ke kak kilang nan kilel wet. Irail eri parokedi liho, oh sikendihla, oh e pwupwedi mehla. Iet imwin lih nanmwahrki suwed Sesepel.