IREN MEHN KASUKUHL 49
Lih Nanmwarki Suwed Men Kalokolok
Nan Sesreel, sang ni wenihmwtok en imwen Nanmwarki Eihap, e kak kilang mwetuwel en wain ehu me ohl emen me adaneki Napod ahneki. Eihap men ahneki mwetuwel en wain wet, ih eri song en pwainsang Napod mwetuwelo. Ahpw Napod sohte men netikihong ih pwehki e uhwong sapwellimen Siohwa Kosonned en netikihla sohsohn sahpw. Ia duwe, Eihap wauneki Napod pwehki wiewia pwung me e wiao? Soh. Eihap uhdahn lingeringerda. E uhdahn lingeringer kahrehda e sohte men pedoisang nan eh perehn meiro, oh sohte kin men mwenge.
En Eihap pwoudo, lih Nanmwarki suwed Sesepel, ndaiong ih: ‘Kowe me nanmwarki en Israel. Ke kak ahneki soahng koaros me ken men ahneki. I pahn kihong uhk sahpwo.’ Ih eri ntingihada kisinlikou kei ong ohl mah kan nan kahnimwo me ndaiong irail ren kapwukoahki Napod me dene e mwamwahliki Koht oh ren katehki takai lao e mehla. Eri ohl mah ko wia dahme Sesepel ndaiong irail ren wia, mwuri Sesepel ahpw ndaiong Eihap: ‘Napod melahr. Met ahmw mwetuwel en waino.’
Kaidehn Napod kelehpw me sohte dipe me Sesepel kemelahr. E kemelahr aramas tohto me kin poakohng Siohwa. E kin kaudokiong dikedik kan oh kin wia soahng suwed teikan. Siohwa kin ketin mwahngih soahng suwed koaros me Sesepel wiahda. Dahme e pahn ketin wiahiong ih?
Mwurin Eihap eh mehla, nah pwutak Soram uhd wiliandi wiahla nanmwarki. Siohwa ketin kadarala ohl emen me adaneki Sehu pwehn kaloke Sesepel oh eh peneinei.
Sehu eri dakehda were kurumao kohla Sesreel, wasa me Sesepel kin mihmi ie. Soram ahpw pil dakehda were kurumao kohdo pwehn tuhwong Sehu oh idek reh: ‘Mie popohl nanpwungata?’ Sehu ahpw sapengki: ‘Sohte popohl pahn mie ma omw nohno, Sesepel, pahn wiewiahte me suwed.’ Soram eri song en wekid were kurumao pwehn kohkohla. Sehu ahpw kasikihki Soram arep pwoat, oh kemehla.
Sehu eri kohla ni imwen Sesepelo. Ni ahnsou me Sesepel rongada me e kohkohdo, e kapwatada mwahu, wiahda pitenmoange kan, oh awiawih ni eh wenihmwtoko. Ni ahnsou me Sehu lella, Sesepel rahnmwahwih ni elen lemei. Sehu ahpw werkilang nein Sesepel ladu ko me kesikesihnen limwah ko: “Kumwail kesehdihdo lihen!” Irail eri kesehdihla Sesepel sang ni eh wenihmwtoko, ih eri pwupwudihla nanpwelo oh mehla.
Mwurin mwo, Sehu ahpw kemehla nein Eihap pwutak 70 ko oh kamwakelehsang kaudok en Paal nan sahpwo. Ia duwe, ke kak kilang me Siohwa kin ketin mwahngih soahng koaros, oh ni ahnsou me konehng e kin ketin kaloke irail me kin wia me suwed kan?
“Mehnda ma emen alehdi sohso ehu sang ni eh noahrok nin tapio, met sohte pahn imwikihla kapai ehu.”—Lepin Padahk 20:21, NW