Sapwellimen Koht Aramas Mwesel Sang Papilon

IMPAN sounpahr riau mwehrin Papilon lohdiong mehn Mihd oh Persia. Oh kilang dahme wiawi met! Ei, mehn Israel kan pidoisangehr Papilon. Iaduen arail maiouda? Ihs me mweidong irail en pidoi?

Sairus, nanmwahrki en Persia, me wiahda met. Mahs mwohn Sairus ipwidi, Siohwa padahkiong sapwellime soukohp Aiseia en intingihdi duen menet: ‘Ke pahn wia mehkan me I mwahuki ken wia. Wanihmw kan pahn ritida pwe ken kalowehdi kahnihmwo.’ Sairus me kaun en irail kan me kalowehdi Papilon. Mehn Mihd oh Persia kan pidelong nan kahnihmwo ni pwong ki wanihmw kan me langalang.

Ahpw sapwellimen Siohwa soukohp Aiseia pil koasoaia me Sairus pahn kihda pangoak pwe Serusalem oh ihmwen kaudoko en pwurehng kaukauwada sapahl. Sairus uhdahn wiahda met? Ei, e wiahdahr. Met iei me Sairus padahkiong mehn Israel kan: ‘Kohla, ansouwet, ong Serusalem oh kauwada ihmwen kaudok ong Siohwa, omwail Koht.’ Eri ih met me mehn Israel pwukat kohkohlahng en wia.

Ahpw kaidehn mehn Israel koaros nan Papilon iang kohla Serusalem. Wasa me irail kohkohlahng me doh mehlel me mi ni mwail 500 (kilomihder 800) oh me tohto mahlahr oh soumwahu me sohte kak iang sapsapal. Oh mie kahrepe teikan me ekei sohte men iang kohla. Sairus eri padahkiong irail kan me sohte men iang kohla: ‘Kihda silper oh kohl oh kisakis teikan rehn irail kan me pahn kohla kauwada Serusalem oh ihmwen kaudoko.’

Ihme kahrehda kisakis tohto kohwong mehn Israel pwukat me kohkohlahng Serusalem. Sairus pil kihong irail dahl akan oh dipwisou kan me Nanmwahrki Nepukadnesar kihsang ihmwen kaudok en Siohwa ni ansou me e kawehla Serusalem. Aramas akan aleiehr soahng tohto me irail wahlahng Serusalem.

Mwehrin arail sapsapal sounpwong pahieu, mehn Israel kan lelohng Serusalem ansou me keieu pwung ong. Sounpahr 70 sang ansou me kahnihmwo ohla, oh sahpwo tehnlahr. Ahpw mehndahki mehn Israel kan ansouwet miehr nan pein sahpwarail irail pahn lelohng soahngen kahpwal kei, duen me kitail pahn sukuhliki mwuhri.