Liki Siohwa en Ketikihda Sawas

IMPAN aramas 50,000 me mwesel sang Papilon ong Serusalem. Ni arail lela wasao, Serusalem ihte ehu ohla laud. Sohte mehmen mi wasao. Mehn Israel kan anahne en kauw sapahl soahng koaros.

Ehu me re keieu wia iei arail kauwada pehi sarawi ehu. Met iei wasa ehu me irail kak wia meirongki mahn, de kisakis, ong Siohwa. Sounpwong kei mwuhri mehn Israel kan tapiada kauwada ihmwen kaudoko. Ahpw imwintihti sang wehi kan me limwarail sohte mwahuki mehn Israel kan en kauwada ihmwen kaudoko. Irail eri tapiada kamasapwehkih mehn Israel kan pwe irail en uhdi. Kadekadeo, imwintihti pwukat kahreong nanmwahrki kapw en Persia en wiahda ehu kosonned pwen katokiedi doadoahk en kauwada ihmwen kaudoko.

Sounpahr kei dower powe. Met sounpahr 17 sang ansou mehn Israel kan mwesel sang Papilon. Siohwa eri poronehdo sapwellime soukohp Akkai oh Sekaraia pwen padahkiong aramas kan en pwurehng kauw sapahl ihmwen kaudoko. Aramas kan liki Siohwa, oh peikiong soukohp ko. Irail eri tapiada kauw ihmwo, mehndahki kosonnedo koasoaia ren dehr wia met.

Eri emen lapalap en Persia me adaneki Dadenai kohdo oh idek rehn mehn Israel ko pwuhng da me re ahniki pwen kauw sapahl ihmwen kaudoko. Mehn Israel kan padahkiong ih me ni arail mihmihte Papilon, Nanmwahrki Sairus padahkiong irail: ‘Kohla, ansouwet, Serusalem oh kauwada sapahl ihmwen kaudok en Siohwa, omwail Koht.’

Dadenai eri kadarala ehu kisin likou ong Papilon oh idek ma Sairus, me ansouwet mehlahr, uhdahn inda ireo. Ansoukis mwuhri kisin likou ehu pekederedo sang rehn nanmwahrki kapw en Persia. E inda me Sairus uhdahn indahda ireo. Nanmwahrkio intingihdi: ‘Mweidong mehn Israel kan en kauwada tehnpas en arail Koht. Oh I pangoaki ong uhk en sewese irail.’ Sounpahr pahieu mwuhri ihmwen kaudoko imwisekela, oh mehn Israel kan peren kowahlap.

Pahr ngeder dower powe. Impan ansouwet sounpahr 48 sang ni ansou me ihmwen kaudoko imwisekela. Aramas kan nan Serusalem me semwemwe, oh kahnihmwo iangahki ihmwen kaudok en Koht sohte nohn mwahu. Nan Papilon, emen ohl en Israel me adaneki Esra eseiehr duen anahn en kamwahuiahla tehnpas en Koht. Eri ke ese dahme e wia?

Esra kohieila rehn Artaserksis, nanmwahrki en Persia, oh nanmwahrki mwahu menet kihong Esra kisakis tohto pwen wahla Serusalem. Esra pil peki rehn mehn Israel kan nan Papilon en sewese ih wahla kisakis pwukat ong Serusalem. Impan me 6,000 inda me irail pahn iang kohla. Mie silper, kohl oh kepwe kesempwal tohto me irail pahn wahla Serusalem.

Esra perki pwehki mie loallap tohto pohn ahlo. Aramas suwed kan kak kuliasang arail kohl oh silper oh pil kameirailla. Ihme Esra eri kihpene aramas akan, duen me ke kilang nan kilel wet. Irail eri kapakap oh peki rehn Siohwa pwen pere irail ni arail sapsapal kohlahng Serusalem.

Siohwa ketin wiahdahr met. E pere irail oh mwehrin sounpwong pahieu, irail lel Serusalem oh soahng koaros mwahu. Kaidehn met mehlel me Siohwa kin sinsile oh sewese koaros me liki ih?