Selidi Nan Papilon lel Kaukauwada Sapahl Kehl en Serusalem

Ni ansou me mehn Israel sensel nan Papilon, soahngen kasongosong tohto wiawiong arail pwoson. Sadrak, Mesak oh Apedneko lekidek ong nan kisiniei, ahpw Koht doareirailla. Mwuhri, Papilon lohdi oh mehn Mihd oh Persia uhd kaunda. Daniel pil lekidek ong nan deuen laion, Koht ahpw pil pere ih ni ah kakuhpene auwen laion.

Mwuhri ekis, nanmwahrki Sairus en Persia kamaiouda mehn Israel kan. Irail pwurohdohng sahpwarail sounpahr 70 mwehrin arail kalipalipalahng Papilon. Kisehn mehkan me irail keieu wia ni arail pwurohdohng Serusalem iei tapiada kauwada ihmwen kaudok en Siohwa. Ahpw, imwintihti kan katokiedi arail doadoahk. Ihme sounpahr 22 mwehrin arail pwurohdohng Serusalem me re kaimwisekela ihmwen kaudoko.

Mwuhri, kitail sukuhliki duen ahn Esra sapallahng Serusalem pwen kalinganada ihmwen kaudoko. Met wiawiehr sounpahr 47 mwehrin kaimwisekelahn ihmwen kaudoko. Sounpahr 13 mwehrin Esra lel wasao, Nehemaia sewese kaukauw sapahl kehl en kahnihmwo. Pali LIMAU kin orapene wiewia en sounpahr 152.