Kehl en Serusalem

KILANG doadoahk laud me wiawi wasaht. Mehn Israel kan soupisek kaukauw kehl en Serusalem. Ni ansou me Nanmwahrki Nepukadnesar kawehla Serusalem sounpahr 152 mwowe, e kasehdi kehlo oh isikada wanihmwen kahnihmwo. Mehn Israel kan sohte pwurehng kauwada kehlo ni ansou me re tapin pwurasang Papilon.

Ke lemeleme me aramas ko insenamwahu sounpahr depe re mihmi wasaht sohte kehl en kahnihmwo? Irail mihmi nan keper. Arail imwintihti kan kak kohdo oh peiong irail. Ahpw met ohl menet me adaneki Nehemaia sewese irail en pwurehng kauwada kehlo. Ke ese ihs Nehemaia?

Nehemaia iei emen ohl en Israel me kin mi nan kahnihmwen Susan, wasa me Mordekai oh Esder kousoan ie. Nehemaia doadoahk nan ihmwen nanmwahrkio, ele kompoakpah mwahu en Mordekai oh Lih Nanmwahrki Esder. Ahpw Paipel sohte koasoaia me Nehemaia kin doadoahk ong ahn Esder pwoudo, Nanmwahrki Ahasuerus. E kin doadoahk ong nanmwahrki mwuhrio, me adaneki Nanmwahrki Artaserkses.

Tamataman, pwe Artaserkses iei nanmwahrki mwahu me kihong Esra mwohni laud pwen wahlahng Serusalem oh pwurehng kauwada ihmwen kaudok en Siohwa. Ahpw Esra sohte kauwada kehl me mweredi en kahnihmwo. Kitail pahn kilang duen dahme kahrehda Nehemaia pwurohdo wia doadoahk wet.

Impan sounpahr 13 dower powe sang ansou me Artaserkses kihong Esra mwohni pwen kauwada ihmwen kaudoko. Nehemaia ansouwet wia sounlang dahl keieu ong Nanmwahrki Artaserkses. Met wehwehki me e kin wah ong nanmwahrkio nime wain, oh ih me pahn mwasamwasahn pwe sohte emen en song kihong poisin nan nimen nanmwahrki waino. Met doadoahk kesempwal ehu.

Eri, rahn ehu rien Nehemaia ohl Anani oh ohl teikan sang sahpwen Israel kohdo mwemweit rehn Nehemaia. Irail padahkiong ih duen kahpwal me mehn Israel akan ahniki, oh duen kehl en Serusalem me ohlahr. Met kahreong Nehemaia en pahtou mehlel, oh e kapakap ong Siohwa.

Ehu rahn nanmwahrkio kilang me Nehemaia pahtou, oh e idek: ‘Dahme kahrehda ke mwomwen pahtou?’ Nehemaia sapeng me pwehki Serusalem mi ni irair suwed oh kehl me ohlahr. ‘Dahme ke mwahuki?’ nanmwahrkio idek.

‘Mweidong ie en kohla Serusalem,’ Nehemaia sapeng, ‘pwe I en pwurehng kauwada kehlo.’ Nanmwahrki Artaserkses me inenen kadek. Ih eri inda me Nehemaia kak kohla, oh pil sewese ih alehda tuhke mehn wia kaukauw. Mwehrin Nehemaia leldo Serusalem, e padahkiong aramas kan duen ah pilahn. Irail koaros pwungki, oh inda: ‘Kitail pahn tapiada kauwada.’

Ni ansou me imwintihti en mehn Israel kan kilang duen kaukauwadahn kehlo, irail eri inda: ‘Kitail pahn kameirailla, oh katokiedi doadoahk en kaukauw.’ Ahpw Nehemaia rong duen met, oh kihong tohndoadoahk kan kedlas oh mehn dok kan. Oh indaiong irail: ‘Kumwail dehr masak atail imwintihti kan. Pei ki riomwail kan, noumwail seri kan, omwail pwoud kan, oh omwail wasahn kousoan.’

Aramas kan me inenen kommwad. Irail kin kauonopada arail dipwisou en mahwin ni rahn oh ni pwong, oh irail kaukaule wia doadoahk en kaukauw. Eri mwehrin rahn 52 kehlo imwisekela. Met aramas kan insenamwahulahr nan kahnihmwo. Nehemaia oh Esra padahkiong aramas kan duen kosonned en Koht, oh kahrehda aramas kan peren.

Ahpw soahng koaros sohlahr duwehte mahso, mwohn mehn Israel kan sella Papilon. Aramas kan koaros ansouwet mihmi pahn kaunda en nanmwahrki en Persia oh uhpaiong ih. Ahpw Siohwa inoukihdi me e pahn poronehdo emen nanmwahrki kapw, oh nanmwahrki menet pahn wahdo meleilei ong aramas kan. Ihs me nanmwahrki menet? Iaduen e pahn wahdo meleilei ong sampah? Impan sounpahr 450 dower powe mwohn kawehwehpen met pil pwurehng kohda. Eri mie ipwidi en seri men me keieu kesempwal. Ahpw met iei poadoapoad tohrohr me kitail pahn pil tehk.