Dihd en Serusalem

Kitail medewehla mahs sounpar kei mwowe. Nehmaia, ladun Nanmwarki Ardaserksihs, wia mehn Israel men me kin mihmi nan Susa, kahnimw ehu nan Persia. Rien Nehmaia pwutak wahdo rohng suwed sang Suda: ‘Aramas ako me pwuralahng Serusalem mihmi nan keper. Dihd en kahnimwo oh ewen kehl kan me mehn Papilon kan kauwehla saikinte pwurehng wiawihda.’ Nehmaia nsensuwedkihla. E men kohla Serusalem pwehn sawas, ih eri kapakapki me nanmwarkio pahn kak mweidohng ih en kohla.

Mwuhr, nanmwarkio tehkada me Nehmaia mwomwen mesen nsensuwed. Ih eri nda: ‘Saikinte pak ehu me I kilang me ke mwomwen nsensuwed. Dahme sapwung?’ Nehmaia eri nda: ‘Dahme I sohte pahn mwomwen nsensuwedki, ni ei kahnimw Serusalem, eh saikinte wiawihda?’ Nanmwarkio eri idek: ‘Dahme ke men ien wiahiong uhk?’ Ni ahnsowohte, Nehmaia kapakap ni soh ngile. Ih eri nda: ‘Menlau mweidohng ie ien kohla Serusalem pwe ien pwurehng wiahda dihdo.’ Nanmwarki Ardaserksihs ndaiong Nehmaia me e kak kohla, oh nanmwarkio eri koasoanehdi me sohte mehkot keper pahn wiawihong ih nan eh seiloak reireio. E pil wiahiong Nehmaia en wiahla kepina en Suda oh kihong ih tuhke kan mehn wiahda ewen kelen kahnimwo.

Ni ahnsou me Nehmaia lella Serusalem, e tehk mwomwen dihd en kahnimwo. Ih eri kapokonepene samworo kan oh kaun akan oh ndaiong irail: ‘Met uhdahn sakanakan. Kitail anahne tepida doadoahk.’ Aramas ako eri pwungkipene oh tepida pwurehng wiahda dihdo.

Ahpw ekei imwintihti en mehn Israel kan kin kapailoke irail oh nda: ‘Kidien wel men kak kesehdi dihd me kumwail wiewiahn.’ Tohndoadoahk ko kin pohnsehsehlahte kapailok kan oh pousehlahte arail doadoahko. Dihdo eri wie ileilehla oh kekehlailla.

Arail imwintihti ko eri pilahnehda ren kohsang soangsoangen wasa kan oh mahweniong Serusalem ni soh kasikpe. Ni ahnsou me mehn Suhs ko rongada duwen met, irail masepwehkada. Ahpw Nehmaia nda: ‘Kumwail dehr masepwehk. Pwe Siohwa ketin ieiang kitail.’ Ih eri kihdiong sounsilasil kan pwehn pere tohndoadoahk ko, oh imwintihti kan sohte kak mahweniong irail.

Mwurinte rahn 52, dihdo oh ewen kehl ko imwisekla. Nehmaia eri kapokonepene mehn Lipai ko koaros nan Serusalem pwehn wia kasarawi. E koasoneiraildi ni pwihnen koul riau. Irail eri doudahla pohn kehndake me mi ni Ewen Kelen Pwarero oh alupeseng pidakih kahnimwo. Irail eri kesekesengki sowi, simpal oh arp oh kokoul ong Siohwa. Esra iang ehu pwihn, oh Nehmaia iang pil ehu pwihn lao irail tuhpene ni tehnpas sarawio. Aramas ako koaros, ohl, lih oh seri kan, eri kihda arail mehn meirong kan ong Siohwa oh iang kasarawio. Ngilen arail pereperen lella wasa doh.