“Omw Mwahu en Powehdi me Suwed”

“Dehr mweidohng me suwed en poweiukedi, ahpw omw mwahu en powehdi me suwed.”—ROM 12:21.

1. Dahme kahrehda kitail kak kamehlele me kitail kak powehdi me suwed?

KITAIL kak kesihnenda teng pwehn pelian irail kan me kin uhwong laud kaudok mehlel? Kitail kak kalowehdi mwekid kehlail kan me pahn kahrehiong kitail en pwuralahng sampah me kin pohnsehse Koht? Pasapeng en peidek pwukat iei ei! Dahme kahrehda kitail ndahki met? Pwehki e pid dahme Pohl koasoia nan nah kisinlikou ong mehn Rom kan. E ntingihdi: “Dehr mweidohng me suwed en poweiukedi, ahpw omw mwahu en powehdi me suwed.” (Rom 12:21) Ma kitail kin koapworopworki Siohwa oh koasoanehdi teng en dehr mweidohng sampah wet en powehdi kitail, eh suwed sohte pahn powehdi kitail. Oh pil madamadau me koasoia “en powehdi me suwed” kasalehda me kitail kak kalowehdi suwed ma kitail kin nantihong atail pali ngehn en kehlail pelianda suwed. Ihte irail kan me sohlahr tetehk kanaiehng oh sohla kin nantihong peik me pahn lohdi pahn sampah wet oh eh kaun suwedo, Sehdan me Tepil.—1 Sohn 5:19.

2. Dahme kahrehda kitail en tehkpene duwen mwekid kan me wiawi nan mour en Nehmaia?

² Sounpar 500 kei mohn en Pohl ahnsou, sapwellimen Koht ladu men me kin koukousoan nan Serusalem kasalehda mehlelpen mahsen en Pohl me pid duwen pelianda suwed. Sapwellimen Koht ohl menet Nehmaia, kaidehn e kin ihte kesihnenda teng pelian uhwong kan sang aramas akan me kin pohnsehse koht, ahpw e pil powehkihdi suwed ki me mwahu. Soangen kahpwal dahkei me e lelong? Dahme kin kahrehong ih en pweida? Iaduwen kitail kak alasang eh mehn kahlemeng kan? Pwehn sapengla peidek pwukat, kitail en tehkpene duwen mwekid kan me wiawi nan mour en Nehmaia.a

3. Nan soangen irair dahieu Nehmaia kin momourki, oh soangen pweidahn doadoahk mwahu dahieu me e wiahda?

³ Nehmaia kin papah nan tehnpas en Nanmwarki Ardaserksihs en Persia. Mendahki Nehmaia kin koukousoan nanpwungen irail kan me kaidehn tohnkaudok mehlel, e sohte kin “kahlemengih wiewia kan en sampah” en ahnsowo. (Rom 12:2) Ni ahnsou me anahn ehu pwarada nan Suda, e tounmeteikihla eh mour nsenamwahu, wia seiloak apwal kohlahng Serusalem oh alehda pwukoa laud ehu en onehda sapahl kelen kahnimwo. (Rom 12:1) Edetehn e wia kepina en Serusalem, rahn koaros e kin iang kiseh mehn Israel kan doadoahk “sang nimenseng lel ahnsou me usu kan kin pwarada nanleng.” Met imwikihla doadoahko en nekla mwurinte sounpwong riau! (Nehmaia 4:21; 6:15) Pweidahn doadoahk mwahu wet me inenen kapwuriamwei, pwehki erein ahnsou en kokoupen kehlo, mehn Israel akan lelong soangsoangen kahpwal akan. Ihs irail pwukat me kin uhwong Nehmaia oh ia arail mehn akadei?

4. Dahme irail akan me kin uhwong Nehmaia men wia?

⁴ Irail me kin keieu uhwongada iei Sanpalad, Dopaia oh Kesem ohl lapalap akan me koukousoan karanih Suda. Pwehki re wia imwintihti en sapwellimen Koht aramas, “rongada me [Nehmaia] kodohn doadoahkohng ni kamwahupen mehn Israel kan. Ira eri nsensuwedkihla kowahlap.” (Nehmaia 2:10, 19) En Nehmaia imwintihti kan koasoanehdier ren katokehdi en Nehmaia pilahn en onehda sapahl, me kin pil iangahki tiahk en widing kan. Nehmaia pahn kak en ‘mweidala me suwed en powehdi ih’?

“Lingeringerda Kowahlap”

5, 6. (a) Iaduwen imwintihti en Nehmaia kan mwekidki duwen doadoahk en onohnsapahlo? (b) Dahme kahrehda Nehmaia sohte kin masakada irail me kin uhwong ih?

⁵ Nehmaia kin nantihong kangoangehki nah aramas akan: “Kitail onehda sapahl kelen kahnimw wet.” Irail sapeng nda: “Nna, kitail tepida wia doadoahk en onohnsapahlo.” Nehmaia koasoi met: “Irail eri kaunopada pwe re en tapihada doadoahko,” ahpw me kin uhwong kan “rongada dahme se wiewiao, re kouruhrkin kiht oh kapailokei kiht. Re nda, ‘Dahme kumwail wiewia? Kumwail men uhwong nanmwarki lapalapo?’” Nehmaia sohte masepwehngkihda arail kapailok oh karaun likamw akan. E ndaiong soun uhwong ko: “Koht en Nanleng pahn ketin kupwurei kiht. Kiht me sapwellime ladu, oh se pahn tapihadahr doadoahk en onohnsapahlet.” (Nehmaia 2:17-20) Nehmaia koasoanehdier teng en wonoweite mwowe wia “doadoahko.”

⁶ Emen soun uhwong ko, Sanpalad eri “lingeringerda kowahlap” oh tepihada kalaudehla eh kepitki irail ketihtihki: “Dahme mehn Suhs paisuwed pwukan lemeleme re en wia? Pala re kakete wiahda ihmw takai sang ni koasoakoasoak en ihmw me wialahr pehs?” Eri, Dopaia pil ketihtihki: “Soangen kehl dah me re kak wiahda? Pwe kidi en wel tehmen kak karangkepeseng!” (Nehmaia 4:1-3) Iaduwen en Nehmaia mwekidki duwen met?

7. Ni ahl dah kei Nehmaia kin mwekidki duwen karaun likamw akan en soun uhwong kan?

⁷ Nehmaia kin pohnsehsehla arail kapailok kan. E kin idawehnte sapwellimen Koht pahngok kan oh sohte rapahki en dupungki me suwed. (Lipai 19:18) Ahpw dahme e wia, iei en pwilikihdi soahng koaros nin limen Siohwa oh kapakap: “Maing Koht, komw ketin mahsanih duwen ar kaukauwei kiht. Ar lokaia kepweikeng kan en kohdiong pohn moangarail kan.” (Nehmaia 4:4) Nehmaia kin koapworopworki sapwellimen Siohwa inou: “KAUN-O pahn ketin ikih oh kaloke irail.” (Deuderonomi 32:35) Kapatahiong met, Nehmaia oh nah aramas akan “usehlahte kokoupen kelen kahnimwo.” Re sohte kin mweidohng mehkot en kerempwa irail. Ni mehlelo, “e mwadang en leldalahng nan lukope, pwehki aramas akan ar pwahtiet en doadoahk.” (Nehmaia 4:6) Imwintihti en kaudok mehlel kan sohte pweida en katokehdi doadoahk en koupen kehlo! Iaduwen kitail kak alasang Nehmaia?

8. (a) Iaduwen kitail pahn ele alasang Nehmaia ni ahnsou me soun uhwong kan kin karaun likamwih kitail? (b) Koasoia duwen ehu ekspiriens me ke ahneki de rong me kasalehda erpit en sohte dupukohng me suwed.

⁸ Rahn pwukat, soun uhwong kan nan wasahn sukuhl, wasahn doadoahk de pil atail wasahn kousoan ele kak katepwekehdi kitail ki lokaia kepweikeng oh karaun kan. Ahpw pak tohto soangen karaun likamw pwukat pahn keieu mwahu en kadoadoahki mouren kaweid en Pwuhk Sarawi wet: Mie “ahnsoun nennenla.” (Eklesiasdes 3:1, 7) Pwehn duwehte Nehmaia, kitail en irehsang kitail en dehr dupungki lokaia kepweikeng kan. (Rom 12:17) Kitail en sohpeiong Koht ni kapakap, koapworopworki ih me kin kamehlelehiong kitail: “Ngehi me pahn dupuk.” (Rom 12:19; 1 Piter 2:19, 20) Ni ahl wet, kitail sohte kin mweidohng me kin uhwong kan en kahrehsang kitail nan doadoahk en pali ngehn wet me anahne en pweida rahnwet—iei doadoahk en kalohki Wehin Koht oh katohnpadahk. (Madiu 24:14; 28:19, 20) Ehu ehu ahnsou kitail kin towehda doadoahk en kalohk oh sohte mweidohng uhwong kan en kauhdi kitail, met kin kasalehda soangen pwosonohte me Nehmaia kin kasalehda.

‘Se Pahn Uhdahn Keme Kumwailla’

9. Soangen mwohmw en uhwong dahieu en Nehmaia imwintihti kan tapihada oh iaduwen Nehmaia mwekidki met?

⁹ Ni ahnsou me soun uhwong kaudok mehlel en mwehin Nehmaia ko rongada duwen ar “usehlahte doadoahk en onehda sapahl kelen kahnimw en Serusalem,” irail eri wahda arail kedlahs kan pwehn “kodohn mahweniong Serusalem.” E mwomwen me mehn Suhs kan sohte arail koapworopwor. Mie mehn Sameria kan me mihmi ni paliepeng en wasao, mehn Ammon kan ni palimese, mehn Arepia kan ni palieir oh mehn Asdod kan ni palikapi. Irail kapilpene Serusalem oh mwomwen salihpene soun koupen kehl ko! Dahme re kak wia? Nehmaia koasoia: “Se patohwan sohpeiong at Koht oh wia at kapakap.” Imwintihti kan song en kamasak irail ndahda: “Se pahn uhdahn keme kumwailla oh katokihedi amwail doadoahk.” Nehmaia sapengki met ni eh kihong soun koupen kehl ko pwukoahn sinsile kahnimwo ki nehrail “kedlahs, ketieu oh kesik ketieu” kan. Mehlel, ong dahme aramas men pahn medewehki met, kisin pwihn en mehn Suhs kan sohte pahn kak kalowehdi pwihn en imwintihti kehlail ehu, ahpw Nehmaia kangoangehki irail: “Kumwail dehpa masak . . . Kumwail tamanda duwen roson oh lemmwin Kaun-o.”—Nehmaia 4:7-9, 11, 13, 14, New World Translation.

10. (a) Dahme kahrehda en Nehmaia imwintihti kan ar mwekid mwadangete wekidekla? (b) Soangen koasoandi dahkei Nehmaia wiahda?

¹⁰ Eri mwekid kan mwadangete wekidekla. Imwintihti kan kauhdi arail koasoandi en mahwen. Pwekida? Nehmaia ripohtki: “Koht eh ketin kapingada arail koasoandi kan.” Mendahki met, Nehmaia ese me imwintihti kan kak wiahte keper ong irail. Ihme kahrehda, ni erpit e koasoanehdi mwahu wiepen doadoahk en emenemen soun koupen kehlo. Sang ahnsowo kohla, “irail ko me kin weuwaseli dipwisoun doadoahk en kehlo, pil kin wie doadoahk weuwa tehtehn mahwen ni apali pehrail.” Nehmaia pil kihong emen ohl en wia pwukoa en “sounpeuk sowi” pwehn kaunopada soun koupen kehlo ma imwintihti kan pahn kodohn mahwen. Keieu kesempwal sang koaros, Nehmaia kin kangoangehki irail aramas ko: “Atail Koht pahn ketin mahwenkin kitail.” (Nehmaia 4:15-20) Kakehlahda oh kaunopadahn mahwen, soun koupen kehlo eri usehlahte wia arail doadoahk. Soangen mehn kasukuhl dahkei kitail kak sukuhlikihsang koasoi wet?

11. Dahme kak kahrehiong Kristian mehlel kan en powehdi suwed kan nan sahpw kan me kin keinepwih doadoahk en Wehio, oh iaduwen arail wiewia mwahu kan kin powehdi suwed kan?

¹¹ Mie ahnsou kan me Kristian mehlel kan kin lelong uhwong lemei kan. Ni mehlel, nan ekei sahpw kan soun uhwong lemei kan en kaudok mehlel kin wiahda pwihn en imwintihti kehlail ehu. Aramas pahn kak ndahki me iengetail sounkaudok mehlel kan nan sahpw ako sohte kak ekis powehdi irail. Mendahki met, irail Sounkadehde kan kin koapworopworki me ‘Koht pahn ketin mahwenkin irail.’ Met kin mehlel ong irail kan me kin lelong kalokolok pwehki dahme re kin kamehlele, irail kin kalap kehn en Siohwa kin sapeng arail kapakap oh ‘ketin kapingada arail koasoandi’ en imwintihti kehlail kan. Pil nan sahpw akan me keinepwih doadoahk en Wehio, Kristian kan kin rapahkihda ahl akan en usehlahte wia doadoahk en kalohki rongamwahuo. Duwehte soun koupen kehlo nan Serusalem ar kin wekidala oh koasoanehdi pwung wiepen ar doadoahk kan, eri pil Sounkadehdehn Siohwa kan rahnwet kin ni erpit wekidala oh koasoanehdi pwung wiepen arail doadoahk en kalohk ma irail mihla pahn kalokolok kan. Uhdahn re pahn irehdi irail en dehr doadoahngki tehtehn pei kan. (2 Korint 10:4) Mendahki soangen kalokolok me kak kauwehla paliwararail, met sohte pahn kauhdi arail doadoahk en kalohk. (1 Piter 4:16) Ni pali teio, irail brother oh sister eimah kan kin kasalehda arail “mwahu en powehdi me suwed.”

“Kohdo Kitail en Tuhpene”

12, 13. (a) Soangen koasoandi widing dahieu me soun uhwong kan en Nehmaia kin doadoahngki? (b) Dahme kahrehda Nehmaia soikala luhko en tuhwong irail me kin uhwong ih?

¹² Mwurin en Nehmaia imwintihti kan esehda me arail mwekid en mahwen sohte pweida, irail eri sohpeilahng en wia ekei mwekid en uhwong me sohte pahn mwomwen sansal. Ni mehlel, irail wiahda soangen mwekid en widing siluh. Ia kan mwekid pwukat?

¹³ Keieu, en Nehmaia imwintihti kan kin song en widingehdi ih. Irail ndaiong ih: “Ki pekipek me se wia, kohdo kitail en tuhpene nan ehu kousapw ako nan patapat en Ono.” Ono kin mihmi nanpwungen Serusalem oh Sameria. Eri imwintihti ko kin song en kosonnehdi pwe Nehmaia en kohla nan werengen kahnihmw riauo pwe irail en kak tuhpene oh kapwungala ire kan me re sohte wehwepene. Mwein Nehmaia kak en medemedewe met: ‘Met pahn mwekid loalokong ehu. E pahn mwahu ma se lokaiapene ahpw kaidehn en peipene.’ Ahpw Nehmaia sohte men wia met. E kawehwehda kahrepen met: “Met iei ehu arail widing pwe re en song kauweiehla.” E dehdehki arail mwekid en widing oh sohte men dukila pah. Pak pahieu e ndaiong eh imwintihti kan: “I wiewia doadoahk kesempwal ehu oh I sohte kak patohdihwei wasao. Dahme kahrehda I en kapweiekidi doadoahk wet pwe I en patohwei rehmwail?” En imwintihti ko arail songosong en kahrehiong Nehmaia en pwungkihla arail koasoandi sohte pweida. E kin tengediong en kilangwohngete doadoahk en kokoupen kehlo.—Nehmaia 6:1-4, NW.

14. Iaduwen en Nehmaia mwekidki ong irail me kin wiahda karaun likamw ong ih?

¹⁴ Keriau, en Nehmaia imwintihti kan uhd tepiada lohkiseli likamw akan, karaunih Nehmaia dene e kin songosong en pelianda Nanmwarki Ardaserksihs. Re pil pwurehng ndaiong Nehmaia: “I peki kita en tuhpene oh koasoia ire wet.” Nehmaia pil pwurehng soikala arail pekipek, pwehki e dehdehki en imwintihti kan arail koasoandi. Nehmaia kawehwehda: “Re songosong re en kamasak kiht pwehn kapweiekidi doadoahk wet.” Ahpw ahnsouwet Nehmaia kapwungala en imwintihti kan ar karaun likamw ni eh koasoia: “Soahng koaros me komwi mahsanih sohte mehlel. Pein komwi me wiahda koasoi pwukat.” E pil sohpeilahng Siohwa ni kapakap oh peki sawas reh koasoia: “Maing Koht, komwi ketin kakehleiehda met.” E kin koapworopworki me sapwellimen Siohwa sawas pahn kahrehiong ih en kak kauhdi pilahn en widing wet oh doadoahk en kokoupen kehlo pahn kak pousehla wiawi.—Nehmaia 6:5-9.

15. Soangen kaweid dahieu me soukohp likamw men wiahda oh dahme kahrehda Nehmaia sohte alehda kaweido?

¹⁵ Kesiluh, en Nehmaia imwintihti kan doadoahngki soun pangala men, mehn Israel Semaia pwehn kahrehiong Nehmaia en kauwehla Kosonned en Koht. Semaia koasoiaiong Nehmaia: “Kita kohla rukula nan Wasa Sarawio nan Tehnpas Sarawio oh loakehdi wenihmw ko, pwe re pahn kohdo kemeikomwihla.” Semaia ndaiong Nehmaia me e mih nan keper en kamakamla, ahpw e pahn kak doarehla eh mour ma e rukula nan tehnpas sarawio. Ahpw Nehmaia kaidehn samworo men. E pahn wiahda dihp ni e pahn rukula nan tehnpas en Koht. E kak en kauwehla Kosonned en Koht pwehn kak doarehla eh mour? Kahrehda Nehmaia sapeng koasoia: “Dah, komwi medemedewe me I pahn doarehla ei mour ni ei pahn rukula nan Tehnpas Sarawio? I sohte pahn wia met.” Dahme kahrehda Nehmaia sohte pwupwudi ong lidip me wiawihda ong ih? Pwehki e wehwehkihda me Semaia, edetehn ih emen mehn Israel “Koht sohte ketin mahseniong Semaia.” Ni mehlelo, soukohp mehlel men sohte kak kaweidih ih en kauwehla Kosonned en Koht. Pil pwurehng, Nehmaia sohte mweidohng soun uhwong suwed kan en powehdi ih. Ahnsou mwotomwot kis mwurin mwo, e kak ripohtki: “Mwurin rahn limeisek riau en doadoahko, kehlo pwon ahpw imwisekla ni karieisek limaun sounpwong en Elul.”—Nehmaia 6:10-15; Nempe 1:51; 18:7.

16. (a) Iaduwen kitail anahne en wiahiong pirien likamw kan, soun karaun likamw oh ong irail me mwomwehda wia riatail ni pali ngehn? (b) Iaduwen ahmw pahn kasalehda ahmw sohte men wekidala dahme ke kin kamehlele nan ahmw wasahn kousoan, wasahn sukuhl oh wasahn doadoahk?

¹⁶ Duwehte Nehmaia, ele kitail pil kin lelohng soun uhwong kan me mwomwen pirien likamw kei, soun karaun likamw kan oh pil irail me kin mwomwehdahte wia riatail ni pali ngehn ahpw sohte kin mehlel. Meteikan ele kin luhke kitail pwe kitail en kak tuhpene oh pwungkihkihpene ni madamadau. Ele irail kin song en kahrehiong kitail en kamehlele pwe ma kitail katikala atail ngoang en papah Siohwa kitail pil kak rapahki mehn akadei kan en sampah ahnsowohte. Ahpw pwehki kitail kin mwohneki sapwellimen Koht Wehio kitail sohte men pwungki irail madamadau. (Madiu 6:33; Luk 9:57-62) Soun uhwong kan kin pil lohkiseli mehn karaun likamw me pid kitail. Nan ekei sahpw kan, kitail kin ale karaun me dene kitail kak en wia aramas keper kei ong sahpwo, duwehte en Nehmaia pil alehdi karaun me dene e kin pelian Nanmwarkio. Ekei karaun likamw pwukat kin pweida ni ar repen pwung en likamw ko oh kapwungpwungla nan mwoalen kopwung kan. Ahpw mendahki dahme kin pweida ong en emenemen irail, kitail kin kak koapworopworki en kapakap pwe Siohwa pahn ketin kaweidih irair kan en kak pwung ong kupwure. (Pilipai 1:7) Uhwong kan ele kak kohsang irail me kin mwomwehda papah Siohwa. Duwehte ienge mehn Suhs kan me song en kahrehiong Nehmaia en kauwehla Kosonned en Koht pwehn doarehla moure, eri pil duwehte irail me mahs wia Sounkadehde kei oh uhd kin lahlahwe kaudok mehlel ar kin song ni ahl koaros en kahrehiong kitail en pwungkihla irail. Ahpw kitail kin sohpeisang irail me kin lahlahwe kaudok mehlel pwehki kitail ese me atail mour kin poadoandoarla kaidehn pwehki kitail kin kauwehla Kosonned en Koht ahpw atail kin kolokolete! (1 Sohn 4:1) Ei, ki sapwellimen Siohwa sawas kitail kak powehdi soangen suwed soh lipilipil kan.

Kalohkiseli Rongamwahu Edetehn Atail Lelong me Suwed kan

17, 18. (a) Dahme Sehdan oh nah kan kin nantihong en kapwaiada? (b) Dahme ke koasoanehdier teng en wia oh pwekida?

¹⁷ Sapwellimen Koht Mahsen padahkiong kitail me pid rien Krais me keidi kan: “Riatail ko kalowedier [Sehdan] sang . . . ni me mehlelo me re kadehdehier.” (Kaudiahl 12:11) Kahrehda mie dokpene ehu nanpwungen Sehdan—utupen suwed koaros—oh kalohki mahsen en Wehio. Ih kahrepen Sehdan sohte kak uhdihsang mahweniong luwen me keidi kan oh pil “pokon kalaimwun” ni eh kin kahrehda uhwong kan!—Kaudiahl 7:9, NW; 12:17.

¹⁸ Ni atail wehwehkier, uhwong kan ele kak pwarada ni mwomwen lokaiahn kepweikeng kan de kalokolok kan me wuk de mwomw teikan me sohte kin sansal. Nan irair sohte lipilipil, en Sehdan mehn akadei kin duduwehte—en kauhdi doadoahk en kalohk. Ahpw e sohte pahn pweida pwehki sang ni kahlemeng en Nehmaia en mahs, sapwellimen Koht aramas akan koasoanehdier teng pwe arail “mwahu en powehdi me suwed.” Irail pahn wia met sang ni arail sohte uhdihsang kalohki rongamwahwo lao lel ahnsou me Siohwa pahn mahsanih me doadoahko nekier!—Mark 13:10; Rom 8:31; Pilipai 1:27, 28.

[Nting tikitik me mi pah]

Ke Tamataman?

• Mehnia uhwong me sapwellimen Koht ladu kan en mahs kin lelong oh pil Kristian en rahn pwukat?

• Mehn akadei dahieu imwintihti en Nehmaia kan ahneki oh mehn akadei dahieu sapwellimen Koht imwintihti kan ahneki?

• Ia duwen kitail en usehlahte atail mwahu en powehdi me suwed nan rahn pwukat?

[Kawehwehpen kilel kan nan ehu ehu pali 10]

Mehn Kasukuhl kan Dierek nan Pwuhken Nehmaia

Sapwellimen Koht ladu kan kin lelong

• kapailok

• mehn kamasak

• tiahk en widing

Me kin doadoahngki widing

• pirien likamw kan

• soun karaun likamw kan

• me mwomwehda wia riatail ni pali ngehn

Sapwellimen Koht ladu kan kin powehdi suwed sang ni arail kin

• tengediong wia arail pwais me Koht ketikihong irail

[Kawehwehpen kilel kan nan ehu ehu pali 9]

Nehmaia oh ienge soun doadoahk kan onehda sapahl kehl en Serusalem edetehn arail lelong uhwong kehlail kan

[Kawehwehpen kilel kan nan ehu ehu pali 11]

Kristian Mehlel kan sohte kin masak kalohki rongamwahuo