Sohn Pepdaisiehla Sises

KILANG mwuroio kohkohdihdo pohn mwoahngen ohlo. Ohlo iei Sises. Met e mahkiehr sounpahr 30. Ohlo me mi reh iei Sohn. Kitail ekis sukuhlikiehr duen menet. Ke tamataman ansou me Meri kohla pwen mwemweit rehn kiseh Elisaped, oh seri nan kapehden Elisaped luski peren? Seri me mi nan kapehdo iei Sohn. Ahpw dahme Sohn oh Sises wiewia met?

Sohn ahpwtehn kaduhdi Sises nan pilen Pillap Sordan. Ihduen wiapen emen e pahn pepdais. Keieu, e kaduhdi ih pahn pihl, oh kapwarehda ih sang pihl. Pwehki ihme Sohn kin wiaiong aramas akan, ihme kahrehda e adaneki Sohn Sounpepdais. Ahpw dahme kahrehda Sohn pepdaisih Sises?

Sohn wia met pwehki Sises kohdo oh peki rehn Sohn en pepdaisiehla ih. Sohn pepdaisih aramas kan me men kasansalehda me irail koluhkihla arail wiewia suwed. Ahpw Sises wia mehkot suwed me e pahn poakekihla? Soh, Sises sohte wiahda mehkot suwed, pwehki ih sapwellimen Koht Ohl sang nanleng. E peki rehn Sohn en pepdaisiehla ih ong ehu kahrepe tohrohr. Kitail pahn kilang kahrepe da ehu met.

Mwohn Sises pwaradohng Sohn, e kin wia kahpente men. Kahpente iei emen me kin wiahda soahng kan sang tuhke, duwehte tehpel oh sehr oh mehn mwomwohd. Ahn Meri pwoud Sosep iei emen kahpente, oh e padahkiong Sises en pil duwehte. Ahpw Siohwa sohte poronehdo sapwellime Ohl sampah pwen wia emen kahpente. Mie doadoahk tohrohr ehu me e ketido pwen wia, oh ansou lelehr me Sises en tapiada wia met. Eri pwen kasansalehda me met e pwarado pwen wia kupwuren Seme, Sises peki Sohn en pepdaisiehla ih. Koht perenki met?

Ei, e perenki, pwehki mwehrin Sises pwarado sang nan pihlo, ngihl ehu sang nanleng mahsanih: ‘Iet nai Ohl kompoake, me I kin perenkihda.’ Pil, nanleng likamwete ritida oh mahn men mwomwen mwuroi tih pohn Sises. Ahpw met kaidehn uhdahn mwuroi men. Ihte mwohmw ehu. Ni mehlel met ngehn sarawi en Koht.

Mie soahng tohto me Sises anahne medemedewe, ihme kahrehda e kohla wasakis kelehpwla erein rahn 40. Wasao Sehdan kohdo reh. Pak siluh Sehdan song en kahreong Sises en wia mehkot me pahn uhweng kosonned kan en Koht. Ahpw Sises sohte duhkiong.

Mwuhri, Sises pwurohdo oh tuhong ohl kei me wiahla keieun ah werek kan, de tohnpadahk kan. Ekei eden ohl pwuko iei Andru, Piter (me pil adaneki Saimon), Pilip oh Nadanael (me pil adaneki Pardolomiu). Sises oh nah tohnpadahk kapw pwukat kohieila sahpwen Kalilih. Nan Kalilih re sop Kana nan ahn Nadanael wasa. Wasao Sises iang ehu kamadihpw en kapwopwoud oh wiahda keieun manaman. Ke ese dahkot mwo? E wekidala pihl ong wain.