Sises Kamwakelehda Ihmwen Kaudok

SISES uhdahn mwakar wasaht, kaidehn? Ke ese dahme kahrehda e mwakarada? Pwehki aramas pwukat nan ihmwen kaudok en Koht nan Serusalem me noarok kowahlap. Re men wiahda mwohni tohto sang aramas kan me kohdohng kaudok ong Koht wasao.

Ke kak kilang kou pwul oh sihpw oh mwuroi kan? Eri, aramas kan kin netiki mahn pwukat nan ihmwen kaudoko. Ke ese dahme kahrehda? Pwehki mehn Israel kan anahne mahn pwukat pwe ren meirongkiong Koht.

Kosonned en Koht mahsanih me ni ansou me mehn Israel men wiahda sapwung, e anahne en wia meirong. Ahpw iawasa me mehn Israel men kak ale menpihr oh mahn alu pwen meirongkiong Koht?

Ekei mehn Israel kan mie neirail menpihr oh mahn alu. Eri irail kak meirongki mehpwukat. Ahpw mehn Israel tohto sohte neirail menpihr de mahn. Pil mie ekei me kohsang wasa doh likin Serusalem me pahn apwal en wahdohng ihmwen kaudok neirail mahn akan. Ihme aramas pwukat kohdo wasaht oh pwainda mahn de menpihr kan me re anahne. Ahpw ohl pwukat me netiki mahn kan kin kalaudehla pwainen mahn oko. Re kin piti aramas akan. Pil ehu, re sohte pahn netiki mahn pwukat nan ihmwen kaudok en Koht.

Met me kahrehda Sises mwakarkihda. Ih eri wukidi tehpel en mwohni kan oh mwohni kan mwerpesang. E pil alehda mehn woakwoak me wiawikihda sahl oh kauswei mahn akan sang nan ihmwen kaudoko. E mahsanih ong aramas kan me netiki mwuroi: ‘Wahwei mehpwukat sang wasaht! Kumwail dehr wiahkihla ihmwen Semei wasahn wia mwohni.’

Ekei werek kan en Sises ieiang ih nan ihmwen kaudok nan Serusalem. Irail inenen pwuriamweikihla me Sises wiahdahr. Irail ahpw tamanda me nan Paipel mie wasa me ketihtiki duen sapwellimen Koht Ohl: ‘Limpoak ong tehnpas en Koht pahn kaluliehda duwehte kisiniei.’

Ni en Sises mihmi Serusalem pwen iang Passa, e wiahda manaman tohto. Mwuhri, Sises mweselwei sang Sudia oh tapiada sapalla Kalilih. Ahpw ni ah kohkohwei, e keid kohieila nan wehin Samaria. Kitail pahn kilang dahme wiawi wasao.