Sapwadek Sang Imweteng

KILANG tohnlengo langada wanihmwen imweteng. Ohl ko me e sapwadasang nan imweteng iei wahnpoaron kan en Sises. Kitail pahn kilang dahme kahrehda irail kohwong nan imweteng.

Ansou mwotomwot mwehrin ngehn sarawi wudekidi pohn tohnpadahk kan en Sises. Oh iet me wiawi: Piter oh Sohn kohla nan ihmwen kaudok en Serusalem ehu mwehrin souwas. Wasao, limwahn wanihmwo, emen ohl me mwoatoar erein ah mour mwomwohd. Aramas kan kin wahdo ih wasao rahn koaros ih en kak peki mwohni sang irail kan me kohdohng kaudok nan ihmwen kaudoko. Ni ansou me e kilang Piter oh Sohn, ih eri peki rehra en kihong ih mehkot. Dahme wahnpoaron ko wia?

Ira uhdi oh kilang ohl pai suwedo. ‘Sohte nai mwohni,’ Piter inda, ‘ahpw I pahn kihong uhk mehkot me I ahniki. Ni mwaren Sises, uhda oh alu!’ Piter eri koledi peh, oh ansouohte e lusda oh tapiada alialu. Ni ansou me aramas kan kilang met, irail pwuriamweikihla oh perenda pwehki manaman kasehlel wet.

‘Ki manaman en Koht, me kaiasada Sises sang mehla, ihme se wiahki manaman wet,’ Piter indahda. Ni ansou me ih oh Sohn wia koasokoasoai, ekei kaun en lamalam kan kohieido. Irail mwakarada pwehki Piter oh Sohn kin padapadahkiong aramas kan duen Sises oh ah kaiasada sang mehla. Irail eri parokirahdi oh pwilikihdi ira nan imweteng.

Mahnda en rahno kaun en lamalam akan pokonpene oh wia ehu mihting. Piter oh Sohn, iangahki ohlo me re kakehleda, wisikdo. ‘Ki manaman da me kumwa wia manaman wet?’ kaun en lamalam kan idek rehra.

Piter padahkiong irail me re wiahda met ki manaman en Koht, me kaiasada Sises sang mehla. Samworo ko sohte ese dahme re pahn wia, pwe re sohte kak en kamwamwki me wiewiao manaman ehu me wiawi. Irail eri panawih wahnpoaron ko en dehpa pwurehng koasoaia duen Sises, oh mweidirahla.

Ahpw rahn koaros re sohte kin uhdi sang padapadahki duen Sises oh kamwahuiahla me soumwahu kan. Rohng en met eri lelahng wasa koaros. Ihme pokono eri kohdo sang kahnihmw kan limwahn Serusalem oh wahdo me soumwahu kan pwe wahnpoaron kan en kamwahuiahla. Met kahreong kaun en lamalam akan en luwak, irail eri parokedi wahnpoaron ko oh kaseiraildi nan imweteng. Ahpw re sohte mi wasao werei.

Ni pwongohte tohnleng en Koht ritingihda wanihmwo, duen me ke kilang wasaht. Tohnlengo mahsanih: ‘Kohla oh kesihnenda nan ihmwen kaudoko, oh kaukaule padahk ong aramas akan.’ Mahnda en rahno, ni ansou me kaun en lamalam akan kadarala ohl kei pwen wahdo wahnpoaron kan sang imweteng, re sohlahr mie. Mwuhri ohl ko diarada irail padapadahk nan ihmwen kaudoko oh wahiraildohng nan Sanihdrin.

‘Se padahkiong kumwail en dehpa pwurehng padahkki mwaren Sises,’ kaun en lamalam ko inda. ‘Ahpw kumwail kadirekihla Serusalem omwail padahk kan.’ Wahnpoaron ko eri sapeng: ‘Se pahn peikiong Koht me iei kaun ah kaidehn aramas.’ Irail eri kaukaule padapadahki duen “rohngamwahu.” Met kaidehn mehn kalemeng mwahu ong kitail?