Paul Nan Rom

KILANG sahl mete ko ni pehn Paul, oh kilang sounpei en Rom sinsile ih. Paul emen me selidiehr nan Rom. E awiawih ansou me kaun en Rom Sihser pahn kosonnedi dahme pahn wiawi ong ih. Eri ni ansou me e sensel, re kin mweidong aramas kan en kohdo reh.

Rahn siluh mwehrin Paul lel Rom e ilekila rehn kaun kan en mehn Suhs ko en kohdo reh. Pwehki met, mehn Suhs tohto nan Rom kohdo. Paul padahkiong irail duen Sises oh duen wehin Koht. Ekei pwosonla oh wiahla Kristian, ahpw ekei sohte kamehlele.

Paul pil padahk ong sounpei kan me kin sinsile ih. Erein pahr riau me e sensel Paul kin padahk ong aramas koaros me a kak. Pwehki met, pil irail tohn ihmwen Sihser rong duen rohngamwahu en Wehio, oh ekei wiahla Kristian.

Ahpw ihs menet me mwomwohd ni tehpel oh intinting? Ke kak kasawiehda? Ei, menet Timoti. Timoti pil selidi nan imweteng pwehki ah kalohki wehin Koht, ahpw met e sapwadekelahr. Oh met e kohdo wasaht pwen sewese Paul. Ke ese dahme Timoti wia intingih? Kitail pahn kilang.

Ke tamataman kahnihmwen Pilipai oh Episos nan Poadoapoad 110? Paul sewese tapiada mwomwohdiso kan en Kristian nan kahnihmw ko. Eri met, ni ah mih nan imweteng, Paul intingihla kisin likou kan ong Kristian pwuko. Kisin likou pwukat mi nan Paipel, oh ih me adaneki Episos oh Pilipai. Paul ansouwet padahkiong Timoti dahme e pahn intingihla nan kisin likou ong kompoakpara Kristian ko nan Pilipai.

Mehn Pilipai kan kin inenen kadek ong Paul. Irail kadaralahng ih kisakis ansou me a mi nan imweteng, ihme Paul menlauki ong irail kisakiso. Epaprodaitus iei ohl me wahdo kisakiso. Ahpw e inenen soumwahudahr oh kereniong mehla. Ahpw met e pil pwurehng kehlailda oh e pahn pwuralahr ni ihmwe. Ih me pahn wahda kisin likou wet sang Paul oh Timoti ni ah pahn pwuralahng Pilipai.

Ni ansou me Paul mihmi nan imweteng e pil intingihdi kisin likou riau me kisehn neitail Paipel. Ehu kisin likou ong kahnihmwen Kolose. Ke ese ia eden kisin likouo? Kolose. Kisin likou teio e intingihlahng kompoakpah Pailemon me kin pil mi nan Kolose. Kisin likouo kin pid duen Onesimus ahn Pailemon ladu.

Onesimus tang sang Pailemon oh kohdo Rom. Ni ah mi wasao Onesimus rongadahr me Paul mihmi nan imweteng wasao. Ih eri kohdo pwen tuhong, oh Paul padahk ong Onesimus. Ansoukis mwuhri Onesimus pil wiahla emen Kristian. Met Onesimus pahtoukihla me e wiahda ni ah tangwei. Ke ese dahme Paul intingihdi nan kisin likou ong Pailemon?

Paul peki rehn Pailemon en mahkong Onesimus. ‘I kadarwei ih ong uhk,’ Paul intingih. ‘Ahpw ansouwet ih kaidehn ihte emen ahmw ladu. E pil wiahla emen riomw Kristian kasehlel.’ Ni ansou me Onesimus pwurala Kolose e wahda kisin likou riau pwukat, ehu ong mehn Kolose oh mehteio ong Pailemon. Kitail kak medewela duen peren me Pailemon ahniki ni ah esehda me nah ladu wiahlahr emen Kristian.

Ni en Paul ah intingihlahng mehn Pilipai oh Pailemon, mie rohngamwahu me e kasaleong irail. ‘I kadarwei Timoti ong kumwail,’ Paul padahkiong mehn Pilipai ko. ‘Ahpw ansou mwotomwot I pahn pil pwarwei rehmwail.’ Oh, ong Pailemon, e intingihdi: ‘Kauonopada ong ie ekis wasa pwe I en keiru ie.’

Ni ansou me Paul sapwadekela e pwarek rie Kristian ohl oh lih akan nan wasa tohto. Ahpw mwuhri Paul pil pwurehng selidi nan Rom. Ansouwet e eseiehr me e pahn kamakamala. Ih eri intingihlahng Timoti oh peki ih en kohdo reh mwadang. ‘I lelepak ong Koht,’ Paul intingihdi, ‘oh Koht ketikihongiehehr kating mwahu.’ Pahr malaulau kei mwuhri Paul kamakamala oh Serusalem pwurehng ohla, ansouwet sang rehn sounpei en Rom.

Ahpw pil mie soahng tohto nan Paipel. Siohwa Koht doadahngki wahnpoaron Sohn pwen intingihdi kaimwisekelahn pwuhk kan, iangahki pwuhk en Kaudial. Pwuhk en Paipel wet padahkiong kitail duen mehkan en ansou kohkohdo. Ansouwet kitail pahn kilang dahme ansou kohkohdo kin nekinekid ong kitail.