Mahsen en Siohwa Kin Ieias

Ire Kesempwal akan Sang nan Pwuhken Taitus, Pailimwon, oh Ipru

AHNSOU kis mwurin e lapwada sang keieun eh selidi nan Rom nan pahr 61, wahnpoaron Pohl mwemweitla dekehn Krihd. Ni eh kilang en tohnmwomwohdiso nanpwungmwahu rehn Koht e sohte kehlail, e peki Taitus en mihmi pwehn kakehlakahda irail. Mwuhr sang Masedonia, Pohl ntingihdi kisinlikou ehu men kasalehong Taitus eh pwukoa kan oh pil kihong ih manaman en wia doadoahk wet.

Mwohn eh lapwada sang imweteng nan pahr 61, Pohl ntingihdi kisinlikou ehu ong Pailimwon, emen Kristian nan Kolose. Kisinlikouo iei pekipek ehu ong emen kompoakepah.

Mpen pahr 61, Pohl pil ntingihdi kisinlikou ehu ong mehn Suhs pwosonlahr akan nan Sudia. Kisinlikou wet kasalehda kesempwalpen koasoandi en Kristian sang koasoandi en mehn Suhs. Kisinlikou siluh pwukat koaros audaudki kaweid kesempwal ong kitail.—Ipru 4:12.

TENGETENG NI PWOSON

(Taitus 1:1–3:15)

Mwurin eh kihda kaweid ong “idihada ekei me mah kan en mwomwohdiso nan kahnimw kan koaros,” Pohl kaweidih Taitus en ‘kapwungala [me kin pelianda], pwe irail en kak ahneki pwoson kehlail.’ E kaweidih koaros tohnmwomwohdiso nan Krihd “en kesehla mouren seupwoson Koht . . . oh momourki mour pwung.”—Taitus 1:5, 10-13; 2:12.

Pohl pil doulahte oh kihda kaweid pwehn sewese tohnmwomwohdiso nan Krihd en tengeteng ni pwoson. E kaweidih Taitus en ‘kaleke akupwung mwahl akan, . . . oh uhkipene kosonnedo.’—Taitus 3:9.

Pasapengpen Peidek kan me Pid Duwen Iren Paipel kan:

1:15—Iaduwen “soahng koaros me inenen mwakelekel ong irail kan me mwakelekel; ahpw sohte okotme me pahn mwakelekel ong irail kan me samin oh me sohte pwoson”? Pwehn diar pasapeng, kitail anahne ese ia wehwehn ahn Pohl nda “soahng koaros.” E sohte koasoiahte soahng kan me Paipel kin uhwong ahpw e pil koasoia soahng kan me emenemen pahn koasoanehdi sang pein eh nsenmwakelekel. Ong aramas emen me eh madamadau kin pahrekiong koasoandi en Koht, eh pilipil kan me pwung. Met sohte duwehte irail akan me arail madamadau kin sapwung oh arail nsenmwakelekel saminla.a

3:5—Iaduwen Kristian me Keidi kan ‘komourla sang ni ar kamwakeleirailda’ oh ahnekihla ‘mour kapw sang manaman en Koht’? Irail komourla pwehki Koht ketin kamwakelehkin irailda ntahn Sises ki meirong en tomwo. Irail ahnekier ‘mour kapw sang manaman en Koht’ pwehki irail wiahla “kapikipik kapw” nin duwen sapwellimen Koht seri keidi kan.—2 Kor. 5:17, NW.

Mehn Kasukuhl kan ong Kitail:

1:10-13; 2:15. Sounapwalih Kristian emen anahne en eimah ni eh kin kapwungala sapwung kan nan mwomwohdiso.

2:3-5. Rahnwet pil duwehte nan mwehin Sises me lih Kristian mah kan anahne “en kin mour nin duwen me konehng lih poadidi kan. Re dehr kin karaun likamw, de kin men wia lidun wain. Re en kin kihwei padahk mwahu.” Ni ar pahn wia met, re kak pweida ni arail kaweid emenemen irail “peinakapw akan” nan mwomwohdiso.

3:8, 14. Nantihong ‘en nsenohki mweidohng ar ahnsou kan ong ni wia doadoahk mwahu, mepwukat me mwahu oh katapan’ pwe met pahn sewese kitail en pweida nan atail papah Koht oh pere kitail sang sampah suwed wet.

KANGOANGE PWEHN MWEKIDKI “LIMPOAK”

(Pail. 1-25)

Kaping kohwong Pailimwon pwehki eh mehn kahlemeng en ‘limpoak oh pwoson.’ Eh mehn kahlemeng ong ienge Kristian akan kin kihong Pohl ‘peren laud, oh e pil kin kakehlakahda.’—Pail. 4, 5, 7.

Pohl wiahda mehn kahlemeng mwahu ong sounapwalih kan, ni eh apwalihala irair en Onesimus oh kangoange Pailimwon en mwekidki “limpoak” ahpw kaidehn limeidihd. E koasoiong Pailimwon: “I uhdahn ese, ni ei ntingwei, me komw pahn kapwaiada dahme I pekiet, ahpw ni mehlel I ese me komw pahn wia me laudsang.”—Pail. 8, 9, 21.

Pasapengpen Peidek kan me Pid Duwen Iren Paipel kan:

10, 11, 18—Iaduwen Onesimus me wia ohl ‘soh katepe’ men mahso e wiahla ohl “katapan” men? Onesimus iei emen ladu me sohte men wia eh pwukoa oh tangasang imwen Pailimwon nan Kolose kohla Rom. Onesimus pil pirapa eh soumaso pwe en kak pwain eh seiloak me reireiki mwail 900. Kahrehda sohte katepen Onesimus ong Pailimwon. Ahpw Pohl sewese Onesimus en wiahla Kristian emen nan Rom. Kristian menet me mahs wia ladu ‘soh katepe’ men uhd wiahla ladu “katapan” men.

15, 16—Dahme kahrehda Pohl sohte idek rehn Pailimwon en kapitala Onesimus? Pohl men kapwaiada eh pwukoa en ‘padapadahngki duwen Wehin Koht oh kapahrengki duwen Kaun Sises Krais.’ Ihme kahrehda, e pilada en dehr pidada ire kan me pid duwen koasoandi kan en kalidu.—Wiewia 28:31.

Mehn Kasukuhl kan ong Kitail:

2. Pailimwon mweidohng tohnmwomwohdiso en kin pokonpene nan imweo. E wia pwais kaselel ehu en doadoahngki imwatail ong tuhpenehn kalohk.—Rom 16:5; Kol. 4:15.

4-7. Kitail tiengla oh kapinga iangatail me pwoson kan me kin wiahda mehn kahlemeng mwahu en pwoson oh limpoak.

15, 16. Kitail dehr mweidohng kahpwal en mour en nohk kapwunodei kitail. Imwila kakete wia kamwahu ehu duwehte irair en Onesimus.

21. Pohl kasik Pailimwon en mahkohng Onesimus. Kitail pil anahne kasalehda mahk ong riatail kan me kansensuwedih kitail.—Mad. 6:14.

‘DOULAHNG MEHKAN ME UNSEK’

(Ipru 1:1–13:25)

Pohl kadehdehda me pwoson sapwellimen Sises meirong kesempwal sang kapwaiada kosonnedo. E kasalehda kesempwalpen sapwellimen Sises pwukoahn tapihada mwomwohdiso en Kristian, sapwellime pwukoa en samworo, sapwellime tomw oh pil inou kapwo. (Ipru 3:1-3; 7:1-3, 22; 8:6; 9:11-14, 25, 26) Loalokong wet uhdahn sewese Kristian en Suhs akan en powehdi kalokolok sang mehn Suhs akan. Pohl kangoange ienge mehn Suhs pwoson akan en ‘doulahng mehkan me unsek.’—Ipru 6:1.

Ia uwen pwoson e kesempwal ong Kristian emen? Pohl ntingihdi: “Sohte me kak kenikenla pahn kupwur en Koht ma sohte eh pwoson.” E kangoangehki mehn Suhs kan: “Kitail en nantihong nan atail mour me kitail tapihadahr, rasehng atail kin tang kehlail ni atail kin weirentang.”—Ipru 11:6; 12:1.

Pasapengpen Peidek kan me Pid Duwen Iren Paipel kan:

2:14, 15—Ahn Sehdan “kakaun mehla” kin kasalehda me e kak kahrehong emen me e pilada en mehla mwadang? Soh. Ahpw sangete ni tepin eh mwekid widing nan Ihden, eh likamw kahrehda mehla pwehki Adam dipadahr oh dihp oh mehla lelohngehr aramas koaros. (Rom 5:12) Patehng met, iengen Sehdan aramas kan kin kaloke sapwellimen Koht ladu kan lao lel mehla, duwehte me re wiaiong Sises. Ahpw met sohte wehwehki me Sehdan ahneki manaman en kemehla aramas koaros me e mwahuki. Pwe ma iei duwe met, Sehdan kasorelahier sapwellimen Siohwa tohnkaudok kan mahsie. Siohwa kin ketin pere sapwellime aramas nin duwen pwihn ehu oh sohte mweidohng Sehdan en kasohrehirailla. Mehnda ma Koht ketin mweidala ekei kitail en mehla pwehki ahn Sehdan uhwong kan, kitail kak kamehlele me Koht pahn ketin kamwahwihala kahpwal kan koaros me kin lelohng kitail.

4:9-11—Iaduwen atail pahn ‘pedolong nan sapwellimen Koht kommoal’? Ni imwin rahn keweneu en rahnen kapikipik, Koht ketin kommoaldi sang sapwellime doadoahk en kapikipik kan oh koapworopworki me kupwure me pid sampah oh aramas pahn pweida. (Sen. 1:28; 2:2, 3) Kitail kin “pedolong oh kommoaldi” ni atail kin uhdi sang uhki pein atail pwung oh alehda sapwellimen Koht meirong en tomw. Kitail pahn diar nsenamwahu oh kapai rahn koaros ni atail kin pwoson Siohwa oh idawehn sapwellime Ohl ah kaidehn pein nsenatail.—Mad. 11:28-30.

11:10, 13-16—Mehnia “kahnimw” me Eipraam awiawih? Met kaidehn uhdahn kahnimw ehu ahpw karasaras ehu. Eipraam awiawih “Serusalem en nanleng,” me wiawihkihda Krais Sises oh meh 144,000 me pahn iang ih kakaun. Irail pwukat me iang ih kakaun nanleng pil adaneki “Kahnimw Sarawio, Serusalem Kapw.” (Ipru 12:22; Kaud. 14:1; 21:2) Eipraam kasikasik mour pahn kaundahn Wehin Koht.

12:2—Dahkot “peren me [Sises] kasikasik” me kahrehda ‘e sohte mwahn kupwurohkihla kanamenekpen eh pahn pwoula nin tuhkehn kalokolok’? Iei peren en kilang pweidahn sapwellime doadoahk me iangahki kasarawihlahn mwaren Siohwa, kasalepen sapwellimen Siohwa pwung en kaunda lahng oh sampah, oh sapwellimen Sises meirong me komourala aramas sang mehla. Sises pil kilangwohng kating en kakaun nin duwen Nanmwarki oh papah nin duwen Samworo Lapalap ong kamwahupen aramas.

13:20—Dahme kahrehda inou kapw pahn “soutuk”? Pwehki kahrepe siluh: (1) E sohte pahn wilialihda, (2) kamwahupe kan pahn poatopoat, oh (3) “sihpw teikan” pahn kaukaulehte paiekihda koasoandi en inou kapw mwurin Armakedon.—Sohn 10:16, NW.

Mehn Kasukuhl kan ong Kitail:

5:14. Kitail anahne wia tohnsukuhl pwerisek en onop oh momourki dahme kitail sukuhlikihsang Mahsen en Koht, iei Paipel. Pwehki ihte ahl me kitail pahn kak en “ahnlahr oh eselahr wekpeseng en me mwahu oh me suwed.”—1 Kor. 2:10.

6:17-19. Ni atail kin poahsoanehda atail koapworopwor teng ong sapwellimen Koht inou oh kahula, met pahn sewese kitail en dehr salongalahsang ahl en padahk mehlel.

12:3, 4. Kitail en “dehr mworusala oh nan kapehd tikitikla” pwehki kisin uhwong de kasongosong kan me kitail kin lelohng, ahpw kitail en kakairada atail wehwehki ia kahrepen kalokolok oh kamwahwihala atail koahiek ong dadaur kahpwal kan. Kitail anahne tengedihong en pelianda lao ‘lel mehla.’—Ipru 10:36-39.

12:13-15. Kitail dehr mweidohng ‘kalewen tuhke pwoisin’ de emen nan mwomwohdiso me kin raparapahki suwed en koasoandi en mwomwohdiso en kauhkitaildi sang “weweidwei nan ahl inen.”

13:7, 17. Momourki kehkehlik en peikiong oh uhpa sounapwalih en mwomwohdiso kan pahn sewese kitail en kin miniminpene.

[Nting tikitik me mi pah]