Ngehn Saut akan Sounkamaramas kei!

Sehdan oh ngehn saut akan kin ahnsou koaros lemei oh keper. Mahso, Sehdan kemehla nein ohl lelepek Sohp nah mahn akan oh nah ladu kan. Ih eri kemehla nein Sohp seri ehk ko sang ni eh kahrehda “melimel ehu” en kauwehla ihmw me irail mi loale. Mwurin mwo, Sehdan kalokehki Sohp “kens suwed ehu wasa koaros ni paliwere.”—Sohp 1:7-19; 2:7.

Ni mwehin Sises, ngehn saut akan kin kahrehda ekei aramas en sohla kak lokaia de maskunla. (Madiu 9:32, 33; 12:22) Irail kaloke emen ohl oh kahrehiong en kalipwelipwehkihda paliwere takai keng kan. (Mark 5:5) Irail pil kahrehiong pwutak men en weriwer, kesepwekehdiong nanpwel oh “serekiseli.”—Luk 9:42.

[Kilel kan nan pali 11] — Mahso, ngehn saut akan kahrehda ekei aramas en soumwahuda oh pil ekei en pwupwudi oh pinipintatseli

Rahnwet, Sehdan oh ngehn saut akan kin inenen lemei. Ni mehlel, arail wiewia suwed kan laudla mwurin arail piskensang nanleng. Rohng kan en sampah kin kasalehda duwen arail lemei. Irail kin kalokehki ekei aramas soumwahu. Re kin lidere ekei ni pwong sang ni arail kin kauwehla arail meir de kihong irail ouraman suwed kan. Re kin tiahk suwedih ekei. Re pil kin kahrehda ekei en sahliella, kemehla aramas de pil pein irail.

[Kilel kan nan pali 12] — Rahnwet, ngehn saut akan kin kahrehda ekei aramas en lemei; irail kin lidere ekei ni pwong sang ni arail kihong irail ouraman suwed kan

Lintina me kin mi nan ehu sahpw nan palieir en Amerika koasoia me emen ngehn saut, de ngehn suwed, kemehla tohn eh peneinei meh 16 oh kaloke ih erein sounpar 18. Pwehki met, e nda me ngehn saut akan kin “perenki kaloke aramas lao re mehla, mendahki kaidehn ih me re mwahuki en met.”

Ahpw Siohwa kak ketin pere sapwellime ladu kan sang en Sehdan eh wiewia suwed kan.—Lepin Padahk 18:10.