Irelaud 15

Kauwada Peneinei Me Wauneki Koht

1-3. Dahme kahrehda ekei sohte kin kak kamwahuwihala kahpwal akan me re kin kalap lelohng me pid pwopwoud oh naineki seri, ahpw dahme kahrehda Paipel me kak sawaski?

IADUWEN ma ke men pein kauwada imwomw ihmw ehu. Keieu ke pahn pwainda mahs sahpw wasa me ke pahn kauwada ie. Ni ahmw pahn koasoakoasoane oh kasikasik, ke kak kilangala oh kilang imwomw ihmw kapwo. Ahpw, iaduwen ma sohte noumw dipwisou en doadoahk oh sohte ahmw koahiek en kauwada ihmw? Ia uwen kansensuwed oh soh katepen ahmw nanti!

² Pwopwoud tohto kin pwopwoudada oh medemedewe me irail pahn wiahda peneinei peren, ahpw sohte ara dipwisou en doadoahk oh sohte ara koahiek me anahnepe mie pwehn wiahda peneinei peren. Ekiste mwurin rahn en kapwopwoudo, soangen wiepe suwed akan kin pwarada. Pepei oh akamai wialahr kisehn wiewiahn ehuehu rahn. Ni ahnsou me seri kan ipwidi, pahpa oh nohno kapwo diarada me re sohte pil ahneki koahiek en wia pahpa oh nohno duwehte ara sohte ahneki koahiek en wiahda pwopwoud peren.

³ Ahpw, kitail kak peren pwe Paipel kak sawas. Kaweid sang Paipel kin duwehte dipwisou en doadoahk kan me kak sewese iuk en wiahda peneinei peren. (Lepin Padahk 24:3) Kitail kilang iaduwen kitail kak doadoahngki kaweid wet.

DIPWISOU EN DOADOAHK EN KAUWADA PWOPWOUD PEREN

4. Dahme kahrehda kitail kak kasik me ekei kahpwal akan pahn kak pwarada nan pwopwoud, oh mehn kaweid dah kan Paipel kin ketikihda?

⁴ Sohte lipilipil ia uwen atail pahn lemeleme me aramas riemen me inenen konpene ira en wiahla ehu, miehte ara wekpeseng kan me pid ara pepehm, irair akan me ira wahdo sang ahnsou me ira wia seri kei, oh me ira ahndahsang peneinei me ira kohsang ie kan. Kahrehda, kitail kak kasik me ekei kahpwal akan pahn kak pwarada mwurin ara pwopwoudla. Ahpw, iaduwen ahr pahn powehdi kahpwal pwukat? Sounkau ihmw akan ni arail pahn wia ihmw irail pahn tetehk mwahu pilahn en ihmwo. Met wia mehn kaweid akan me irail en idawehn. Paipel ketikihda sapwellimen Koht mehn kaweid ohng kauwada peneinei peren. Met kitail pahn tehkpene ekei mehn kaweid pwukat.

5. Iaduwen Paipel a kin kasalehda kesempwalpen loalopwoatpene nan pwopwoud?

⁵ Loalopwoatpene. Sises mahsanih: “Kaleke aramas de kamweidpeseng me Koht ketin kapatapenehr.”a (Madiu 19:6) Wahnpoaron Pohl ntingihdi: “Kumwail koaros uhdahn pahn wauneki kasarawien kapwopwoud, oh kumwail ohl pwopwoud oh lih pwopwoud kan, kumwail uhdahn pahn kin loalopwoatpene. Koht pahn ketin kadeikada me kin mouren kamwahl oh me kin mouren nenek.” (Ipru 13:4) Aramas akan me pwopwoud anahne ahneki pepehm me irail ahneki pwukoa ohng Siohwa pwe irail en loalopwoat ong arail pwoud akan.—Senesis 39:7-9.

6. Iaduwen loalopwoatpene nan pwopwoud kak sewese kolokolpene inou en pwopwoud?

⁶ Loalopwoat kin kihong pwopwoudo pepehm en wahu oh nsenamwahu. Pwopwoud loalopwoatpene kan kin wehwehki me, nan irair soh lipilipil kan, ira pahn utuhtungete emenemen. (Eklesiasdes 4:​9-12) Ia uwen met ah weksang irail oko me kin mwadangete salelepekla mendahte ma kisin kasongosong tikitik kis me re loiong! Soangen aramas pwukat kin mwadangete nda me irail ‘pilada aramas sapwung,’ oh me dene irail ‘solahr poakpene,’ oh ma emenemen pahn rapahkihda ah pwoud kapw iei ih me pahn kapwungala kahpwal kan. Ahpw, soangen madamadau wet sohte pahn kak kihong ira ahnsou mwahu en kekeirada ohng nan palien pepehm en aramas. Ahpw, dahme pahn wiawi, soangen salelepek en pwopwoud wet pahn pil doula oh lelohng nan irair en pwopwoud me e pahn wiahiong emen tohrohr me kapw. Ni ahnsou me aramas emen imwaneki ihmw kaselel ieu, ahpw e diarada me oahs en imwe mpwi, ni mehlel, e pahn song en kamwahuwihala. E sohte pahn uhdahte kosoula nan ehu ihmw tohrohr. Pil duwehte, wilianda ahmw werek kaidehn iei elen kamwahuwihala kahpwal akan me kin pwarada nan pwopwoud. Ni kahpwal akan ar kin pwarada, ke dehr song en kauwehla inou en pwopwoud, ahpw doadoahk kehlail pwehn kolokolpene inou en pwopwoud. Soangen loalopwoat wet kin kasalehda me ehupene wet wia mehkot me kesempwal en pere, kamwakamwahuwih oh perenki.

7. Dahme kahrehda koasoakoasoipene kin kalap wia kahpwal ong aramas pwopwoud kan, ahpw iaduwen pwuhriong nan likoun “mour kapw” a kak sawas?

⁷ Koasoakoasoipene. Pwuhken Lepin Padahk mahsanih: “Mie kapwunod nan pilahn kan wasa me sohte koasoakoasoipene ni rir kin mie.” (Lepin Padahk 15:22, NW) Ahpw, koasoakoasoipene wia mehkot apwal ohng ekei pwopwoud kan. Dahme kahrehda? Pwehki aramas akan kin wekpeseng arail elen wiahda arail koasoi. Met irair mehlel ehu me kalap kahrehda kahpwal laud oh kin kahrehda sohte wehwehpene mwahu nanpwung riemen oh pil kahrehda irair en pwangahkihda emenemen. Irair wet kin kak poahsoankihda kaiahn me emenemen alehdi sang wasa me e keirada ie. Karasepe ieu, ekei kin keirada wasa me pahpa oh nohno kalap akamai ie. Eri, ni arail wiahla aramas pwopwoud palan ekei, irail ele mwein sehse iaduwen irail pahn koasoiong arail pwoud ni elen kadek oh limpoak. Mendahki met, imwamwail sohte anahne en ohla oh wiahla ‘ihmw ehu me diren akamai.’ (Lepin Padahk 17:1, NW) Paipel kasalehda kesempwalpen kitail en pwuhriong nan likoun “mour kapw” oh e sohte pwungki kailok, weriwer, oh lokaia keng en wiawi.—Episos 4:22-24, 31.

8. Dahme pahn kak sawas ni ahnsou me ahmw elen madamadau sohte pahrekiong ahn ahmw pwoud?

⁸ Dahme ke kak wia ma ahmw madamadau sohte pahrekiong ahn ahmw pwoud? Ma lingeringer tepiada kohda nanpwungamwa, e pahn mwahu ma kumwa kapwaiada kaweid en Lepin Padahk 17:14 (NW): “Mwohn akamai pahn tepida wiawi, kohkohlahsang.” Ei, kumwa kak pwilikihdi mahs koasoipen ireo lao lel ahnsou ieu me kumwa koaros meleileidier. (Eklesiasdes 3:1, 7) Sohte lipilipil dahme pahn pwarada, song en “mwadang en rong, pwand en lokaia, pwand en lingeringer.” (Seims 1:19, NW) Amwa mehn akadei iei en kamwahuwihala irairo, ah kaidehn en diarada ihs me kana ni akamaio. (Senesis 13:8, 9) Pilada lepin lokaia kan oh soangen ngilen koasoi me pahn kameleilei nan kapehdomw oh pil nan kapehd en ahmw pwoudo. (Lepin Padahk 12:18; 15:1, 4; 29:11) Ahpw, me kesempwal sang koaros, ke dehr wie lingeringerte, ahpw en rapahki sawas ni amwa pahn patkihpene oh koasoiong Koht ni kapakap karakarahk.—Episos 4:26, 27; 6:18.

9. Dahme kahrehda kitail kak ndahki me elen koasoakoasoi kin tepisang nan mohngiong?

⁹ Ehu lepin padahk en Paipel mahsanih: “Mohngiong en emen me ahneki erpit kin kahrehong ewe en kasalehda loalokong, oh kilin ewe kan aramas kin men karonge.” (Lepin Padahk 16:23, NW) Eri, ni mehlel, dahme kin wia kih en elen koasoakoasoi me pweida mwahu nanpwungen pwopwoud iei dahme kohsang nan mohngiong, kaidehn dahme kohsang nan ewe. Ia mwomwen ahmw madamadau duwen ahmw pwoud? Paipel kin kangoange Kristian akan en kasalehda “limpoak.” (1 Piter 3:8) Ke kak wia met ni ahnsou me ahmw pwoud kin lelohng nan irair ehu me kapwunod? Ma ke kak, eri, e pahn wia sawas ieu ong uhk en ese iaduwen ke pahn kin sapeng ih.—Aiseia 50:4.

10, 11. Iaduwen ohl pwopwoud men a pahn kak doadoahngki kaweid en 1 Piter 3:7?

¹⁰ Kasalehda wahu. Kehkehlik kin kohwong Kristian ohl pwopwoud akan en mihmihte rehn arail pwoud lih akan “ni loalokong, waunekin ih nin duwen dahl luwet ehu, pwe ih lih.” (1 Piter 3:7, NW) Wauneki ahmw pwoud lih kin wehwehki kesempwaliki ih. Ohl pwopwoud emen me kin kousoan rehn ah pwoud “ni loalokong” kin inenen nsenohki oh tehk kanahieng ah pepehm akan, wasa kan me e kin mwahu, ah loalokong, oh a adamwahu. E pil uhdahn pahn men sukuhliki iaduwen sapwellimen Siohwa kupwur ohng lih akan oh dahme E ketin kupwurki kitail en wiahiong irail.

¹¹ Nna, medewehla ma nan imwomw, mie noumw mehn doudou ieu me kesempwal ahpw mengei en pwalpeseng. Ke soh pahn kin pwek kanahieng? Eri, Piter doadoahngki lepin lokaia “dahl luwet” ni soangen madamadauohte, oh met pahn kamwekid madamadau en ohl pwopwoud Kristian akan en kasalehda limpoak ong arail pwoud kan oh kanahieng irail.

12. Iaduwen lih pwopwoud men a kak kasalehda e kin wauneki eh pwoud ohl?

¹² Ahpw, soangen kaweid dah me Paipel kihda ohng lih pwopwoud akan? Pohl ntingihdi: “Emenemen lih pwopwoud en wauneki eh pwoud.” (Episos 5:33) Pil duwehte lih pwopwoud emen ah mie ah anahn en ahneki pepehm en me mie wahu oh limpoak kohwong ih sang rehn ah pwoud ohl, ohl pwopwoud emen pil anahne ahneki pepehm me e pil ale wahu sang rehn ah pwoud lih. Lih emen me kin wauneki eh pwoud ohl sohte pahn lohkiseli sapwung en ah pwoud, sohte lipilipil ma ih ohl Kristian men de soh. E sohte pahn kihsang ah wahu ni ah pahn kin kauwe de kanamenekihala ih sohte lipilipil ma ahnsou me ira kelehpw de pil mwohn aramas.—1 Timoty 3:11; 5:13.

13. Iaduwen ohl pwopwoud oh lih pwopwoud kak kasalehda ara madamadau ni elen meleilei?

¹³ Met sohte irehdi lih pwopwoud emen en nda dahme e kin medemedewe. Ma mie mehkot me kapwunode ih, e kak kasalehda ah madamadau ni elen wahu. (Senesis 21:9-12) Kasalehda ah madamadau ohng ah pwoud ohl kak rasehng koskilahng ohlo mpwei ieu. E kak kawaialang pwe en kak mengei en daper, de e kak katepwekehki ih pwe en ohla de medekala. Ia uwen mwahu ni ahnsou me pwopwoudo, ira koaros, kin koasoakoasoipene ni lokaia kadek oh mpai oh nantihong iresang ira soangen akamai me emente kin karaunehki emen sapwung ieu!—Madiu 7:12; Kolose 4:6; 1 Piter 3:3, 4.

14. Dahme ke pahn kak wia ma ahmw pwoud sohte kin perenki doadoahngki kaweid en Paipel nan amwa pwopwoud?

¹⁴ Nin duwen me kitail kilangehr, kaweid en Paipel akan kak sewese iuk en kauwada pwopwoud peren. Ahpw, iaduwen ma ahmw pwoud sohte kin perenki doadoahngki kaweid me Paipel kin ketikihda? Soahng mwahu tohto kak wiawi ma ke pahn doadoahngki loalokong me pid duwen Koht ni ahmw kapwaiada ahmw pwukoa kan. Piter ntingihdi: “Pil duwehte kumwail lih pwopwoud kan, kumwail peikiong amwail pwoud kan, pwe ma ekei irail sohte pwoson mahsen en Koht, re en alehkihla pwoson amwail mouren wiewia mwahu. Kumwail sohte anahne kapahrekiong irail pwe re pahn pein kilang amwail mour mwakelekel oh duwen amwail wauneki amwail pwoud.” (1 Piter 3:1, 2, NW) Met pahn pil mehlel rehn ohl pwopwoud akan me arail pwoud lih akan sohte kamehlele Paipel. Sohte lipilipil dahme amwail pwoud akan pilada en wia, mweidong kaweid en Paipel akan en wiahiong uhk en wiahla aramas pwopwoud mwahu. Loalokong me pid duwen Koht pil kak wiahiong uhk en wiahla pahpa de nohno mwahu.

APWALIHADA SERI KAN NI AHMW DOADOAHNGKI LOALOKONG ME PID DUWEN KOHT

15. Iaduwen sapwung kan me mie nan elen kakairada seri kan kin kohsang rehn ehu dih kolahng dih en mwuri kan, ahpw iaduwen kitail pahn kak irehdi sapwung pwukat en dehr pwurehng wiawi ni atail pahn kakairada neitail seri kan?

¹⁵ Nainekihte rasaras oapwoat de ama ieu sohte wiahiong aramas emen en wiahla kahpente semen emen. Pil duwehte, pwehki dene mie noumw seri, met sohte wehwehki me ke wia pahpa de nohno koahiek en naineki seri men. E sohte lipilipil ma re ese de soh, pahpa oh nohno kan kin kalap kakairada neirail seri kan ni ahl me pein irail kin keirkihda. Kahrehda, sapwung kan me mie nan elen kakairada seri kin kohsang rehn ehu dih kolahng dih en mwuri kan. Mahsen en lepin padahk en Ipru en kawa ieu kin mahsanih: “Sahm akan me kin kang wahn wain pwul akan, neirail seri kan ahpw ngihrerkihdahr.” Ahpw, Pwuhk Sarawi kasalehda me aramas emen sohte anahne en alasang wiewiahn ahr pahpa oh nohno kan. E kak pilada ehu elen mour tohrohr, me kin poahsoanda pohn sapwellimen Siohwa kosonned akan.—Esekiel 18:2, 14, 17, NW.

16. Dahme kahrehda e kin kesempwal en apwalih mwahu ahmw peneinei, oh dahme met kin pidada?

¹⁶ Siohwa kupwurki pahpa oh nohno Kristian akan en kihong neirail seri kan kaweid pwung oh epwel mwahu. Pohl ntingihdi: “Eri, ma emen sohte kin apwalih kiseh kan, ahpw mehlel uhdahn kisehn pein eh peneinei, e kahmahmkilahr eh pwoson, oh e suwedsang irail kan me sohte arail pwoson.” (1 Timoty 5:8) Mahsen pwukat meid kehlail! Kapwaiada ahmw pwukoa nin duwen sounapwalih peneinei kin pidada epwel mwahu ohng anahn en paliwar, pali ngehn, oh palien pepehm en noumw seri kan, iei met me wia kapai ieu oh pwukoah ieu en aramas en Koht emen. Paipel audaudki kaweid akan me kak sewese pahpa oh nohno kan pwe irail en kak kauwada wasahn kousoan kaperen ehu ong neirail seri kan. Tehk ekei ire pwukat.

17. Dahme anahn pwe noumw seri kan en kak kolokol sapwellimen Koht kosonned akan nan mohngiongarail kan?

¹⁷ Wia mehn kahlemeng mwahu. Pahpa oh nohno en Israel kan ale kaweid wet: “Kumwail katengehdiong mahsen en Koht akan nan loalen noumwail seri kan oh padahkihong irail ahnsou me kumwail kin mwomwohd nan imwamwail akan oh ahnsou me kumwail alialu nanial oh ahnsou me kumwail kin wendi oh ahnsou me kumwail kin pwourda.” Pahpa oh nohno kan anahne padahkiong neirail seri kan sapwellimen Koht kosonned akan. Ahpw, mie kaweid kan me ntingihdi mwohn kehkehlik wet: “Mahsen pwukat me I kaweidkin kumwail rahnwet en uhdahn mihla nan mohngiongamwail kan.” (Deuderonomi 6:6, 7, NW) Ei, pahpa oh nohno kan sohte kak kihda dahme sohte rehrail. Sapwellimen Koht kosonned akan en keieu mahs ntingihdi nan mohngiong en pahpa oh nohno kan ma re men en uhd ntingihdi nan mohngiong en neirail seri kan.—Lepin Padahk 20:7; pil kilang Luk 6:40.

18. Iaduwen Siohwa a kin ketin wia mehn kahlemeng mwahu ong pahpa oh nohno kan ong kasalehda limpoak?

¹⁸ Kihda mehn kasalepen ahmw limpoak. Ni ahnsou me Sises papidaisla, Siohwa mahsanih: “Kowe, me iei nei pwutak kompoake, me I kin kupwurperenki.” (Luk 3:22) Siohwa ketin kupwurehla sapwellime ohlo oh ni saledek kin kasalehda met oh ketikihong ih kamehlelpen sapwellime kupwur limpoak. Mwuri, Sises mahsanih ong Semeo: “Komw ketin loalloale ie mwohn sampah wet eh saikinte kepikipikda.” (Sohn 17:24) Nin duwen kumwa wia pahpa oh nohno me pwoson Koht, kumwa en kihong noumwa seri kan kasalepen amwa limpoak ni koasoi oh ni wiewia—oh kumwa en kalapw wia met. Ahnsou koaros tamataman me “limpoak kin kakehlailihala aramas.”—1 Korint 8:1, NW.

19, 20. Dahme pahpa oh nohno kan pahn wia de sohte pahn wia me pid duwen kaweid pwung ong neirail seri kan, oh iaduwen pahpa oh nohno kan pahn ale kamwahu kan ni arail pahn alasang mehn kahlemeng mwahu en Siohwa?

¹⁹ Kaweid. Paipel kin kasalehda kesempwalpen kihda kaweid limpoak. (Lepin Padahk 1:8) Pahpa oh nohno kan me sohte kin kesempwaliki arail pwukoahn kaweid neirail seri kan rahnwet pahn lelohng imwila suwed oh apwal ni ahnsou kohkohdo.Ahpw, pahpa oh nohno kan pil anahne kanahieng pwe arail kaweid en dehr nohn daulihala. Pohl ntingihdi: “Kumwail sahm akan, kumwail dehr kamwakara mwahl noumwail seri kan, pwe irail dehr nan kapehd toutoukihla.” (Kolose 3:21, NW) Pahpa oh nohno kan en dehr daulihala me konehng ni arail kapwungala neirail seri kan de en dehr pil ahnsou koaros litikitikiong arail soh itar akan oh kalap kauwe arail nannanti.

²⁰ Samatail nanleng, Siohwa Koht, kin ketikihda mehn kahlemeng mwahu en kihong sapwellime kan kaweid. Sapwellime kaweid sohte kin nohn apwal daulihla. Koht padahkiong sapwellime aramas akan: “Ni ei pahn kalokei kumwail, I uhdahn pahn wia ni me pwung.” (Seremaia 46:28) Pahpa oh nohno kan uhdahn en alasang mehn kahlemeng mwahu me Siohwa kin ketin wia me pid kaweid. Kaiahn me kin nohk daulihla oh nohk kin ukila oh daulihla dahme pwung ong kasukuhl oh kaweid kin uhd kahrehda lingeringer.

21. Iaduwen pahpa oh nohno kan pahn kak ese ma arail kaweid oh kaiahn me mwahu oh pahn pweida?

²¹ Iaduwen pahpa oh nohno kan pahn kak ese ma arail kaweid oh kaiahn me mwahu oh pahn pweida? Irail pahn kak pein idek rehrail, ‘Dahme ahi kaweid kin wiahda?’ Kaweid kin wiawi pwehn padahkiong noumw serio mehkot. Noumw serio uhdahn pahn anahne wehwehki ia kahrepen kaweid oh kaiahn wiawi. Pahpa oh nohno kan uhdahn pahn nsenohki oh tehk mwahu dahme elen kaweid kin wiahda. Mehlel, kereniong seri koaros nin tepio pahn nsensuwedkihla kaweid oh kaiahn me kohwong irail. (Ipru 12:11) Ahpw, elen kaweid sohte pahn kahrehong seri men en masepwehkada de pehm me pahpa/nohno kesehlahr ih, de wiakihlahr ih aramas suwed. Mwohn Siohwa ah kin kapwungala sapwellime aramas akan, e mahsanih: “Kumwail dehr masepwehk, . . . pwe I kin ieiang kumwail.” (Seremaia 46:28, NW) Ei, kihda mehn kapwungala pahn wiawi ni ahl ehu me noumw serio en pehm me ahmw madamadau kin ieiang ih oh limpoak ohng ih, oh wia pahpa oh nohno me kin utuhtung ih ahnsou koaros.

ALEHDA “KOAHIEK EN KAWEID”

22, 23. Iaduwen ke kak alehda kaweid me anahn ong kauwada peneinei ieu me peren?

²² Kitail en kapingki me Siohwa ketikihdahr mehn doadoahk kan me kitail anahne pwehn wiahda peneinei peren ehu. Ahpw, nainekihte dipwisou en doadoahk sohte itar. Kitail pahn kaiahn ong doadoahngki dipwisou pwukat ni wiepe pwung. Karasepe ieu, sounkou ihmw men pahn kak ahnla doadoahngki dipwisou en doadoahk kan ni ahl sapwung. E pil kak doadoahngki ehu dipwisou ohng soangen doadoahk ieu me kaidehn ih dipwisou me pwungiong doadoahko. Nan soangen irair pwukat, wiepe pwukat pahn kahrehda ah doadoahk pahn luwet oh sohte pahn mwomw mwahu. Ni soangen ahlohte, mwein ke pil diaradahr ekei tiahk oh pil wiewia soh konehng kan me ekis ekis wialahr ahnepen ahmw peneinei. Ekei kakete tengala ni wiewia pwukat. Ahpw, kitail en idawehn kaweid en Paipel wet: “Aramas erpit emen pahn rong oh kalaudehla ah mehn kaweid, oh ohl wehwe men iei ih me kin alehda koahiek en kaweid.”—Lepin Padahk 1:5, NW.

²³ Ke kak alehda koahiek en kaweid ni ahmw pahn kaukaule alehda loalokong me pid duwen Koht. Pehmitikiong kaweid en Paipel kan me pahn doadoahk ohng mour en peneinei, oh wiahda wekidekila kan wasa kan me anahnepe mie. Tehk kanahieng irail Kristian mah kan me kin wia mehn kahlemeng mwahu ni ahr wia aramas pwopwoud oh pahpa oh nohno mwahu kan. Koasoiong irail. Ahpw, mwohn mehkoaros, kasalehong Siohwa ahmw katoutou kan ni kapakap. (Melkahka 55:22; Pilipai 4:6, 7) E pahn kak en ketin sewese iuk pwe ken ale kaperenpen wia kisehn peneinei me kin kalinganahda Ih.

[Nting tikitik me kileldi pah]

SONG UWEN ME KE KOLEDI

Iaduwen loalopwoatpene, koasoakoasoipene, oh kasalehda wahu kak kahrehda pwopwoud peren?

Ni ahl dah kan me pahpa oh nohno kan kak kasalehong neirail seri kan arail limpoak?

Soahng dah kan kin pid kaweid pwung?

[Kilel kan nan pali 147]