Irelaud 17
Diar Mour Meleilei Rehn Sapwellimen Koht Aramas Akan
1, 2. Iaduwen irair en tohnsampah kin duwehte aramas me kin mih wasa me melimel kauwehla?
MEDEWEHLA ma melimel kehlail ieu kauwehla wasa me ke kousoan ie. Imwomw ohla, oh ahmw dipwisou koaros ohla. Apwal en mwenge. Likamwete sohla koapworopwor rehn koaros. Eri, mwurin mwo, aramas pwuriamweiki sawas kei pa peidi. Mwenge oh likou tohto kohdo. Ihmw kapw ieu kokouda ohng uhk. Uhdahn ke pahn kalahngankihong aramas me kihong uhk kisakis pwukat.
2 Soahng ieu me duwehte met pil wiwiawi rahnwet. Me duwehte melimelo, ahn Adam oh Eve pelianda Koht pil wahdo ohla laud ohng aramas akan. Paradais, me wia ara wasahn kousoan, eri ohla. Sang ahnsowo kohdo, e sansal me wehin aramas sohte kak kihong wasahn kousoan itar ohng aramas pwehn ruksang mahwen, wiewiahn loallap akan, oh kopwung sapwung. Palien sarawi likamw kaduhpekihalahr aramas tohto ohng uhdahn mwengehn ngehn me mwahu. Ahpw, Siohwa Koht kin ketikihda mwenge, likou oh wasahn kommoal en pali ngehn rahnwet. Iaduwen E kin ketin wiewia met?
“LADU LELEPEK OH LOALOKONG”
3. Iaduwen Siohwa kin ketikihda koasoandi kan pwehn sewese aramas akan, oh soangen koasoandi dah kan kin kasalehda met?
3 Sawas akan kin kohsang rehn pwihn en aramas ieu oh pwihno kin kihpeseng sawas ong irail me anahne, oh ni ahlohte Siohwa kin pil koasoanehdi sawas en pali ngehn en kohwong sapwellime aramas akan. Karasepe ieu, mehn Israel kan kin wia “sapwellimen Siohwa mwomwohdiso” ni erein pahr 1,500 samwa. Nanpwungarail mie irail oko me kin wia sapwellimen Koht pwihn pwehn padahkih sapwellime Kosonnedo. (1 Kronikel 28:8; 2 Kronikel 17:7-9) Nan keieun senturi C.E., Siohwa ketin kauwada pwihn en Kristian ehu. Mwomwohdiso kan eri wiawihdahr, oh irail kin doadoahngki kaweid sang pwihn en apwahpwalih ieu me adaneki ni lokaiahn wai Governing Body me wiawihkihda irail wahnpoaron akan oh ohl mah kan. (Wiewia 15:22-31) Pil duwehte nan rahnwet, Siohwa kin ketin kaweid sapwellime aramas akan ni ah kin doadoahngki pwihn en aramas ieu me arail koasoandi kan kin mwahu. Iaduwen kitail ese met?
4. Ihs irail akan me kin wia “ladu lelepek oh loalokong” nan atail ahnsou, oh iaduwen sawas sang Koht kin kak lelohng irail koaros me men ale sawas pwukat?
4 Sises mahsanih me ni ahnsou me e pahn ketidiong nan sapwellime manaman nan Wehio, “ladu lelepek oh loalokong” pahn kihda “mwenge ni ahnsou me konehng” ohng sapwellime tohnpadahk kan. (Madiu 24:45-47, NW) Eri, ni ahnsou me Sises kesepwilidahr ohng Nanmwarki nanleng nan 1914, ihs irail me kin wia “ladu” menet? E sansal mwahu me met kaidehn irail kaunen lamalam en palien Kristendom. Pali laud en ahnsou, irail kin kamwekamwengehki neirail sihpw akan madamadau en uhki wehin aramas oh irail uhpalihkihda palien wehi kan nan Mahwen Keieu en Sampah. Ahpw, mwengehn ngehn me mwahu oh kin kohda ni ahnsou me konehng kin kohsang ehu pwihn en Kristian mehlel me keikihdi ngehn sarawi en Koht oh irail wia kisehn pwihn me Sises kahdanekin irail “kisin pwihn sihpw.” (Luk 12:32) Irail Kristian keidi pwukat kin kalohki duwen Wehin Koht ah kaidehn duwen wehin aramas. Imwilahn met, nan erein pahr akan, aramas pwung kan me iei irail “sihpw teikan” me tohtohki meh rar kei (millions) kin iang irail “ladu” keidio oh wiewia kaudok mehlel. (Sohn 10:16) Koht kin ketin doadoahngki ‘ladu lelepek’ oh Governing Body nan rahnwet pwehn kaweid sapwellime aramas akan en ale mwenge, likou oh wasahn kousoan en pali ngehn pwehn kak lelohng irail koaros me men ale sawas pwukat.
“MWENGE NI AHNSOU ME KONEHNG”
5. Soangen irair en pali ngehn dah me mie nan sampah rahnwet, ahpw dahme Siohwa ketin wia me pid duwen met?
5 Sises mahsanih: “Kaidehkin pilawahte me aramas kak mourki, pwe mahsen koaros me kin pwilipwilsang nin doauesen Koht [“Siohwa,” NW].” (Madiu 4:4) Ahpw, e kin kansensuwed pwe pali laud en aramas akan sohte kin tehk kanahieng mahsen kan en Koht. Nin duwen kokohp en sapwellimen Siohwa soukohp Eimwos, mie “duhpek ehu, ahpw kaidehk duhpek en kang pilawa; oh men nimpil, ahpw kaidehk duhpek en pihl, ahpw duhpek en karonge mahsen kan en Siohwa.” (Eimwos 8:11, NW) Pil lel irail akan me pwerisek en sarawi, irail duhpek ni pali ngehn. Ahpw, Siohwa kin kupwurki me “soangen aramas koaros en ale komourparail oh marainkihla me mehlel.” (1 Timoty 2:3, 4) Pwehki met, E ketikihda mwengehn ngehn mwuledek. Ahpw, iawasa me aramas kak alehdi ie mwengehn ngehn?
6. Sangete mahs lel met, iaduwen Siohwa kin ketikihong sapwellime aramas akan mwengehn ngehn?
6 Sangete mahs lel met, Siohwa kin ketikihong sapwellime aramas akan mwengehn ngehn sang rehn pwihn en aramas ieu. (Aiseia 65:13) Karasepe ieu, samworo en Israel akan kin kihpene ohl, lih oh seri kan nin duwen pwihn ehu pwehn kasukuhlikin irail duwen Kosonned en Koht. (Deuderonomi 31:9, 12) Pahn kaweid en Governing Body, irail tepin Kristian akan kin koasoanehdi ren kin pokonpene oh wia arail mihding kan pwehn kihda kaweid oh pil kihda mehn kangoang ong koaros. (Rom 16:5; Pailimwon 1, 2) Sounkadehdehn Siohwa kan kin wia duwehte met. Se men luhke kumwail koaros en iang towehda mihding pwukat.
7. Iaduwen kaukaule iang towehda mihding en Kristian kan kin pid loalokong oh pwoson?
7 Mehlel, mwein ke sukuhlikihier soahng tohto sang ni pein ahmw onop Paipel. Mwein mie emen Sounkadehde me kin sewese iuk ohng onop wet. (Wiewia 8:30-35) Ahpw, ahmw pwoson kak rasehng tuhke pwoat me pahn mengila oh eri mehla ma epwelpe sohte mwahu. Kahrehda, ke pil pahn anahne alehdi mwengehn ngehn me konehng. (1 Timoty 4:6) Mihding en Kristian kan kin kihda koasoandi en kasukuhl me kin wiawihda pwehn ketikihda mwengehn ngehn ohng kakehle ahmw pali ngehn oh pil sewese iuk pwe ken kekeirada nan pwoson nin doken ahmw loalokongkihla Koht a pahn pil lalaudla.—Kolose 1:9, 10.
8. Dahme kahrehda kangoang kin kohwong kitail en iang towehda mihding kan en Sounkadehdehn Siohwa kan?
8 Mie pil ehu kahrepe kesempwal en mihding kan. Pohl ntingihdi: “Kitail nsenoh sawaspene ni kasalepen atail limpoak oh atail wiewia mwahu kan. Kitail dehr tokedihsang atail tiahk en pokonpene.” (Ipru 10:24, 25) Lepin lokaiahn Krihk “en sawaspene” kak pil wehwehki “en edehda.” Lepin padahk en Paipel ehu mahsanih: “Aramas kin ale padahk sang rehn emen aramas, rasehng mete eh kin edehda mete.” (Lepin Padahk 27:17) Kitail koaros kin anahne kaukaule ‘adahdda sapahl.’ Apwal akan en ehu ehu rahn me kin kohsang sampah wet kin kak kakonsehla atail pwoson. Ni atail kin iang towehda mihding en Kristian akan, kin mie mehn kangoang laud akan me kitail kin ale sang rehn meteikan. (Rom 1:11, 12) Tohnmwomwohdiso kin idawehn kaweid en Pohl me mahsanih en “kamweit kapehden emenemen oh kakehlada emenemen,” oh ahl pwukat kin edehda atail pwoson. (1 Deselonika 5:11, NW) Kaukaule iang towehda mihding en Kristian kan koaros kin pil wia kasalepen atail poakohng Koht oh met kin kihong kitail ahnsou mwahu kan en kapinga Ih.—Melkahka 35:18.
“KALIKAWIH KIN KUMWAILADA LIMPOAK”
9. Iaduwen Siohwa kin ketikihda mehn kahlemeng mwahu ong kasalehda limpoak?
9 Pohl ntingihdi: “Kalikawih kin kumwailada limpoak, pwe iei met mehn kolpene minimin unsek ieu.” (Kolose 3:14, NW) Siohwa ketin sapanikihong kitail likou wet. Ni ahl dah? Kristian akan kak kasalehda limpoak pwehki limpoak kin wia kisehn sapwellimen Siohwa wahn ngehn akan me E ketikihda. (Kalesia 5:22, 23) Pein Siohwa ketin kasalehdahr limpoak me keieu laud ni ah ketikihdo Sapwellime Iehros pwe kitail en kak alehdi mour soutuk. (Sohn 3:16) Kasalepen limpoak ileile wet ketikihda mehn kahlemeng mwahu ohng kitail pwe kitail en alasang. Wahnpoaron Sohn ntingihdi: “Ma iei duwen sapwellimen Koht limpoak ong kitail met, eri kitail pil pwukoahki en poakpene nanpwungatail.”—1 Sohn 4:11, NW.
10. Iaduwen kitail kak ale kamwahu kan sang “riatail kan koaros”?
10 Ahmw iang towehda mihding kan nan Kingdom Hall pahn kihong uhk ahnsou keieu mwahu en kasalehda limpoak. Ke pahn tuhwong soangsoangen aramas wasao. Ke pahn mwadangete poakpoakehla me tohto nanpwungarail. Mehlel, mwekid oh ahnepen emenemen kin pil wekpeseng rehn irail oko me kin papah Siohwa. Ele mahs ke kin kalap pohnsehse irail oko me sohte kin iang perenki soahng kan me ke perenki oh pil amwa mwekid kin wekpeseng. Ahpw, Kristian akan anahne “poakohng riarail kan koaros.” (1 Piter 2:17, NW) Kahrehda, wiahki ahmw mehn akadei ken esehla irail oko me mih nan Kingdom Hall—pil iangahki irail oko me arail sounpar, mwomwerail, wasa re kohsang ie, de arail sukuhl weksang ahmw. Mwein ke kak diarada me emenemen irail ele kin deila ni soangen irair kaselel ieu.
11. Dahme kahrehda ken dehr pwunodki ma mie wekpeseng en irair kan en emenemen tohnmwomwohdiso nanpwungen sapwellimen Siohwa aramas akan?
11 Wekpeseng en irair akan en emenemen tohnmwomwohdiso en dehr wia mehkot me pahn kapwunode iuk. Karasepe ieu, iaduwen ma dene mie diren sidohsa kei me iang tangatang limwahmw oh wie tangatang kohwei nan ahl oapwoat. Kaidehn irail koaros soangen marahra tehieu, oh pil kaidehn koaros soangen kapw tehieu. Ekei irail tangatangkihier mwail tohto, ahpw ekei duwehte kowe me ahpwtehn tepiada tangada. Sohte lipilipil soangen wekpeseng pwukat, ahpw irail koaros wie tangatang nan ahl tehpwoat. Met pil duwehte aramas akan me towehda mwomwohdiso ieu. Kaidehn irail koaros kin kekeirada nan irair en Kristian ni soangen marahra tehieu. Oh pil, kaidehn irail koaros ahnekihpene soangen irair en paliwar oh irair en pepehm tehieu. Ekei ieiangehr kaudokiong Siohwa ki sounpar tohto, a ekei ahpwtehn tepida. Ahpw, koaros wie kekeid kohwei nan ahl me pahn kahluwalahng mour soutuk ni ar “miniminkihpene kupwur tehieu, oh lamalam tehieu.” (1 Korint 1:10, NW) Kahrehda, ken nantihong kilang irair mwahu kan me kin mih rehn tohn mwomwohdiso teikan, a kaidehn ken rapahki arail luwet akan. Ma ke pahn wia met, e pahn kihong poakpen aramas nan mohngiongomw, pwe ke pahn kakehr wehwehkihda me Koht kin ketiket rehn aramas pwukat. Oh ni mehlel, iei soangen wasakiset me ke pahn men mihmi ie.—1 Korint 14:25.
12, 13. (a) Ma aramas emen nan mwomwohdiso kansensuwedihukala, dahme ke kak wia? (b) Dahme kahrehda e kesempwal ken dehr kouimwintihti ong aramas me kansensuwedihukala?
12 Pwehki aramas koaros sohte unsek, ekei pak aramas emen nan mwomwohdiso kakete nda de wia mehkot me pahn katoutouwihala kapehdomw. (Rom 3:23) Pwehki e wehwehki ire wet, tohnpadahk Seims ntingihdi: “Kitail koaros kin sapwungala pak tohto. Ma aramas emen sohte kin sapwungala ni lokaia, eri aramas menet me unsek.” (Seims 3:2, NW) Dahme ke pahn wia ma aramas emen kansensuwedihukala? Lepin padahk en Paipel ehu mahsanih: “Loalokong en aramas emen kin kapweiekidi ah lingeringer, oh e wia mehkot lingan ohng ih en pohnsehsehla dahme sapwungo.” (Lepin Padahk 19:11, NW) En loalokong kin wehwehki en kaloalihala ahmw wehwehki irairo, pwehn wehwehki dahme poahsoanihada aramas emen e kak nda de wia mehkot. Me tohto rehtail me kin doadoahngki loalokong pwehn kak kilangada kahrepen pein kitail wiahda sapwung kan. Kitail soh pil doadoahngki loalokong pwe kitail en kak wehwehki oh mendahkihla sapwungalahn meteikan?—Madiu 7:1-5; Kolose 3:13.
13 Kitail dehpa manokehla me kitail uhdahn pahn mahk ohng meteikan ma kitail pahn ale sapwellimen Siohwa mahk. (Madiu 6:9, 12, 14, 15) Ma kitail kin kolokol padahk mehlel, eri kitail anahne kasalehong meteikan limpoak. (1 Sohn 1:6, 7; 3:14-16; 4:20, 21) Kahrehda, ma ke lelohng kahpwal ehu me pid emen nan mwomwohdiso, peiong ahmw lamalam suwed pwe ken dehr kouimwintihti ong aramaso. Ma ke likoukihda limpoak, ke pahn kin nantihong kapwungala kahpwalo, oh ke sohte pahn perki pek mahk ma ke kansensuwedihala emen aramas.—Madiu 5:23, 24; 18:15-17.
14. Soangen irair dah kan me kitail en likoukihda?
14 Atail likou en pali ngehn uhdahn pahn kipe irair akan me kin peipeiante irair en limpoak. Pohl ntingihdi: “Likoukihda limpoak ong me mih nan apwal akan, kadek, mpahi, oh karakarahk, aktikitik, oh kanengamah.” Irair pwukat, me pidada limpoak, kin wia kisehn sapwellimen Koht irair en “mour kapw.” (Kolose 3:10, 12) Ke pahn nantihong pwe ken kak likawihada soangen irair pwukat? Ahpw, mehlel ma ke likoukihda limpoak en pirien en pali ngehn, ke pahn ale kilelepen wia sapwellimen Sises tohnpadahk, pwe Sises mahsanih: “Pwe ihme aramas koaros pahn esehki me kumwail nei tohnpadahk, ma kumwail pahn limpoakpene.”—Sohn 13:35.
WASAHN MELEILEI
15. Iaduwen mwomwohdiso a kin duwehte wasahn ruk ehu?
15 Mwomwohdiso pil kin wia wasahn ruk kansenamwahu me ke kak diar meleilei. Nan mwomwohdiso, ke pahn diar aramas mohngiong mehlel akan me kin nantihong wia dahme pwung mwohn silangin Koht. Me tohto nanpwungarail me nantihongehr oh kesehlahr soangen wiewia suwed kan oh lamalam suwed kan me ele ke nantihong en powehdi ahnsou wet. (Taitus 3:3) Irail kak sewese iuk, pwe kehkehlik kin kohwong kitail en “sawaskihpene atail wisik toutou kan.” (Kalesia 6:2) Mehlel, mourki elen mour me pahn kahluwaiukalahng mour soutuk kin wia pein ahmw pwukoa. (Kalesia 6:5; Pilipai 2:12) Ahpw, Siohwa kin ketikihda mwomwohdiso en Kristian pwehn wia mehn sawas oh utuht kaselel ieu. Sohte lipilipil ia uwen laud en ahmw kahpwal akan, mie mehn sawas me pahn kamengei ohng uhk—mwomwohdiso limpoak ehu me pahn ieiang uhk ahnsou koaros nan ahnsoun apwal oh lokolok.—Pil kilang Luk 10:29-37; Wiewia 20:35.
16. Soangen sawas dah me elder kan nan mwomwohdiso kin kihda?
16 Kisehn irail akan me pahn kihong uhk sawas iei “kisakis kan me mih rehn ohl akan”—irail elder idihdda kan nan mwomwohdiso, de sounapwalih kan, me kin ngoangki arail pwukoa en sinsile sihpw akan. (Episos 4:8, 11, 12; Wiewia 20:28; 1 Piter 5:2, 3) Ohng irail elder pwukat, Aiseia kohpadahr me: “Emenemen irail pahn rasehng wasahn ruksang kisinieng oh melimel. Re pahn rasehng piletik kansenamwahu kan me kin tangatang nan wasa karakar kan, oh mwetehn paipalap ehu nan sapwtehn.”—Aiseia 32:2.
17. (a) Soangen sawas dah me Sises men ketikihda? (b) Soangen sawas dah me Koht ketin inoukihong sapwellime aramas akan?
17 Ni ahnsou me Sises ketiket sampah, irail kaunen pelien lamalam akan sohte kin apwalih aramas akan ni limpoak. Irair me aramas akan mih loale kin inenen kamwekidada nan kupwuren Sises, oh ih eri kin men apwalih irail, ahpw, ni mehlel arail irair en pali ngehn. Sises kin ketin kupwureirailla pwehki “irail kin kohsang wunerail oh kohkohseli mwahl duwehte sihpw me sohte sileperail.” (Madiu 9:36, NW) Ia uwen karasaras wet ah nohn duwehte aramas tohto nan rahnwet me kin kolokol pwunod en mohngiong oh sohte me irail pahn sohpeilahng pwehn ale sawas oh kamweitpen pali ngenerail! Ahpw, sapwellimen Siohwa aramas akan mie sawas en ngehn me re kin ale, pwe E ketin inoukihdi: “I pahn idihada arail kaun kei me pahn apwahpwalih irail. Nei aramas akan solahr pahn perki de masak mehkot, oh sohte emen rehrail pahn salongala.”—Seremaia 23:4.
18. Dahme kahrehda kitail en tuhkihong emen elder ma kitail anahne sawas en pali ngehn?
18 Esehla irail elder akan me idihdda nan mwomwohdiso. Irail ahneki koahiek laud en doadoahngki loalokong me pid duwen Koht, pwe irail ahneki koahiek kan me ntingdi nan Paipel. (1 Timoty 3:1-7; Taitus 1:5-9) Ke dehr perki tuhwong emen irail ma ke anahne sawas en pali ngehn ma ke men powehdi wiewia suwed ieu me ke ahnlahr oh apwaliki kesehla wiewia wet me sohte pwung ong sapwellimen Koht koasoandi. Ke pahn diarada me elder kan kin idawehn kehkehlik en Pohl me mahsanih: “Kumwail kakehlaka irail kan me nan kapehd tikitik, kumwail sewese me luwet akan, oh kanengemahiong aramas koaros.”—1 Deselonika 2:7, 8; 5:14.
PAIEKIHDA MELEILEI REHN SAPWELLIMEN SIOHWA ARAMAS AKAN
19. Kapai dah kan Siohwa kin ketikihong irail akan me kin rapahki meleilei nan sapwellime pwihn?
19 Edetehn ahnsou wet kitail kin koukousoan nan irair akan me sohte unsek, Siohwa kin ketikihong kitail mwenge, likou oh wasahn kousoan ni pali ngehn. Ahpw, mehlel, kitail pahn pil awiawih sapwellimen Koht inou me pid sampah kapw, wasa me kitail pahn kilang kapai kan nan paradais nin sampah. Ahpw, irail akan me wia kisehn sapwellimen Siohwa pwihn—ahnsou pwukat re alehier kapai en ahneki meleilei nan paradais en ngehn ehu me mie rehrail. Ohng irail pwukat, Esekiel kohpadahr: “Re pahn kousoan ni meleilei oh silasil mwahu, oh sohte emen me pahn kamasak irail.”—Esekiel 34:28, NW; Melkahka 4:8.
20. Iaduwen Siohwa a pahn ketin katingih iuk pwehki meirong me ke kin wia pwehn kaudokiong Ih?
20 Ia uwen kalahngan me kitail kak ahneki pwehki Siohwa ketikihda ni limpoak kapai en ngehn akan sang ni pein sapwellime Mahsen oh sang ni sapwellime pwihn! Ken nantihong karanih sapwellimen Koht aramas akan. Ke dehr dohweisang kapai pwukat pwehki dene ke masak dahme kompoakepahmw akan oh ahmw peneinei kan pahn ndahkin uhk pwehki ke men loalokongkihla Koht. Ekei pahn sapwungki pwehki ahmw kin iang patehng Sounkadehdehn Siohwa kan oh iang towehda mihding kan nan Kingdom Hall. Ahpw, Koht pahn ketin katingihkin uhk kapai me laudsang dahme ke kin meirongkihla pwe ken kak kaudokiong Ih. (Malakai 3:10) Oh pil, Sises mahsanih: “Mehmen me pahn mweidala imwe, de rie kan, de ine de seme de nah seri kan, de sapwe, pwehki ngehi oh pil rongamwahu, e pahn ale me laudsang nan mouren dih wet. E pahn ale pahn pak epwiki ni imwe, ni rie kan, ni ine, ni nah kan, nin sapwe—pil ni kamakam akan. A nan mour me pahn kohdo, e pahn ale mour soutuk.” (Mark 10:29, 30) Ehi, sohte lipilipil dahme ke pwilikihdi de nantihong pwehn powehdi, ke kak diar kompoakepahmw kan me kak sewese iuk en ahneki peren mehlel oh ke kak pil ahneki popohl en pali ngehn ni ahmw mih rehn sapwellimen Koht aramas akan.
SONG UWEN ME KE KOLEDI
Ihs me “ladu lelepek oh loalokong”?
Dahme Siohwa ketikihda pwehn kamwenge kitail ni pali ngehn?
Iaduwen irail oko nan mwomwohdiso en Kristian kak sewese kitail?
[Kilel kan nan pali 165]