Mwowohdisohn Kristian Utupen Mehn Sawas Me Kin Kakehle

POPI, emen lih me mahki sounpar 20 samwa, kin pwunodada pwehki irair kansensuwed ehu me pid peneinei me kohsang ah sohte kin kapehse mwahu ong ah pahpa oh nohno.a Mwurin ah wehkada audepen mohngiongih ong Kristian elder men oh ah pwoud, e ntinglahng ira: “I men kalahngankihong kumwa amwa koasoanehdi ahnsoun koasoiong ie. Kumwa sohte ese ia uwen kesempwal en met ong ie me kumwa nsenohkin ie. I kalahngankihong Siohwa ah ketikihong ie aramas me I kak likih oh koasoiong.”

Toula, emen lih me ah pwoudo ahpwtehn mehla me naineki seri pwulopwul (teenage) riemen, kin mihla nan pwunod oh apwal en mwohni. Ih oh nah seri kan kin kaukaule ale mwemweit en kakehle sang rehn pwopwoud en Kristian ehu sang nan mwomwohdiso. Mwurin ah powehdi ah irair kan, e kadaralahng ira kisinlikou ehu, oh koasoia: “I kin ahnsou koaros tamataman kumwa nan ahi kapakap kan. I kin tamanda amwa kin sewese ie oh utung ie pak tohto.”

Komw kin ekei pak pehm me komw “toutoukihla” kapwunod kan me wie lalaud nan sampah wet? (Madiu 11:28) “Paisuwed” kin kauwehkihla omw mour wiewia kamedek kan? (Eklesiasdes 9:11) Eri, komw sohte kelehpw. Ahpw nin duwen aramas pwunod kid kan diaradahr, komw pil kak diarada sawas nan mwomwohdisohn Kristian en Sounkadehdehn Siohwa kan. Nan tepin pahr C.E., wahnpoaron Pohl diarada me ekei ienge me pwoson kan kin keieu wia “sawas laud” ong ih. (Kolose 4:​10, 11) Met pil kak wiawihong uhk.

Utuht oh Sawas

Nan Pali Nting Sarawi en Krihk, lepin lokaiao “mwomwohdiso” kin kawehwehsang lepin lokaiahn Krihko ek·kle·siʹa, me wehwehki pwihn en aramas ehu me ekerekpene. Lepin lokaia wet kin wehwehki en miniminpene oh ehukihpene utuht.

Mwomwohdisohn Kristian kin utungada padahk mehlel en Mahsen en Koht oh kalohkiseli rongamwahu en sapwellime Wehi. (1 Timoty 3:15; 1 Piter 2:⁠9) Ahpw, mwomwohdiso kin pil kihda utuht oh sawas en pali ngehn ong irail ko me iang mwomwohdiso. Nan mwomwohdiso, emen kak diarada pwihn en kompoakepah kan me limpoak, oh nseno, me kin men sewese oh kamweit meteikan nan arail pwunod.​—⁠2 Korint 7:​5-7.

Tohnkaudok kan en Siohwa kin ahnsou koaros diar pereparail oh meleilei nan sapwellime mwomwohdiso. Sounmelkahkao kasalehda me e kin ahneki peren oh pepehm en meleilei nan mwomwohdisohn sapwellimen Koht aramas kan. (Melkahka 27:​4, 5; 55:14; 122:⁠1) Me duwehte nan rahnwet, mwomwohdisohn Kristian kin wia pwihn en me pwoson kan me kin kakehle oh kangoange emenemen.​—⁠Lepin Padahk 13:20; Rom 1:​11, 12.

Tohnmwomwohdiso kan kin ale padahk en “wia mwahu ong aramas koaros; ahpw mehlel ong irail kan me kisehn atail pwoson.” (Kalesia 6:10) Kasukuhl en Paipel me re kin ale kin kamwekid irail en kasalehda limpoak en Kristian oh limpoak mehlel ong emenemen. (Rom 12:10; 1 Piter 3:⁠8) Brother oh sister ngehnin kan nan mwomwohdiso kin mwekidki kadek, popohl, oh limpoak ohng meteikan. (Episos 4:⁠3) Re sohte kin wiahte tohnkaudok kan, ahpw re kin kasalehda limpoak nsenohki meteikan.​—⁠Seims 1:27.

Ihme kahrehda, me pahtou kan kak diarada nan mwomwohdiso irair me duwehte nan peneinei. (Mark 10:​29, 30) Pepehm me re kisehn pwihn ehu me kerenpene oh limpoakpene kin kakehle irail. (Melkahka 133:​1-3) Ki mwomwohdiso, “ladu lelepek oh loalokong” kin kihda “mwenge ahnsou me konehng.”​—⁠Madiu 24:45.

Sawas Sang Sounapwalih en Mwomwohdiso Limpoak kan

Tohnmwomwohdisohn Kristian kin kasik me re kak diarada nan mwomwohdiso sounapwalih kan me limpoak, kin wehwehki irair akan en meteikan, oh koahiek me kin kihda utuht en pali ngehn oh kangoang kan. Sounapwalih en mwomwohdiso kan me ahneki soahngen irair pwukat kin rasehng “wasahn rukusang kisinieng oh melimel.” (Aiseia 32:​1, 2) Elder kan, de sounapwalih en mwomwohdiso kan me idihdkihda ngehn sarawi, kin apwalih sapwellimen Koht aramas akan me ahneki irair en sihpw, oh kin kangoange me soumwahu kan oh me pahtou kan, oh rapahki pwehn kapwurehdo irail kan me wiahda dihp.​—⁠Melkahka 100:3; 1 Piter 5:​2, 3.

Ni mehlel, kaidehn tohn pwihn en elder kan en mwomwohdiso toahkte kei, me kak kamwahuwiala soumwahu en paliwar kan de soumwahu en pepehm kan me iengerail me pwoson kan kin lelohng. Nan koasoandi wet, me soumwahu kan anahnehte “toahkte.” (Luk 5:31) Mendahki met, soahngen sounapwalih pwukat kak sewese irail ko me anahne sawas ni pali ngehn. (Seims 5:​14, 15) Ni ahnsou kan koaros ma anahn, elder kan kin pil koasoanehdi sawas teikan.​—⁠Seims 2:​15, 16.

Ihs me wiahda koasoandi limpoak wet? Pein Siohwa Koht! Soukohp Esekiel kasalehda en Siohwa mahsanih: “Pein ngehi pahn rapahki nei sihpw kan oh apwalh irail, . . . I pahn pwurehng kasapahliraildo sang nan wasa koaros me re mwarahkpeseng . . . Pein ngehi me pahn wia silepen nei pelin sihpw, oh I pahn kin rapahkiong irail wasahn ar kommoal.” Siohwa kin pil nsenohki sapwellime sihpw kan me luwet.​—⁠Esekiel 34:​11, 12, 15, 16.

Sawas Mehlel ni Ahnsou me Pwung

Sawas mehlel uhdahn mih nan mwomwohdisohn Kristian? Ehi, oh karasaras kan mwuri kin kasalehda duwen wekwekpeseng en irair kan me mwomwohdiso kin sewese.

◆ Mehlahn kompoakepah men. En Anna pwoudo mehla mwurin ah kohwahki soumwahu laud ehu. “Sangete ahnsowo, rie Kristian kan kin kasalehiong ie limpoak mehlel,” liho koasoia. “Lokaia kadek sang rehn iengei me pwoson kan me re kalapw wiahiong ie pwehn utung ie oh kangoange ie, iangahki arail kin pwoalehiehdi, kin kapereniehda oh kihsang ahi nsensuwed, oh I kalahngankihong Siohwa met. Arail limpoak kin kahrehong ie en pehm me re utung ie laud, oh kakehle ie, oh I pehm me re limpoak nsenohkin ie.” Ele mie emen me komw kin poakohng me pil mehla. Ni soahngen ahnsowo, tohnmwomwohdiso kak kihda kamweit oh utuht me anahn.

◆ Soumwahu. Arthur, emen soundoulik sang Poland, kin kaukaule pwarek mwomwohdiso kan nan Central Asia pwehn kakehle irail ni pali ngehn. Erein ehu mwemweit pwukat, e soumwahuda oh ah mwahula pil lelohng kahpwal. Arthur tamanda ni ah kalahnganki: “I men padahkihong kumwail iaduwen brother kan oh sister kan nan [kahnimw ehu nan Kazakhstan] apwalih ie. Brother kan oh sister kan, me tohto rehrail I sehse​—⁠pil iangahki irail kan me perenki padahk mehlel​—⁠wahdohng ie mwohni, mwenge, oh wini kan. . . . Oh re perenki wia met.

“Medewehla ahi pepehm ni ahnsou me I alehdi ehu pwuhdo me audaudki mwohni oh iangahki kisinlikou wet: ‘Rie brother, I kadarwohng uhk ahi rahnmwahu. Nohno kihong ie mwohni en pwainki ais krihm, ahpw I koasoanehdi en kihong uhk pwe ken pwainki wini. Menlau mwadang mwahula. Siohwa anahne kitail ahnsou reirei. Kupwur mwahu en wiawihong uhk. Oh padahkihong kiht pil ekei koasoi kan me mwahu, oh diren kaweid. Vova.’” Ehi, nin duwen me sansalda nan irair wet, me pwulopwul kan oh me mah kan nan mwomwohdiso kak kihda sawas en kakehl ni ahnsoun soumwahu.​—⁠Pilipai 2:​25-29.

◆ Nsensuwed Laud. Teri inengieng laud en wiahla emen pioneer, de emen sounkalohk en Wehio kaukaule. Ahpw pwehki kahpwal akan, e anahne uhdisang pioneer. “I inenen nsensuwedkihla ahi nantiong papah nan irair wet ahpw I sohte kak kanekehla erein sounpar ehu,” e koasoia. Ni sapwung Teri kin lemeleme me Siohwa pahn kupwurki ih ihte ma e wiahda awa tohto nan ah papah ih. (Pil kilang Mark 12:​41-44.) Pwehki e uhdahn nsensuwed, e kin tohrohrla pwehn kelekelehpw. Eri, ahpw mwomwohdiso sewese.

Teri tamanda: “Emen sister pioneer mah kin men sewese ie oh kin rong ie ni ahi kasalehda ahi pepehm kan. Ni ahnsou me I pwuresang imweo, I pehm likamwete me toutou ehu kohsang reh. Sang ahnsowo kohla, sister pioneer menet oh ah pwoudo, me wia emen elder nan mwomwohdiso, kin kihong ie sawas katapan kan. Rahn koaros re kin dengwa ong ie idek ia irei. . . . Re mweidohng ie en iang ira nan ara onop en peneinei, me kasalehong ie duwen kesemwpalpen peneinei kan en mihmihpene.”

Me tohto​—⁠pil iangahki Kristian lelepek kan​—⁠kin pil nsensuwedla, mworusala, oh loaleid. Ia uwen atail kalahnganki me nan sapwellimen Koht mwomwohdiso mie sawas kan me limpoak oh soh roporop!​—⁠1 Deselonika 5:14.

Mwurin amw ale soahngen utuht wet, komw pahn pil pwurehng kapwurehiong pepehm en emen lih Kristian me pweida mwahu ni ah apwaliala soumwahu me ah pwoudo ahneki: “Pwehki limpoak oh epwel me kohieng kiht, I pehm likamwete Siohwa kin ketin apwalih kiht nan lime sang kahpwal wet. Ia uwen I kalahnganki en iang kisehn sapwellimen Siohwa pwihn kaselel!”

[Nting tikitik me mi pah]

[Kilel kan nan pali 30]

Kitail kak kihda sawas en kakehle me soumwahu kan, me pahtou kan, oh meteikan