Irelaud Isuh
Mie me Kin Uhwong nan Peneinei?
1, 2. (a) Karasaras dahieu me Sises ketikihda pwe en ketin kasalehda soaloalopwoat en kaunen pelien lamalam en mehn Suhs kan? (b) Dahme kitail kak sukuhlki sang sapwellimen Sises karasaras duwen me pwulopwul kan?
RAHN kei mwohn Sises eh pwoula, e keinemwe rehn pwihn en kaunen pelien lamalam en mehn Suhs kan duwen ire ehu. E mahsanih: “A dahme kumwail lemelemeiong karasaras wet? Ohl emen mie me naineki pwutak riemen. E ahpw kohla rehn me laudo oh ndahng, ‘Lao, kohwei mahs doadoahk rahnwet nan atail mwetin waino.’ A pwutako ahpw sapeng eh pahpao oh nda, ‘I kahng.’ Mwuhr, e ahpw koluhla oh wekidala eh lamalam, oh kohieila nan mwetin waino. A sahmo ahpw pil kohla rehn meteio oh ndahng soangohte. Meteio ahpw sapeng eh pahpa oh nda, ‘Me mwahu, I pahn kohla.’ E ahpw sohte kohla. Eri, ihs rehn pwutak riemenet me kapwaiada nsenen semeo? Irail ahpw patohwanohng Sises, ‘Me laudo.’”—Madiu 21:28-31.
2 Nan karasaras wet, Sises ketin kasalehda ahn kaunen pelien lamalam en mehn Suhs ko arail soaloalopwoat. Irail duwehte pwutak keriemeno, re inoukihda ren wia kupwuren Koht ahpw re sohte wia. Pahpa nohno tohto pahn esehda me sapwellimen Sises karasaraso kasalehda eh kin ketin wehwehki mouren peneinei. Sapwellime karasaras kasalehda mwahu me e kin apwal en ese dahme me pwulopwul kan kin medemedewe de pil kasawihada dahme re pahn wia. Mwein me pwulopwul men kin kahrehda kahpwal tohto ni eh pwulopwul, ahpw ni eh laudla, e wiahla aramas likilik oh wahun men. Kitail anahne tamataman met ni atail pahn koasoia kahpwal en me pwulopwul kan me kin uhwong.
SOANGEN ARAMAS DAH ME KIN UHWONG?
3. Dahme kahrehda pahpa nohno en dehr kin mwadangte medewe me neira serio kin uhwong ira?
3 Ekei pak, mwein ke kin rong duwen ekei me pwulopwul me kin uhwongada arail pahpa nohno. Mwein ke pil kin ese peneinei ehu me sohte kin kak kapwungala emen neirail seri me pwulopwul. Ahpw e kin apwal en ese ma iei serio kin uhdahn uhwong de soh. Oh e pil kakete apwal en wehwehki kahrepen ekei seri ar kin uhwong a ekei soh, mehnda ma irail koaros kohsang peneinei tehieu. Ma pahpa nohno kin pehm me emen neira seri ko pahn uhwong ira, dahme ira anahne wia? Pwe kitail en sapengala met, keieu kitail pahn koasoia duwen soangen aramas dah me kin uhwong.
4-6. (a) Soangen aramas dah me kin uhwong? (b) Dahme pahpa nohno anahne tamataman ma neira serio kin sapeik ekei pak?
4 Emen me kin uhwong kin pein nsenkihda oh pwurepwurehng sapeikiong de pelianda emen me ahneki manaman. Ei, “seri kan kin wia mehkot sapwung ni ar sohte wehwehki oh seukautih.” (Lepin Padahk 22:15) Eri seri koaros kin ekei pak pelianda pahpa nohno oh pil ekei aramas me ahneki manaman. Met kin uhdahn mehlel ni ahnsou me irail pwulopwul oh paliwararail oh arail pepehm kin kekeirda. Wekidekla kan nan mour en emen kin kahrehda pwunod. Ahnsou me emen pwulopwul iei ahnsou me wekidekla tohto pil kin wiawi. Noumw pwutak de serepein pwulopwul sohla kin wia seri ahpw e kin tepida wiahla aramas laud. Met kin kahrehda eh kin apwal ong ekei pahpa nohno oh seri kan ren ehupene ahnsou me seri ko pwulopwul. Pahpa nohno sohte kin men neira seri kan en mwadangete laudla, ahpw me pwulopwul kan kin men mwadang laudla.
5 Me pwulopwul men me kin uhwong kin mwamwahliki kaweid en eh pahpa nohno. Ahpw tamataman me ni eh kin sapeik ekeite pak, e sohte kin wehwehki me ih soun uhwong men. Mwein ekei seri sohte kin nsenohki padahk mehlel en Paipel nin tapio, ahpw met sohte kin wehwehki me irail soun uhwong kei. Nin duwen pahpa nohno, ke dehr kin mwadang medewe me noumw serio wialahr soun uhwong men.
6 Ia duwe, me pwulopwul koaros kin uhwong arail pahpa nohno? Soh. Mehn kadehde kan kin kasalehda me me pwulopwul malaulau kei me kin uhdahn uhwong arail pahpa nohno. Ahpw ia duwen ma seri men kin keptakai oh pwurepwurehng uhwong? Dahme kin kahrehda soangen uhwong wet?
KAHREPEN UHWONG
7. Ia duwen irair en sampah me Sehdan kin kaunda eh kak kahrehiong seri men en uhwong?
7 Kahrepe keieu laud me kahrehda uhwong iei irair en sampah me Sehdan wiahda. “Sampah unsek mi pahn manaman en Me Suwedo.” (1 Sohn 5:19) Sampah me Sehdan kin kaunda eledahr irair keper ehu me Kristian akan anahne pelianda. (Sohn 17:15) Irair wet kin keper oh suwed sang mahs. (2 Timoty 3:1-5, 13) Ma pahpa nohno sohte kin kasukuhlih, panawih oh pere neirail seri kan, madamadau me kin “kamwakamwakid oh kakaun irail kan me uhwong Koht” pahn kak mwadang kauwehla me pwulopwul kan. (Episos 2:2) Met pil kin iangahki kasongosong sang pelierail kan. Paipel mahsanih: “Ma ke pahn kompoakepahnki me pweipwei kan, ke pahn ohkihla.” (Lepin Padahk 13:20) Me pil duwehte met, emen me kin werekiong irail kan me ahneki madamadau en sampah wet pahn pil ahnekihla soangen madamadauohte. Me pwulopwul kan kin anahne sawas ahnsou koaros pwe ren kin wehwehki me peikiong kaweid sang rehn Koht iei poahsoanpen mour me keieu mwahu.—Aiseia 48:17, 18.
8. Mehnia ire mehlel kan me kakete kahrehda seri men eh kin uhwong?
8 Irair en nan peneinei pil kak kahrehda uhwong. Karasepe, ma emen rehn pahpa de nohno kin kalapw sakau, doadoahngki wini en kasahliel de lemeiong eh pwoud, ahn neira seri pwulopwul kan madamadau ong mour kak ohla. Pil kak mie uhwong nan peneinei me kin meleilei ma emen serio pehm me eh pahpa nohno sohte kin katapanki ih. Kaidehn irair kan en nan peneineite me kin kahrehda me pwulopwul kan en kin uhwong. Ekei seri kin mwamwahliki kaweid me pahpa nohno kin kihda mendahki pahpa nohno kin doadoahngki kaweid sang Koht oh pil kin pere irail sang irair en sampah. Dahme kahrehda? Mwein pwehki ehu kahrepen atail kahpwal, iei soh unsek. Pohl koasoia: “Dihp tepidohng sampah sang rehn aramas tehmen [Adam], ahpw tialahng mehla. Eri, mehla lelohngehr aramas koaros, pwe aramas koaros dipadahr.” (Rom 5:12) Adam iei soun uhwong me kin roporop ong pein ih oh e kihong kadaudoke koaros sohso suwed ehu. Ekei me pwulopwul pilada ren kin uhwong duwehte arail pahpa kahlap Adam.
WEKPESENG EN AHN ILAI OH REOPOHAM ARA PENEU
9. Soangen mwomwen kaweid dah riau me kakete kahrehiong seri men en uhwong?
9 Pil ehu kahrepen me pwulopwul kan ar kin uhwong iei pwehki madamadau sapahrek en pahpa nohno ong kaiahnehda seri. (Kolose 3:21) Ekei pahpa nohno kin nohn keinapwih oh ukiong seri kan ni arail kin kaiahne irail. Ekei kin nohn mweidala nsenen neirail seri kan oh sohte kin kihda kaweid me pahn pere me pwulopwul kan me soakoahiek. E sohte kin mengei en toupahrek. Seri kan wekpeseng oh arail anahn pil wekpeseng. Emen mwein pahn anahne sawas laud sang meteio. Ahpw, karasaras en Paipel riau pahn kasalehda keperpen kaweid me nohn daulihala de nohn mweidala.
10. Dahme kahrehda Ilai sohte wia pahpa mwahu men mendahki eh wia samworo lapalap lelepek men?
10 Samworo lapalap en Israel Ilai wia pahpa men. E kin papah erein sounpar 40 oh e uhdahn ese Kosonned en Koht. Ilai kin kapwaiada eh pwukoa kan ni lelepek oh ele e padahkihongehr nah pwutak ko, Opni oh Pineas, Kosonned en Koht pwon. Ahpw Ilai nohn mweidohng nsenen nah pwutak ko. Opni oh Pineas kin papah nin duwen samworo kei ahpw ira “inenen mwersuwed” oh kin men kaitarala ara men mwenge oh ineng suwed. Ni ara wiahda tiahk suwed wasa sarawi, Ilai sohte kihsang ara pwukoa. E lipwoarehte ira. Sang ni eh mweidohng nsenara, Ilai kin wauneki nah pwutak ko laudsang Koht. Pwehki met, nah pwutak ko pelianda sapwellimen Siohwa kaudok min oh ahn Ilai peneinei pwon lelohng kahpwal.—1 Samuel 2:12-17, 22-25, 29; 3:13, 14; 4:11-22.
11. Dahme pahpa nohno kak sukuhlki sang ahn Ilai mehn kahlemeng suwed?
11 Nein Ilai seri ko laudlahr ni ahnsou me soahng pwukat wiawi, ahpw poadopoad wet kin kasalehda keperpen sohte kin kihda peneu. (Pil kilang Lepin Padahk 29:21.) Mwein ekei pahpa nohno kin medewe me mweidohng nsenen seri iei kasalepen limpoak oh irail sohte kin wiahda koasoandi teng kan me kin sansal oh konehng. Oh re pil sohte kin tehk ma neirail seri kan kin kapwaiada. Irail sohte kin kapwungala neirail seri kan ni limpoak mehnda ma seri ko pil kin kauwehla kosonned en Koht. Pwehki met, neirail seri kan pil pahn kakete sohla kin rong kaweid en pahpa nohno de pil kaweid sang meteikan.—Pil kilang Eklesiasdes 8:11.
12. Sapwung dah me Reopoham wiahda me pid eh doadoahngki eh manaman?
12 Reopoham wia karasepen emen me nohn doadoahngki eh manaman daulihala. Ih me kaimwiseklahn nanmwarki en wehin Israel pwon, ahpw e sohte wia nanmwarki mwahu men. Reopoham sohsohki sahpw ehu me aramas akan kin nsensuwed pwehki eh pahpa Solomon kalaudehla arail doadoahk. Ia duwe, Reopoham wehwehki arail pepehm? Soh. Ni ahnsou me wiliaparailo peki en kamarahda arail doadoahk, e sohte rong kaweid mwahu sang sounkaweid mah kan ahpw e koasoanehdi en pil kalaudehla arail doadoahk. Eh aklapalap kahrehda uhwong sang kadaudok eisek en paliepeng oh wehio pwalpeseng wiahla wehi riau.—1 Nanmwarki 12:1-21; 2 Kronikel 10:19.
13. Dahme pahpa nohno kak wia pwe ira en dehr wia soangen sapwung me Reopoham wiadahro?
13 Pahpa nohno kak sukuhlkihdi ire kesempwal kan sang nan Paipel me pid Reopoham. Ira anahne ‘rapahki sawasaparail rehn KAUN-O’ ni kapakap oh kin kasawih wiepen ara kin kakairada neira seri ni ara kin doadoahngki kaweid en Paipel. (Melkahka 105:4) Eklesiasdes 7:7 (NW) mahsanih: “Kahpwal kak kahrehiong emen en wia mwekid pweipwei.” Koasoandi mwahu kin kihong me pwulopwul kan saledek oh pil kin pere irail sang keper. Ahpw koasoandi en peneinei en dehr nohn kakos pwe re de sohla likih pein irail. Ma pahpa nohno kin nantihong toupahrek ni ara kin padahkihong seri kan dahme re kak wia oh pil kin koasoanehdi teng dahme ren dehr wia, pali laud en me pwulopwul kan kakete sohte uhwong pahpa nohno.
KAITARALA ARAIL ANAHN KAK IREHDI UHWONG
14, 15. Ia duwen pahpa nohno ara pahn kilangwohng kekeirdahn neirail seri?
14 Mendahki pahpa nohno kin perenki kilang neira seri men eh wie lalaudla, mwein ira pahn pwunod ni ahnsou me neira seri pwulopwul men tepida men wiahda pein eh pilipil. Erein soangen ahnsou duwehte met, dehr pwuriamwei ma ekei pak me pwulopwul men kin keptakai oh sohte men peikiong koasoandi kan. Ken tamataman me ahn pahpa nohno Kristian kan arail mehn akadei iei en kakairada Kristian men me koahiek oh likilik.—Pil kilang 1 Korint 13:11; Episos 4:13, 14.
15 Pahpa nohno en dehr kin nda soh ni ahnsou me neira seri pwulopwul kan peki rehra en kalaudehla arail saledek en wia dahme re men wia mendahki e kin apwal. Seri men anahne kekeirda mwahu. Ekei me pwulopwul kin ahneki madamadau en aramas laud. Karasepe, Paipel kin mahsanihki Nanmwarki pwulopwul Sosaia: “nindokon eh wie pwulopwulte [mpen sounpar 15], e tapihada kaudokiong Koht en eh pahpa kahlap Nanmwarki Depit.” E sansal me me pwulopwul menet wia aramas likilik men.—2 Kronikel 34:1-3.
16. Dahme seri kan anahne wehwehki ni arail pwukoa kin lalaudla?
16 Ahpw saledek kin kalaudehla pwukoah. Ihme kahrehda kin mweidohng noumw seri men me lalaudla en pehm imwilahn ekei eh pilipil oh wiewia kan. Ire mehlel wet, “mehkot me aramas pahn padokedi, ihme e pahn dolung” kin doadoahk ong me pwulopwul kan oh pil me laud kan. (Kalesia 6:7) Ke sohte kak pere noumw seri kan kohkohlahte. Ahpw ia duwen ma noumw serio men wia mehkot me ke uhdahn sapwungki? Nin duwen pahpa de nohno likilik men, ke anahne nda “Soh.” Oh ni ahnsou me ke kawehwehiong serio kahrepe, ke sohte pahn wekidala omw soh ong ei. (Pil kilang Madiu 5:37.) Ahpw song ken nda “Soh” ni meleilei oh kamantik, pwehki “sapengki ngihl tikitik kin kameleilei lingeringer.”—Lepin Padahk 15:1.
17. Soahng dah kan me pahpa nohno anahne wiahiong me pwulopwul kan?
17 Me pwulopwul kan anahne kaiahn me sohte kin wekiwekseli, mehnda ma kaidehn ahnsou koaros me re kin pwungki koasoandi kan oh soahng kan me arail pahpa nohno kin kalikirailsang. E kin kapwunod ma koasoandi kan kin kalapw wekila pwehki pepehm en pahpa de nohno. Patehng met, ma kangoang oh sawas kin kohwong me pwulopwul kan ni ahnsou me anahn pwe ren kin powehdi arail namenek de sohte koapworopworki pein irail, re pahn laudla oh wiahla aramas likilik kei. Me pwulopwul kan pil kin kasalehda arail kalahngan ni ahnsou me pahpa nohno kin likih irail.—Pil kilang Aiseia 35:3, 4; Luk 16:10; 19:17.
18. Ia ekei ire mehlel duwen me pwulopwul kan me kin kangoange pahpa nohno kan?
18 Pahpa nohno kak peren ni arail kin ese me seri kan kin kekeirda mwahu ma mie popohl, likilik oh limpoak nan arail peneinei. (Episos 4:31, 32; Seims 3:17, 18) Me pwulopwul tohto kin keirda nan peneinei me kin sakau, lemei de wia soahng suwed teikan, ahpw re powehdi soahng pwukat oh re laudla oh wiahla aramas mwahu kei. Eri ma ke wiahiong imwamwailo en wia wasa ehu me seri kan pahn nsenamwahu oh ese me re pahn ale limpoak oh epwel mwahu me iangahki peneu de kaiahn me kin pahrekiong Paipel, seri kan pahn keirda oh wiahla aramas kei me ke pahn perenki.—Pil kilang Lepin Padahk 27:11.
NI SERI KAN AR KIN LELOHNG KAHPWAL
19. Mendahki pahpa nohno anahne padahkihong seri men duwen eh pahn momour, dahme serio anahne wia?
19 Ma pahpa nohno kin kapwaiada ara pwukoa, e pahn imwila mwahu. Lepin Padahk 22:6 mahsanih: “Padahkihong kisin seri men duwen eh pahn momour, eri, e pahn tamatamante erein eh mour.” Ahpw ia duwen ma seri kan ahneki kahpwal laud mehnda ma arail pahpa oh nohno mwahu? Ia duwe, met kak wiawi? Ei. Kitail anahne wehwehki lepin padahk wet ni atail kapahrekiong iretikitik teikan me kasalehda kesempwalpen seri men eh anahne “rong” oh peikiong eh pahpa nohno. (Lepin Padahk 1:8) Pahpa nohno oh serio anahne sawaspene ni arail kapwaiada kaweid en Paipel kan pwe peneinei en kak ehupene. Ma pahpa nohno oh seri kan sohte kin sawaspene, e pahn mie kahpwal.
20. Ni ahnsou me seri kan wiahda sapwung pwehki ar sehse lamalam, dahme pahpa nohno pahn kak wia?
20 Dahme pahpa nohno anahne wia ni ahnsou me emen neira seri me pwulopwul sapwungala oh lelohng kahpwal? Ih ahnsowo me serio keieu anahne sawas. Ma pahpa nohno tamataman me ira kin sewesewese me pwulopwul soakoahiek men, ira sohte pahn mwadang lingeringerda. Pohl kaweidki me koahiek kan nan mwomwohdiso: “Ma mie emen rehmwail me lohdiong nan sapwung ehu, kumwail kan me poadidi . . . kumwail kapwungala. Ahpw kumwail pahn kamantik.” (Kalesia 6:1) Pahpa nohno pil kak wia met ni ahnsou me ira kin sewese me pwulopwul men me wiahda sapwung pwehki e sehse lamalam. Ni pahpa nohno ara kin kasalehda kahrepen wiewiao eh suwed oh dahme e kak wia pwe en dehr pwurehng wia met, ira anahne kasalehda me eh wiewia me suwed, a kaidehn ih.—Pil kilang Sud 22, 23.
21. Dahme pahpa nohno anahne wia ma ira kin idawehn koasoandi en mwomwohdiso ni ahnsou me neira seri wiahda dihp laud ehu?
21 Ahpw ia duwen ma me pwulopwul men wiahda mehkot me uhdahn suwed? Ih ahnsou me serio anahne sawas tohrohr oh kaweid mwahu. Ni ahnsou me emen tohnmwomwohdiso kin wiahda dihp laud ehu, e kin ale kangoang pwe en koluhla oh kohla rehn elder kan pwe en ale sawas. (Seims 5:14-16) Ma e koluhla, elder kan pahn sewese pwe en pwurehng ahneki nanpwungmwahu rehn Koht. Nan peneinei, pahpa nohno me pwukoahki sewese neira seri pwulopwul me wiahda sapwung, ahpw ira pil anahne koasoiaiong elder kan kahpwalo. Ira en dehr kin ekihsang elder kan dihp laud me emen neira seri wiahda.
22. Soangen madamadau dah me pahpa nohno pahn ahneki ni ara pahn kahlemengih Siohwa ma neira seri men wiahda dihp laud?
22 E kin uhdahn apwal ma nein emen seri kin lelohng kahpwal laud. Pwehki pahpa nohno nsensuwed laud, mwein ira pahn lingeringer oh kamasakda serio, ahpw met pahn kansensuwedihala serio. Tamataman me omw wiewia ong me pwulopwul men ahnsou me kahpwal pwukat kin pwarada kak kamwakid eh mour ahnsou kohkohdo. Pil tamataman me Siohwa ketin kupwurki mahkohng sapwellime aramas kan me kin sohpeisang ahl me pwung, ma re pahn kin koluhla. Tehk dahme Siohwa ketin mahsanih: “Kumwail kohdo kitail kapwungala mahs ire pwukat. Mehnda ma kumwail weitahtahkilahr dipamwail kan, ahpw I pahn kamwakeleikumwailda duwehla sinoh. Mehnda ma dipamwail wiahla mwahi weitahta douluhl, ahpw kumwail pahn pwetepwetala duwehla wunen sihpw.” Ia uwen mwahu en sapwellime kahlemeng ong pahpa nohno kan!—Aiseia 1:18.
23. Ni ahnsou me emen neira seri ko pahn wiahda dihp laud, dahme pahpa nohno anahne wia oh dahme ira sohte pahn wia?
23 Kangoange seri me sapeiko pwe en wekidala eh wiewia suwed. Peki kaweid pwung sang pahpa nohno koahiek kan oh elder kan nan mwomwohdiso. (Lepin Padahk 11:14) Dehr kin pehmara oh dehr kin nda de wia soahng kan me pahn kahrehiong serio en apwalki pwurodo rehmw. Dehr lingeringer de nsensuwed daulihala. (Kolose 3:8) Dehr pwangahkihda sewese noumw serio. (1 Korint 13:4, 7) Mendahki omw kin kailongki me suwed, dehr sempoakla oh kadakadaur omw mwakar ong serio. Me keieu kesempwal, pahpa nohno en kin wiahda mehn kahlemeng mwahu oh ara pwoson Koht en kin kehlail.
SEWESE SERI MEN ME PILADAHR EN UHWONG
24. Irair kansensuwed dahieu me kin wiawi ekei pak nan peneinei Kristian kan oh dahme pahpa de nohno anahne wia?
24 Ekei pak, e kin sansal me me pwulopwul men kin piladahr en uhwong oh mwamwahliki dahme Kristian kan kin kesempwalki. Eri pahpa nohno pahn uhd nantihong pere oh kamwahwihala mouren neira seri teikan. Kanahieng pwe ken dehr nohn kin kedirepwkihla noumw seri me uhwongo oh sohla sewese noumw seri teiko. Dehr ekihsang tohnpeneinei teikan duwen kahpwalo, ahpw koasoiaiong irail dahme konehng irail en ese ni ahl me pahn kangoange irail.—Pil kilang Lepin Padahk 20:18.
25. (a) Sang ni ara idawehn koasoandi en mwomwohdiso, dahme pahpa nohno pahn kin wia ma seri men piladahr en uhwong ira? (b) Dahme ira anahne tamataman ma emen neira seri ko kin uhwong?
25 Wahnpoaron Sohn koasoia duwen emen nan mwomwohdiso me wiahla soun uhwong men me sohte men wekila: “Kumwail dehr kasamwolong nan imwamwail, oh dehr rahnmwahwih.” (2 Sohn 10) Mwein pahpa nohno kin pehm me ira anahne wia met ong neira seri me sounpar 18 de daulih me kin uhwong ira. Mendahki e kin uhdahn apwal oh kansensuwed en wia met, ekei pak e kesempwal pwe en pere meteikan nan peneinei. Pahpa nohno anahne pere oh apwalih ara peneinei. Ihme kahrehda ira en kin kolokol kaweid me kin sansal, wehwe oh toupahrek me pid tiahk mwahu. Koasoiong noumw seri teikan. Kasalehiong irail me ke kin men ese dahme re kin wiewia nan sukuhl oh mwomwohdiso. Pil ndaiong irail me ke sohte kin kailongki me wiahda dihpo, ahpw eh tiahko me ke uhdahn sapwungki. Kasalehda uwen omw kin tatki tiahk suwedo, a kaidehn serio. Ni ahnsou me nein Seikop pwutak riemeno wiahda kahpwal nan arail peneinei pwehki ara tiahk lemei, Seikop keriahla ara wiewia lemeio, a kaidehn ira.—Senesis 34:1-31; 49:5-7.
26. Ia duwen pahpa nohno ara kak nsenamwahu ma emen neira seri kin pilada en uhwong ira?
26 Mwein ke kin pehm me kowe me pwukoahki dahme wiawi nan omw peneinei. Ahpw ma ke kin kapakap oh wiahier uwen omw kak oh kin idawehn sapwellimen Siohwa kaweid kan ni uwen omw kak, ke sohte anahne kapwukoahkin uhk. Ke dehr kin nsensuwed pwe ni mehlel sohte pahpa de nohno me unsek, ahpw ke kin nannanti wia pahpa nohno mwahu. (Pil kilang Wiewia 20:26.) Naineki seri men me kin piladahr en uhwong kumwa kin uhdahn kansensuwed. Ahpw ma met kin wiawi, ken ese me Koht ketin mwahngih oh e sohte pahn ketin likidmeliehla sapwellime ladu lelepek kan. (Melkahka 27:10) Eri nantihong pwe imwomwo en kin wia wasa ehu me sohte keper oh kin kansenamwahu ong noumw seri teikan.
27. Dahme pahpa nohno kak koapworopworki ahnsou koaros ni ara kin tamanda karasaras en pwutak me salongalao?
27 Ke dehr sohla koapworopwor. Omw kin nannanti kaiahne serio mahso ni ahl me konehng pahn kakete kamwakid eh mohngiong oh kapwungala eh madamadau. (Eklesiasdes 11:6) Peneinei Kristian tohto pil lelohngehr soangen kahpwal wet oh ekei neirail seri ketihwo ko pwurehng pwurodo rehrail duwehte pwutak me salongala me mi nan sapwellimen Sises karasaraso. (Luk 15:11-32) Met pil kin kak wiawihong omw peneinei.
IA DUWEN IRE MEHLEL EN PAIPEL PWUKAT EH KAK SEWESE . . . PAHPA DE NOHNO EN IREHDI UHWONG LAUD NAN PENEINEI?
Madamadau en sampah kak kauwehla seri men ma e sohte kin ale sawas.—Lepin Padahk 13:20; Episos 2:2.
Pahpa nohno anahne toupahrek ong ara kin irehdi de mweidala nsenen neira seri.—Eklesiasdes 7:7, NW; 8:11.
Anahne kapwungala tiahk sapwung kan ni kamantik.—Kalesia 6:1.
Irail akan me wiahda dihp laud kak ‘kehlailda’ ma re koluhla oh ale sawas.—Seims 5:14-16.
[Koakon nan pali 96]
KOASOIONG OMW PAHPA NOHNO
Me pwulopwul kan pahn kin peikasal oh pwunod ni ahnsou me arail saledek en wiahda pein arail pilipil kin lalaudla. Mwein re kin pehm me re sohte pahn kak pein apwalih irail. Met kin duwehte arail kin alialu pohn ahl me likekiris. Kumwail me pwulopwul kan, koasoiaiong amwail pahpa nohno dahme kumwail kin masak oh pwunodki. (Lepin Padahk 23:22) Ma ke kin pehm me omw pahpa nohno nohn kin kakose iuk, a ken koasoiaiong ira me ke men ira en ekis kalaudehla omw saledek. Koasoiong ira ni ahnsou me ke nsenamwahu oh ahnsou me ira sohte kin kedirepw. (Lepin Padahk 15:23) Rong kanahieng emenemen.
[Kilel nan pali 97]
Seri kan pahn kak kekeirda oh wiahla aramas likilik ma arail pahpa nohno sewese irail ren kin powehdi arail kahpwal en me pwulopwul