Kingdom News No. 35
Aramas Koaros Pahn Kak Limpoakpene?
Limpoak Ong Mehn Mpatail Kan Pahn Loula
ARAMAS rar kei kin nsensuwedla, irail sehse iawasa irail pahn ale sawas. Emen lih en pisnes koasoi: ‘Pwong ehu emen liohdi me kin kousoan lihmwai me letilet ni ei wenihmw oh ndaiong ie me e sangat. Ngehi ndahiong ih ni lokaia kamantik ahpw inen me I kedirepw. Liho pek mahki e kedirepwehie oh e kohkohla.’
Ahpw kainsensuwed pwehki, ni pwongo, liohdi menet kamehla pein ih. Mwurin met, lih en pisnes menet koasoi me e sukuhliki “mehkot kesempwal.”
Sohte kasalehda limpoak ong mehn mpatail kan kin kalap imwila suwed. Erein mahwen nanpwungen keinek kan nan sahpwen Bosnia oh Herzegovina, mahs wehi pwukat iang kisehn wehin Yugoslavia, tohto sang aramas rar kalipilipla sang imwarail kan oh aramas nen kei kamakamala. Ihs me wia met? “Mehn mpat kan,” serepein patou men nda ahnsou e peukeus sang eh wasahn kousoan. “Se ese irail.”
Nan Rwanda aramas lop kei kamakamala, pali laud en ahnsou, mehn mparail kan me kemehla irail. “Hutu oh Tutsi kin kousoanpene, pwopwoudpene, oh irail sohte nsenohkin ihs me Hutu de ihs me Tutsi,” nuhspepa en The New York Times kosoia. “Eri, mwuhr, mehkot wiawi, oh kamakam tepida.”
Duwehte, Mehn Suhs akan oh mehn Arab kan nan Israel kin kousoanpene ahpw irail kin kailokpene. Irairo duwehte Kahdolik kan oh Prohs kan nan sahpwen Ireland, oh pil aramas tohto nan sahpw teikan. Ehden nan poadoapoad en sampah wet me aramas tohto kin sempoakpene.
Dahme Kahrehda Limpoak ong Mehn Mpatail kan Loukihla?
Atail Sounkapikada kin ketkihda pasapeng. Sapwellime Mahseno, iei Paipel, kadanekihla atail ahnsou “imwin rahn akan,” ahnsou ehu me kohkohp en Paipel kohpada, me aramas akan pahn “sempoak.” Me pid “ahnsou apwal kei,” oh iren Paipel kan pil kahdaneki ansouwet “imwin koasondi suwed wet,” Sises Krais kohpada me “limpoak en me tohto pahn loula.”—2 Timoty 3:1-5; Madiu 24:3, 12.
Ehu kilel me kitail kin kousoan ni imwin rahn akan en sampah wet, iei loulahn limpoak en aramas akan. Ahpw, kitail kak perenki rohngwet pwehki ni ahnsou keren aramas suwed en sampah wet pahn sohrala oh ehu sampah kapw me pahn doadoahngki limpoak pahn wilianda.—Madiu 24:3-14; 2 Piter 2:5; 3:7, 13.
Ahpw kitail kin ahneki kahrepe mwahu ehu en kamehlele me soahngen wekidekid kapw wet pahn kak wiawi—me aramas koaros pahn kak limpoakpene?
Limpoak ong Mehn Mpatail kan—Uhdahn Pahn Wiawi
“A ihs me mehn mpei?” emen sounpadahk en kosonnedo nan keieu senturi idek rehn Sises peidek wet. Sohte peikidpe me e lemeleme me Sises pahn sapengki ih, ‘Iengeomw, mehn Suhs akan.’ Ahpw nan ehu poadopoad me pid duwen ohlen Sameria men, Sises kasalehda me aramas akan me kin kohsang wehi teikan, irail pil wia mehn mpatail kan.—Luk 10:29-37; Sohn 4:7-9.
Sises kasansalehda, me likin poakohng Koht, limpoak ong mehn mpatail kan pil anahne kaweid atail mour. (Madiu 22:34-40) Ahpw mie pwihn en aramas ehu me kin uhdahn poakohng mehn mparail kan? Kristian en mahs kin wia met! Aramas akan ese irail sang ahr limpoak ong meiteikan.—Sohn 13:34, 35.
Iaduwen nan rahnpwukat? Mie aramas akan me kin kasalehda limpoak me duwehte Krais? Pwuhken Encyclopedia Canadiana koasoia: “Doadoahk en Sounkadehdehn Siohwa kan kin pwurehng kamourada dahme Sises oh sapwellime tohnpadahk kan kin wia mahs . . . Koaros kin perien pene.”
Ia wehwehn met? Met kin wehwehki me Sounkadehdehn Siohwa kan sohte kin mweidong—lipilipilki keinek oh wehi teikan—pil sohte mweidong ehu karepe ren kailongki de kamehla mehn mparail. Irail pil sohte pahn kamehla aramas teikan, pwehki ni karasaras re wekidohngehr neirail kedlahs akan ong ni mehn deipwel oh neirail ketieu kan ong ni naipokos. (Aiseia 2:4) Aramas akan kin ese me Sounkadehde kan kin pein men sewese mehn mparail kan.—Kalesia 6:10.
Ihme kahrehda soun nting men en ehu nuhspepa, California, Sacramento Union ntingihdi: “Ma aramas koaros nin sampah pwon pahn alasang Sounkadehdehn Siohwa kan, kailok oh kamehla aramas akan sohlahr pahn wiawi, limpoak pahn kaunda kitail.” Nan Hungary, mie emen soun nting en makisihn me adaneki Ring me ntingihdi: “I pein medemedewe oh lemeleme ma Sounkadehdehn Siohwa kelepw me kin memour nin sampahwet, mahwen sohlahr pahn wiawi, oh ihte pwukoah kan en polis iei en katanga tangatang en weren nansapw kan nan ahl oh kihda passport kan.”
Ahpw e sansal me wekidekla laud ehu nan sampah wet anahne wiawi ma aramas koaros pahn kak limpoakpene. Iaduwen met pahn wiawi? (Menlau kilang pali me keieu mih ni imwio.)
Ni Ahnsou Aramas Koaros Pahn Limpoakpene
KAPAKAP ehu me Sises Krais wia kin kasansalehda me wekidekla laud ehu pahn wiawi ni ahnsou keren. Nan eh padahk ndand pohn Nahna, Sises padahkiong kitail en kapakapki: “Mweimwei en pweida wasa koaros, kupwuromwi en kin wiawi nin sampah duwen eh kin wiawi nanleng.”—Madiu 6:10, King James Version.
Dahkot Wehin Koht? Met uhdahn koperment ehu, me kin kaunda sang nanleng. Sises Krais, iei “Soupeidi en Popohl,” idihda sang Seme en wiahla Kaun.—Madiu 10:7; Aiseia 9:6, 7; Melkahka 72:1-8.
Ni ahnsou me Wehin Koht pahn ketido, dahme pahn wiaiong sampah me diren kailok wet? “Wehio,” pahn “kauwehla” koperment suwed kan en sampah wet. (Daniel 2:44) Paipel kawehwehda: “Sampah wet oh mehkoaros nin sampah me aramas kin inengieng kin sosohrala . . . , ahpw me kin kapwaiada kupwur en Koht pahn momour kohkohlahte.”—1 Sohn 2:17.
Me pid sapwellimen Koht sampah kapwo, Paipel mahsanih: “Me pwung kan pahn koukousoan nan sahpwo, oh re pahn sapwenikihla kohkohlahte.” (Melkahka 37:9-11, 29; Lepin Padahk 2:21, 22) Met pahn wia ahnsou kaperen ehu! “Mehla solahr pahn wiawi, solahr mwahiei, solahr nsensuwed, solahr medek. Soahng mering kan sohralahr.” (Kaudiahl 21:4) Pil irail kan me mehla pahn pwurehng mourada, oh sampah pwon pahn wiahla paradais.—Aiseia 11:6-9; 35:1, 2; Luk 23:43; Wiewia 24:15.
Ma kitail men mour nan sampah inouda kapw wet, kitail pahn anahne sukuhliki en limpoakpene, nin duwen Koht kin padahkiong kitail. (1 Deselonika 4:9) Emen me kohsang sahpw en pali en Oriental me wia tohnsukuhl en Paipel koasoia: “I kin kasikasik ahnsou ehu, nin duwen me Paipel inoukihong kitail, ni ahnsou aramas koaros pahn sukuhliki en limpoakpene.” Oh kitail kak liki me Koht pahn kolokolte sapwellime inou kan! Koht mahsanih, “I pahn kapwaiada ei koasoandi kan koaros.”—Aiseia 46:11.
Ahpw, ma komw men paiekihda kapai kan pahnangin Wehin Koht, komw anahne audaudki loalokong en Paipel, nin duwen aramas mehlel kan rar kei kin wia nin sampah pwon. (Sohn 17:3) Brochure me mih ni pali 32, Dahme Koht Kupwurki Kitail en Wia? pahn kak sewese komwi. Komw kak ale noumw brochure, ma komw pahn ntingihdi dahme anahn nan coupon ni pali en mwowe oh kadarala ni adres me karanih ihmwomw.
[Picture Credit Line on page 2]
Semen kesik ni rir oh mehla ieu nan Bosnia: Reuters/Corbis-Bettmann