Ke Anahne Sukuhliki Duwen Koht

Ma ke men kompoakepahnki Koht, ke anahne sukuhliki duwen ih. Kompoakpahmw kan kin ese edomw oh pil kin likwerikin uhk edomwo? Ei, re kin wia. Koht ketin kupwurki ken pil esehla oh doadoahngkihla mware. Mwaren Koht iei Siohwa. (Melkahka 83:18; Madiu 6:9) Ke pil anahne sukuhliki dahme e kin kupwurki oh dahme e kin kalahdeki. Ke pil anahne ese ihs kompoakepahn Koht akan oh ihs imwintihti en Koht akan. Ni mehlel, ke anahne kihda ahnsou laud en esehla emen. Paipel kin kasalehda me e pahn mwahu en koasoanehdi ahmw ahnsou pwehn sukuhliki duwen Siohwa.​—Episos 5:15, 16.

Kompoakepahn Koht akan kin wia dahme pahn kaperenda ih. Medewehla duwen pein kompoakepahmw kan. Ma ke sohte pahn kadek ong irail oh ke pahn wia dahme re kin sapwungki, ke lemeleme re pahn men wiwiahte kompoakepahmw? Uhdahn soh! Eri, duwehte met, ma ke men kompoakepahnki Koht, ke anahne wia dahme pahn kaperenda ih.​—Sohn 4:24.

Kaidehn pelien lamalam koaros kin kaweidalahng aramas pwe ren kompoakepahnki Koht. Sises, kompoakepahn Koht me keieu keren, mahsanih duwen ahl riau. Ehu ahl me tehlap oh diren aramas kin weweid powe. Ahl teio me tehtik oh aramas malaulau kin weweid powe. Ahl tehtiko me kin kahluwalahng mour soutuk. Met kin wehwehki me ma ke men wiahla kompoakepahn Koht, ke anahne sukuhliki duwen ahl pwung en kaudokiong Koht.​—Madiu 7:13, 14.