Ihs me kin Kompoakepahnki Koht?

Sises Krais iei Sapwellimen Siohwa Ohl oh e pil wia kompoakepahn Koht me Koht kin keieu poakpoake. Mwohn Sises wiahla aramas oh ketiket sampah, e kin ketiket nanleng nin duwen ngehn kehlail men. (Sohn 17:5) Ih eri ketidihdo sampah oh padahkiong aramas akan dahme mehlel duwen Koht. (Sohn 18:37) E pil toukihda pein moure pwehn doarehla aramas peik kan sang dihp oh mehla. (Rom 6:23) Ni ahnsou wet, Sises kin wia Nanmwarki en Wehin Koht, iei koperment en lahng me pahn wahdohng sampah wet Paradais ehu rahn.​—Kaudiahl 19:16.

Tohnleng kan pil kin kompoakepahnki Koht. Tohnleng kan sohte tepida wia aramas mahs mwohn ahr wia tohnleng. Koht kapikada tohnleng kan nan lahng mwohn e kapikada sampah. (Sohp 38:4-7) Mie tohnleng rar kei. (Daniel 7:10) Kompoakepahn Koht pwukat me kin mihmi nanleng kin men kilang aramas akan sukuhliki dahme mehlel duwen Siohwa.​—Kaudiahl 14:6, 7.

Pil mie kompoakepahn Koht akan nin sampah; Siohwa Koht kin kadaneki irail sapwellime Sounkadehde kan. Nan mwoalen kopwung, sounkadehde men pahn kasalehda dahme e ese duwen emen de mehkot me wiawi. Sounkadehdehn Siohwa kan kin padahkiong aramas akan dahme re ese duwen Siohwa oh sapwellime kupwur kan. (Aiseia 43:10) Duwehte irail tohnleng kan, Sounkadehde kan men sewese iuk en sukuhliki dahme mehlel duwen Siohwa. Re men ken kompoakepahnki Koht.