Kahrepen Aramas Kin Soumwahuda

MIE ME ke ese me soumwahu?— Mwein ke pil kin soumwahuda ekei pak. Mwein ke soumwahu en wai de kapehd medek. Ekei aramas kin uhdahn soumwahu laud. Re sohte kak pein uhda ma sohte me sewese irail. Met kin kalapw wiawi ahnsou me aramas kin mahla.

Koaros kin soumwahuda ekei pak. Ke ese dahme kahrehda aramas kin soumwahuda, mahla oh mehla?— Ehu rahno, ohl emen me sohte kak alu wisikdohng rehn Sises oh Sises ketin kasalehda dahme kahrehda aramas kin soumwahuda oh mehla. I pahn padahkihong uhk dahme wiawi.

Sises ketiket ni ihmw ehu nan kahnimw ehu limwahn Lehen Kalili. Aramas tohto pokondohng ni ihmwo pwehn tuhwong ih. Ihme kahrehda ihmwo koaitla. Sohla me pil kak kohla lel ni wenihmwo. Ahpw aramas wie kohkohdohte! Pwihn ehu pil wahdo ohl emen me mwoator. Ohl pahmen me wa ohlo nan mehn wisiko.

Ke ese ia kahrepen arail men wahdo ohl soumwahwo rehn Sises?— Irail kamehlele me Sises kak sewese ih. Re kamehlele me Sises kak kamwahwihala eh soumwahu. Ke ese ia duwen arail kak wahla ohl mwoatoro rehn Sises mendahki ihmwo eh koaitla?—

Kilel wet kasalehda dahme irail wia. Keieu, irail wahdahla ohlo pohn ihmwo. Pohn ihmwo me patapat. Irail eri koupwoarehda pohn ihmwo oh kihdihla ohl soumwahwo nan pereo. Arail pwoson me uhdahn kehlail!

Aramas koaros nan ihmwo pwuriamweila ni arail kilang dahme wiawi. Ohl mwoatoro kohdiong nanpwungarail. Ia duwe, Sises ketin lingeringerda ni eh kilang dahme ohl pwukat wia?— Soh! E ketin perenki arail pwoson. E mahsanihong ohl mwoatoro: “Dipomw kan lapwadahr.”

Ekei aramas lemeleme me e sohte konehng Sises en mahsanih met. Re sohte lemehiong me e sapwellimaniki manaman en ketikihsang dihp. Eri pwehn kasalehda me e kak ketikihsang dihp, e mahsanihong ohlo: ‘Uhda ale ahmw mehn wisiken oh kohkohwei ni imwomwo.’

Ni Sises eh mahsanih met, ohlo ahpw kehlailda! E solahr mwoator. E kakehr pein pwourda oh alu. Aramas ko me kilang manaman wet pwuriamweila. Sohte pak ehu nan arail mour me irail kilang soahng kapwuriamwei wet! Irail kapingahki Siohwa eh ketikihong irail Sounpadahk Lapalap menet me kak kamwahwihala en aramas akan arail soumwahu.​—Mark 2:1-12.

Dahme kitail sukuhlki sang manaman wet?— Kitail sukuhlki me Sises sapwellimaniki manaman en ketikihsang dihp oh kamwahwihala aramas soumwahu kan. Kitail pil sukuhlki mehkot me inenen kesempwal, iei me aramas kin soumwahuda pwehki dihp.

Pwehki kitail koaros kin soumwahuda ekei pak, met wehwehki me kitail koaruhsie dipan?— Ei, Paipel mahsanih me kitail koaros ipwidi dipan. Ke ese ia wehwehn met?— E wehwehki me kitail koaros ipwidi soh unsek. Ekei pak kitail kin wiahda sapwung mendahte ma kitail sohte men wia. Ke ese ia duwen kitail koaros dipanla?—

Kitail ipwidi nan dihp pwehki tepin ohl Adam sapeikiong Koht. E dipada ni eh kauwehla kosonned en Koht. Oh kitail koaros sohsohkiher dihp sang rehn Adam. Ke ese ia duwen atail sohsohkiher dihp sang reh? I pahn song en kawehwe pwe ken kak wehwehki.

Mwein ke kilang emen me kin umwun pilawa nan delen umwun pilawa. Dahme pahn wiawihong pilawao ma mie pad ni delen umwo?— E sou pahn mie lipwen pado ni ehuehu pilawa me wiawihda nan dahlo?—

Adam duwehte dahlo ah kitail duwehte pilawao. E wiahla aramas soh unsek ni eh kauwehla kosonned en Koht. Kahrehda likamwete e alehda pad ehu. Eri ni eh nainekihda seri kan, dahme pahn wiawihong irail?— Nah seri koaros pil pahn alehda soh unsek me duwehte pado.

Pali laud en seri sohte kin ipwikihdi mehkot me sansal me kasalehda arail soh unsek. Re sohte kin ipwidi ahpw sohte pehrail de nehrail. Ahpw soh unsek me re ahneki kin kahrehda irail en soumwahuda oh mwuhr mehla.

Ekei aramas kin kalapw soumwahu sang ekei. Dahme kahrehda? Met pwehki irail ipwidi dipan sang meteikan?— Soh, aramas koaros ipwikihdi soangen uwen dihp teieu. Kitail koaros ipwidi soh unsek. Eri, koaros pahn mie arail soumwahu. Irail me kin nantihong en peikiong kosonned en Koht koaros oh sohte kin wia mehkot me uhdahn suwed pil kak soumwahuda.

Dahme kahrehda ekei aramas kin kalapw soumwahu sang ekei?— Mie kahrepe tohto. Mwein sohte itar kanarail mwenge. De mwein irail sohte kin kang mwenge me mwahu ong paliwar. Mwein re kin kang laud kirahka. Pil ehu kahrepe mwein re kin kalapw pepehd nipwong oh sohte itar arail meir. De mwein re sohte kin mwadang wilianda arail likou wisekesek. Paliwar en ekei aramas me luwet oh re sohte kak peiong soumwahu kan mendahte ma re kin apwalih mwahu paliwararail.

E pahn mie ahnsou ehu me kitail solahr pahn soumwahu? Kitail pahn kak pitsang dihp?— Dahme Sises ketin wiahiong ohl mwoatoro?— Sises ketikihsang dipe oh kakehlahda ih. Sises kin ketin kasalehda dahme e pahn ketin wia ong aramas koaros me kin nantihong en wia dahme pwung.

Ma kitail kin kasalehda me kitail sohte men wia dihp oh kitail kin kailongki me suwed, eri Sises pahn ketin kakehle kitailda. Ni ahnsou kohkohdo, e pahn ketikihsang soh unsek me kitail ahneki ahnsou wet. E pahn ketin wia met nin duwen Nanmwarki en Wehin Koht. Ahpw dihp sohte pahn wiahkin teieu kohsang kitail. E pahn ekisekis kohsang kitail erein ahnsou ehu. Eri ahnsou me dipatail kan koaros pahn kohsang, kitail solahr pahn pwurehng soumwahuda. Kitail koaros pahn ahneki roson unsek. Ia uwen met eh pahn wia kapai laud ehu!