Seri Kan Me Kin Kaperenda Koht

MEHNIA seri nin sampah me ke leme me keieu kaperenda Siohwa?— Iei sapwellimeo, Sises. Kita pahn koasoiapene duwen soahng kan me Sises ketin wia me kin kaperenda Seme nanleng.

Sapwellimen Sises peneinei kin kousoan wasa ehu me re pahn sapasapalki rahn siluh pwehn lel Serusalem. Iei wasao me sapwellimen Siohwa tehnpas sarawi kaselel mi ie. Sises ketin kahdaneki tehnpaso “Tehnpas en Semei.” Ih oh sapwellime peneinei kin ketila wasao pahr koaros pwehn iang sarawi en Pahsohpa.

Ehu pahro, ni Sises eh sounpar 12, sapwellime peneinei tepida pwurupwurala sang Serusalem mwurin sarawien Pahsohpa. Ahnsou me irail lel wasa me irail pahn pweidi ie, irail ahpw esehda me Sises sohte ketiket rehn arail peneinei ko oh kompoakparail ako. Ni ahnsowohte, Mery oh Sosep pwurala Serusalem pwehn rapahki Sises. Ia wasa ke leme e ketiket ie?—

Ira diar Sises nan tehnpas sarawio. E ketin rongorong sounpadahk ko oh kalkalelapek rehrail. Oh ni arail kin idek reh mehkot, e kin ketin sapengla ahnsou koaros. Irail pwuriamweikihla sapwellime pasapeng kaselel kan me e kin ketikihda. Ke kak kilang kahrepen Koht eh kupwurperenki Sapwellimeo?—

Ni Mery oh Sosep ara diarada Sises, ira uhdahn nsenamwahula. Ahpw Sises sohte ketin pwunodki. E mwahngih me tehnpaso wia wasa mwahu ehu en ketiket ie. Ih eri ketin idek: “Kumwa sohte ese me I uhdahn pahn kin mihmi nan Tehnpas en Semei?” E mwahngih me tehnpaso iei tehnpas en Koht oh e ketin perenki ketiket ie.

Mwurin mwo, Mery oh Sosep kahre Sises me sounpar 12 pwurala Nasaret. Ia ahmw madamadau, ia mwomwen sapwellimen Sises wiewia ong eh pahpa oh nohno?— Paipel mahsanih me e “kin ketin peikiong ira.” Ke leme ia wehwehn met?— E kin ketin peikiong ira ni eh kin wia dahme ira kin padahkihong ih en wia, me duwehte idipil sang nan pwarer.​—Luk 2:41-52.

Eri medewehla duwen met: Mendahki Sises unsek, e kin ketin peikiong eh pahpa oh nohno me soh unsek. Ia duwe, met kin kaperenda Koht?— Ei, e uhdahn kaperenda ih pwehki Mahsen en Koht kin padahkihong seri kan: “Peikiong samamwail oh inamwail kan.” (Episos 6:1) Ke pahn pil kaperenda Koht ma ke kin peikiong ahmw pahpa oh nohno duwehte me Sises kin ketin wia.

Pil ehu ahl me ke kak kaperenda Koht iei sang ni ahmw pahn kin padahkihong meteikan duwen ih. Ekei aramas mwein pahn nda me e sohte konehng me pwulopwul kan en wia met. Ahpw ni ahnsou me aramas akan song en kauhdi kisin pwutak kei sang arail wia met, Sises mahsanih: ‘Kumwail sohte mwahn kin wadek mahsen en Pwuhk Sarawi me mahsanih, “Komw ketin aleier kaping unsek sang ni ewen seri kan”?’ (Madiu 21:16) Eri kitail koaros kak padahkihong meteikan duwen Siohwa oh soahng kaselel kan duwen ih, ma kitail uhdahn men wia met. Ma kitail pahn wia met, kitail pahn kaperenda Koht.

Ia wasa kitail kin sukuhlki soahng kan duwen Koht me kitail kak padahkihong meteikan?— Sang atail onop en Paipel nan imwatail. Ahpw kitail pil kin sukuhlki laud nan wasa me sapwellimen Koht aramas akan kin tuhpene ie pwehn onop. Ia duwen atail kak ese ihs me sapwellimen Koht aramas akan?—

Eri, dahme aramas akan kin wia ni arail mihting kan? Irail kin uhdahn padahngki dahme mi nan Paipel? Irail kin wadek oh koasoiapene? Ih duwen atail kin rong Koht, kaidehn?— Oh nan mihting en Kristian akan, kitail kin kasik en rong dahme Koht kin mahsanih, kaidehn?— Ahpw ia duwen ma aramas kin nda me ke sohte anahne kapwaiada dahme Paipel kin mahsanih? Ke pahn medewe me irail sapwellimen Koht aramas kei?—

Iet pil ehu ire me ke kak medemedewe. Paipel mahsanih me sapwellimen Koht aramas akan pahn wia “aramas ekei ong mware.” (Wiewia 15:14, NW) Pwehki mwaren Koht iei Siohwa, kitail kak idek rehn aramas akan ma arail Koht iei Siohwa. Ma re nda me soh, eri kitail kak ese me irail kaidehn sapwellimen Koht aramas kei. Sapwellimen Koht aramas akan pahn pil kin padahkihong meteikan duwen Wehin Koht. Oh re pahn kasalehda arail limpoak ong Koht sang ni arail kin peikiong sapwellime kosonned akan.​—1 Sohn 5:3.

Ma ke ese aramas me kin wia soahng pwukat koaros, eri ke anahne iang irail kaudokiong Koht. Ke anahne rong kanahieng nan mihting pwukat oh iang pasapeng ni ahnsou me peidek kan kin kohda. Ih met me Sises ketin wia ni eh ketiket nan tehnpas en Koht. Ma ke wia soahng pwukat, ke pahn kaperenda Koht duwehte Sises eh ketin wia.

Ke kak medewehda seri teikan me Paipel mahsanih me irail kin kaperenda Koht?— Timoty iei emen me wia mehn kahlemeng mwahu. Eh pahpao sohte kin kamehlele Siohwa. Ahpw eh nohno Iunis oh eh nohno kahlap Lois me kamehlele Siohwa. Timoty kin rong ira oh sukuhlki duwen Siohwa.

Ni Timoty eh laudla, wahnpoaron Pohl mwemweitla nan kahnimw me e kin mihmi ie. E kilang uwen Timoty eh men papah Siohwa. Ih eri luke Timoty en iang ih pwehn kalaudehla eh papah Koht. Wasa koaros me ira lella ie, ira kin padahkihong aramas akan duwen Wehin Koht oh Sises.​—Wiewia 16:1-5; 2 Timoty 1:5; 3:14, 15.

Ahpw ia duwen, Paipel kin mahsanihte duwen mehn kahlemeng en pwutak kan me kin kaperenda Koht?— Soh. Nna tehk duwen kisin serepein en Israel men me kin kaperenda Koht. Ni ahnsou me e wie momour, wehin Siria oh wehin Israel kin imwintihtipene. Ehu rahno, mehn Siria kan peiong mehn Israel ko oh wahsang kisin serepeino. E wisiklahng ni imwen kaunen sounpei men me adaneki Nahman. Ih eri wiahla lidun en Nahman eh pwoudo.

Nahman ahneki soumwahu en tokutok. Sohte toahkte me kak kamwahwihala. Ahpw kisin serepein en Israelo kamehlele me emen sapwellimen Koht soukohpo kak kamwahwihala Nahman. Nahman oh eh pwoud sohte kin kaudokiong Siohwa. Ia duwe, kisin serepeino anahne padahkihong ira dahme e ese? Ma kowe mwo, dahme ke pahn wia?—

Eri, kisin serepeino nda: ‘Ma Nahman pahn kohla rehn sapwellimen Siohwa soukohpo nan Israel, eh tokutoko pahn mwahula.’ Nahman rong kisin serepeino oh kohla rehn sapwellimen Siohwa soukohpo. Ni eh kapwaiada dahme soukohpo padahkihong ih en wia, e ahpw mwahula. Met kahrehiong Nahman en wiahla emen tohnkaudok en Koht mehlel.​—2 Nanmwarki 5:1-15.

Ke men sewese emen en esehla duwen Siohwa oh duwen dahme e kak ketin wia duwehte me kisin serepeino wia?— Ihs me ke kak sewese?— Mwein nin tapio re sohte pahn medewe me re anahne sawas. Ahpw ke kak padahkihong irail soahng mwahu kan me Siohwa Koht kin ketin wia. Oh mwein re pahn rong. Ke kak kamehlele me met uhdahn pahn kaperenda Koht.