Siohwa Kin Kupwurki Kitail En Wia Mehwan Daulihla Dahme Kitail Kakohng?
“Eri, iet me Siohwa kin ketin kupwurki kitail en wia: kitail en wiahda me pwung; kitail en kin kasalehda atail limpoak poatopoat, oh peikiong atail Koht ni karakarahk.”—MAIKA 6:8, New World Translation.
1. Dahme kahrehda ekei aramas sohte kin papah Siohwa?
MIE sapwellime Siohwa koasoandi ong sapwellime aramas akan. Ahpw mwurin ahmw pahn wadek mahsen en kokohp en Maika me ntingihdi powe, ele ke kin kilang me sapwellimen Koht koasoandi kan me konehng. Ahpw, aramas tohto sohte kin papah Sounkapikpatail Lapalap nan ahnsou wet, oh ekei me kin papah Ih mahs, ni ahnsou wet, re solahr. Pwekihda? Pwe re lemeleme me Koht kin kupwurki kitail en wia mehkan daulihla dahme kitail kakohng. Ahpw, mehlel, Siohwa kin kupwurki kitail en wia mehkan daulihla dahme kitail kakohng? De aramas me kin sapwung ong dahme re lemeleme Siohwa kin kupwurki kitail en wia? Poadoapoad ehu pahn sewese kitail en wehwehki duwen irewet.
2. Ihs Nahman, oh dahme sapwellimen Siohwa soukohp padahkiong ih en wia?
2 Nahman, kaun lapalap en karis kan en Siria kin soumwahuki soumwahu en tokutok, ahpw e rong me nan wehin Israel mie sapwellimen Siohwa soukohp men me pahn kak kamwahuiala ah soumwahu. Eri, Nahman oh nah ladu kan kohla Israel oh lelahng ni imwen sapwellimen Koht soukohp, Elisa. Ahpw, Elisa sohte pedoisang imwe oh kasamwo ohl lapalap menet. E ilakih meninkeder men pwe en koasoiaiong Nahman: “Kohwei oh duhdu pak isuh nan Pillap Sordan, paliweromwen ahpw pahn mwahula oh ke pahn mwakelekella.”—2 Nanmwarki 5:10.
3. Dahme kahrehda nin tepio Nahman kahng kapwaiada dahme Siohwa kupwurki ih en wia?
3 Ma Nahman kapwaiada kaweid me sapwellimen Koht soukohp koasoia, e pahn mwahula sang eh soumwahu. Ahpw, ni mehlel, Siohwa me kupwurki Nahman en wia mehkot daulihla dahme e kakohng? Soh. Ahpw, Nahman sohte men kapwaiada dahme Siohwa kupwurki ih en wia. Ni ngihlen uhwong, e nda: “Pwe dah? Pilen Apana oh Parpar, nan Damaskus, soh mwahusang pihl koaros en Israel? I soh kak duhdu nan pillap pwukat oh mwakelekelda?” Eri, Nahman lingeringerdahte oh pwurala sang wasao.—2 Nanmwarki 5:12, NW.
4, 5. (a) Kating dahieu Nahman alehdi pwehki e peik, oh iaduwen e mwekidki katingo? (b) Oh dahme kitail pahn tehk ni ahnsou wet?
4 Dahme kahrehda Nahman sohte men kapwaiada kaweid me kohwong ih? Kaidehn pwehki kaweid me apwal en kapwaiada. Nein Nahman ladu kan, ni karakarahk, patohwanohng: “Maing, ma soukohpo patohwanohng komwi en wia mehkot apwal, komwi pahn wia. Eri, dahme komw sohte patohkihla oh duhduhki, duwen me e patohwanohng komwi, pwe komwi en mwakelekella?” (2 Nanmwarki 5:13) Ni mehlel, madamadau en Nahman me sapwung. E pehm me Elisa sohte kasalehong ih wahu oh dahme Elisa padahkihong ih en wia sohte pahn kak kamwahuiala ih oh met wiewia kasaroh ieu ong ih. Ahpw, Nahman mwekidki kaweid kadek me kohsang nah ladu kan oh e duhdu nan pillap Sordan pak isuh. Medewehla uwen peren laud me Nahman ahneki ni e kilang “kilin paliwereo ahpw mwahula duwehla kilin seri pwelel, e ahpw mwakelekella mehlel”! E dirkihla kapingkalahngan. Oh Nahman pil koasoia me e solahr pahn kaudokiong emen koht likin Siohwa.—2 Nanmwarki 5:14-17.
5 Erein poadopoad en aramas akan, Siohwa kin kupwurki aramas akan en kapwaiada ekei koasoandi kan. Se luhke komwi en tehk duwen koasoandi pwukat. Ni ahmw pahn wia met, idek pein rehmw: iaduwen ke pahn mwekidki kaweid pwukat ma Siohwa kupwurkin uhk en wia. Mwuhr, kitail pahn tehk duwen dahme Siohwa kin kupwurki kitail en wia nan rahn pwukat.
Dahme Siohwa Kupwurki Sapwellime Aramas akan en Wia Mahs
6. Dahme Koht padahkiong tepin pwopwoudo en wia, oh iaduwen ke pahn mwekidki kaweid pwukat?
6 Siohwa kaweidki tepin pwopwoud, Adam oh Ihp, en apwaliada seri kan, kaunda sampah oh mahn akan. Ohlo oh eh pwoud pil paiekihda paradais laud ehu. (Senesis 1:27, 28; 2:9-15) Ahpw kosonned ehu kohwong ira. Ira sohte ale mweimwei en tungoale wahntuhke ehu sang nanpwungen wahntuhke tohto nan mwetuwel en Ihden. (Senesis 2:16, 17) Met sohte wia mehkot apwal, kaidehn? Ke sohte pahn perenki kapwaiada soangen pwukoah duwehte met, oh pil ahneki koapworopwor en mour kohkohlahte ni roson unsek? Mendahki mie sounkasongosong men me pwarada nan mwetuwelo, ke soh pahn soikala dahme e koasoia? Oh ke soh pahn pwungki me Siohwa sapwellimaniki pwung en ketikihda kisin kosonned mengei wet?—Senesis 3:1-5.
7. (a) Pwukoah dahieu me kohwong Noha, oh uhwong dah me e lelohng? (b) Ia omw madamadau ong dahme Siohwa kupwurki Noha en wia?
7 Ni ahnsou kan mwuri, Siohwa padahkiong Noha en wiahda warihmw ehu pwehn doarehla mouren aramas sang Nohliko. Met kaidehn doadoahk mengei ehu, pwe warihmwo inenen laud, oh pil, aramas akan kin kapailoke Noha oh eh peneinei oh uhwong doadoahk wet. Ahpw, pwais kaselel wet me kohwong Noha, pwe met pahn doarehla eh peneinei, oh pil mahn tohto! (Senesis 6:1-8, 14-16; Ipru 11:7; 2 Piter 2:5) Ma ke ale pwukoah wet, ke pahn nantihong wia omw pwukoah? De ke pahn nda me Siohwa kin kupwurki ken wia mehkan me daulihla dahme ke kakohng?
8. Dahme Siohwa kupwurki Eipraam en wia, oh pwehki Eipraam peikiong Siohwa, dahme met kin mwete?
8 Koht padahkiong Eipraam en wia mehkot me inenen apwal en wia: “Ale Aisek, noumw pwutak iehrosen, me ke kin kesempwalki, oh kohla nan wehin Moria. Kowe kohla meirongkihong ie nin duwen meirong isihs ehu pohn nahna me I pah kasalehiong uhk.” (Senesis 22:2) Pwehki Siohwa inoukiong Eipraam me Aisek me saikinte nah seri ahnsowo pahn nainekihda seri kan, eri, kasongpen ahn Eipraam pwoson me wiawi ma Koht pahn kak kaiasada Aisek. Ni ahnsou me Eipraam song en meirongkihla Aisek, Koht ahpw doarehla ih. Wiewia wet kin mwete en Koht ah pahn ketin meirongkihla Sapwellime Ohl pwehki aramas akan oh mwuhr, Koht ahpw pahn kaiasada Ih.—Senesis 17:19; 22:9-18; Sohn 3:16; Wiewia 2:23, 24, 29-32; Ipru 11:17-19.
9. Dahme kahrehda Siohwa sohte kupwurki Eipraam en wia mehkot daulihla dahme e kakohng?
9 Ekei aramas lemeleme me Siohwa Koht kin kupwurki Eipraam en wia mehkot daulihla dahme e kakohng. Ahpw, mehlel? E mehlel me atail Sounkapikada, me sapwellimaniki manaman en kaiasada me mehlahr kan, uhdahn sempoak ni ah kin ketin kupwurki kitail en lelepek ong ih mendahki ma met pahn kahrehong kitail en meirla nan mehla lepin ahnsou mwotomwot ehu? Sises Krais oh sapwellime tohnpadahk kan sohte lemeleme me Koht sempoak. Re perenki wia kupwuren Koht edetehn re kak lelohng kalokolok oh pil mehla. (Sohn 10:11, 17, 18; Wiewia 5:40-42; 21:13) Ma ke pil pahn lelohng soangen irair pwukat, ke pahn perenki wia duwehte irail? Kitail pahn tehk dahme Siohwa kin kupwurki irail aramas akan me men wiahla sapwellime aramas akan en wia.
Sapwellimen Siohwa Kosonned akan me Kohwong Israel
10. Ihs me inoukihda me re pahn kapwaiada mehkoaros me Siohwa ketin mahsanih ong irail en wia, oh dahme Siohwa ketikihong irail?
10 Kadaudok kan en Eipraam, sang nah pwutak Aisek oh nein Aisek pwutak, Seikop, de Israel, me wiahla wehin Israel. Siohwa kapitala mehn Israel kan sang ni ahr wiahla ladu kan nan Isip. (Senesis 32:28; 46:1-3; 2 Samuel 7:23, 24) Sohte pwand, re kin inoukihong Koht me re pahn kapwaiada sapwellime kupwur kan. Irail inoukihda met: “Se pahn kapwaiada mehkoaros me Kauno [“Siohwa,” NW] ketin mahsanih.” (Eksodus 19:8) Pwehki mehn Israel akan men Siohwa en kaunda irail, Siohwa ketikihong mehn Israel akan kosonned 600 samwa, iangahki Kosonned Eiseko. Ni ahnsou kan mwuri, kosonned en Koht pwukat me Koht ketikihong Moses en kihong mehn Israel akan me adanekihla Kosonnedo.—Esra 7:6; Luk 10:25-27; Sohn 1:17.
11. Ia ehu kahrepen Kosonnedo, oh ia ekei kosonned akan me kin utungada kahrepeo?
11 Ehu kahrepen Kosonnedo iei en perehla mehn Israel kan oh kihong irail sawas me kin pid tiahk mwakelekel kan, wiewiahn pisnes kan, oh apwalih seri kan. (Eksodus 20:14; Lipai 18:6-18, 22-24; 19:35, 36; Deuderonomi 6:6-9) Kosonned akan pil kohwong irail ong iaduwen irail pahn wiaiong iengarail aramas akan oh pil mahn akan. (Lipai 19:18; Deuderonomi 22:4, 10) Koasoandi kan me kin pid kamadipw ni pahr koaros oh mihding ong kaudok kan kin pere irail en kehlailda ni pali ngehn.—Lipai 23:1-43; Deuderonomi 31:10-13.
12. Ia kahrepe keieu kesempwal ong Kosonnedo?
12 Ahpw, wahnpoaron Pohl ntingihdi duwen kahrepe kesempwal ehu en Kosonnedo: “E kapatapat ong inowo pwe en kasalehda dahkot sapwung, oh en mihmi lao lel kadaudok en Eipraamo [Krais] me inowo wiawihongehr eh pahn pwarodo.” (Kalesia 3:19) Kosonnedo kin katamanki ong mehn Israel akan me irail aramas soh unsek kan. Eri, met kasalehda me re anahne meirong unsek ehu me pahn kak lapwahsang diparail kan ni unsek. (Ipru 10:1-4) Kosonnedo wiawihda pwehn kaunopada aramas akan en kamehlele Sises, me iei Ih Mesaia oh Krais. Pohl ntingihdi: “Eri, Kosonnedo me kakaun kitail lao lel en Krais eh ketido, pwe kitail en pwungkihla pwoson rehn Koht.”—Kalesia 3:24.
Sapwellimen Siohwa Kosonned iei Mehkot Katoutou?
13. (a) Iaduwen aramas soh unsek kan kilangwong Kosonnedo, oh dahme kahrehda? (b) Kosonnedo kin wia mehkot katoutou ehu?
13 Mendahki Kosonnedo iei “sarawi oh pwung oh mwahu,” aramas tohto kin lemeleme me Kosonnedo kin wia mehkot katoutou. (Rom 7:12) Pwehki Kosonnedo me unsek, mehn Israel akan sohte kak kapwaiada koasoandi ile pwukat. (Melkahka 19:7) Ihme kahrehda, wahnpoaron Piter koasoiahki “ni amwail pwilikihdiong pohn pwopwen me pwosonlahr kan wisik ehu me samatail kahlap ako de pein kitail sohte kak wahda.” (Wiewia 15:10) Ni mehlel, Kosonnedo kaidehn mehkot katoutou ehu, oh aramas akan kin paiekihda ma re pahn peikiong Kosonnedo.
14. Ia ekei kosonned akan me kin kasalehda me Kosonnedo wia katep laud ehu ong mehn Israel kan?
14 Karasepe ieu, pahn Kosonnedo, sounliparap men sohte pahn selidi, ahpw e anahne doadoahk pwehn kapwungala dahme e pirapala pak riau de tohto sang. Eri, emen me ah dipwisou kan pirapsang sohte pahn luhsla, de pil aramas akan me kin doadoahk laud sohte anahne toutouki utungada koasoandi en imweteng. (Eksodus 22:1, 3, 4, 7) Kosonnedo kin keinapwidi aramas en dehr kang soangen mwenge kan me sohte mwakelekel. Ma emen sohte pahn kuhkiada mwahu uduk en pwihk, e kak soumwahukihda soumwahu me adaneki “trichinosis” oh mahn rapit kan kak weuwa soumwahu en “tularemia.” (Lipai 11:4-12) Kosonnedo pil kin perehla mehn Israel akan sang ni ah kin keinapwidi aramas akan en dehr sairada paliwar en aramas mehla oh mahn mehla kan. Ma aramas men pahn sairada paliwar en aramas mehla de mahn mehla kan, e pahn anahne kamwakelehki pihl paliwere, oh pil lopworada eh likou kan. (Lipai 11:31-36; Nempe 19:11-22) Irail anahne sarepedi kainen mwenge, oh met kin perehla aramas akan sang mwahs akan en dehr douseli, me ni ahnsou kerente me saintis kan diarada.—Deuderonomi 23:13.
15. Dahme kin wia mehn katoutou ehu ong mehn Israel akan?
15 Kosonnedo sohte kin wia mehkot lemeidihd ong aramas akan. Ahpw kitail sohte kak nda met ong irail kan me pein kawehwehda Kosonnedo. Me pid duwen kosonned akan me re idingkiong aramas akan en wia, James Hasting me wiahda ehu pwuhk me oaralap koasoia: A Dictionary of the Bible koasoia: “Kosonned en Pwuhk Sarawi koaros kin mie kosonned tikitik kan me kin mweteusang. . . . Re song wiaiong soangen irair koaros me aramas kak medewehda en kin mie kosonnedpe, oh madamadau sempoak kan me pahn kaweid wiewiahn aramas unsek en kin mih ni kosonned me aramas kak tamataman. . . . Solahr saledek en doadoahngki kadeikpen loale; ieias en Mahsen Sarawio kin solahr mene oh kosonned tohto teikan kin koasokala Mahsen Sarawio.”
16. Dahme Sises mahsanih duwen kosonned toutou kan oh tiahk kan me kaun en pelien lamalam akan pein wiahda?
16 Sises Krais kadeikada irail kaun en pelien lamalam akan me kin idingkihong aramas akan en kapwaiada arail kosonned tohto: “Re kin kihpene wisik toutou oh salihediong pohn pwopwen aramas akan, re ahpw sohte mwahn kin men kamwakid sendinpehteh pwoat pwe en sewesehda wisik toutou pwukat.” (Madiu 23:2, 4) E kasansalehda me arail kosonned toutou kan me pein irail wiahda oh pil ahr tiahk kan, iangahki ahr koasoandi en kamwakel ni unsek, kin “kauwehla Mahsen en Koht.” (Mark 7:1-13; Madiu 23:13, 24-26) Mwohn Sises ketido nin sampah, sounpadahk kan en pelien lamalam nan Israel sohte kin kapwaiada dahme Siohwa kin kupwurki irail en wia.
Dahme Siohwa kin Uhdahn Kupwurki
17. Dahme kahrehda Siohwa sohte kin kupwurperenki ahn mehn Israel salelepek kan meirong isihs akan?
17 Ki sapwellime soukohp Aiseia, Siohwa mahsanih: “I solahr kin kupwurperenki amwail meirong isihs en sihpw wol kan, oh meirong en noumwail kou wih kan; I solahr kin kupwurperenki ntahn noumwail kouwol kan, sihmpwul kan oh kuht kan.” (Aiseia 1:10, 11) Dahme kahrehda Koht sohte kin kupwurperenki meirong isihs kan me e ketin padahkiong irail nan Kosonnedo en wia? (Lipai 1:1–4:35) Pwehki aramas pwukat kin mwamwahliki Koht. Ihme, kaweid wet kohwong irail: “Kumwail kamwakeleikumwailda. Kumwail tokedihsang amwail wiewia suwed pwukat mwohn silangi. Kumwail tokedihsang amwail wia me suwed, oh esehla wia me pwung. Ngoangki pwe pwuhng pahrek en mie—sewese irail kan me milahr pahn kehnaudek, kihong pwung en me sepwoupwou kan, oh doarehla liohdi kan.” (Aiseia 1:16, 17) Met soh pahn sewese kitail en kalahnganki dahme Siohwa kin kupwurki sapwellime ladu kan en wia?
18. Dahme Siohwa kin kupwurki mehn Israel kan en wia?
18 Sises kasalehda dahme Koht uhdahn kin kupwurki. E kasalehda met ni ahnsou me emen idek reh peidek wet, “Mehnia kosonned nan pelien Kosonnedo me keieu kesempwal?” Sises ketin sapengki: “‘Ke pahn poakohng Kauno [“Siohwa,” NW] omw Koht sang nan kapehdomw unsek, sang ni ngenomw unsek, sang ni omw lamalam koaros unsek.’ Ih met kosonned me keieu lapalap oh kesempwal. A me keriaun kesempwal, me rasehngete met, iei: ‘Ke pahn poakohng mehn mpomw duwen omw kin poakohng pein uhk.’ Kosonned riau pwukat, iei me poahsoanen pelien Kosonned en Moseso oh padahk en soukohp ako.” (Madiu 22:36-40; Lipai 19:18; Deuderonomi 6:4-6) Soukohp Moses kin kawehwehda ireohte ni ahnsou me e wia peidek wet: “Eri, met, kumwail mehn Israel, kumwail rong dahme Kauno [“Siohwa,” NW], amwail Koht, ketin kupwurki sang rehmwail. Kumwail en lemmwiki Kauno [“Siohwa,” NW] oh kapwaiada sapwellime mahsen koaros. Poakohng ih oh papah ni mohngiongimwail unsek. Kapwaiada sapwellime kosonned koaros me I kehkehlingkihong kumwail rahnwet pwe kumwail en nsenamwahu?”—Deuderonomi 10:12, 13; 15:7, 8.
19. Iaduwen mehn Israel kan kin mwomwehda me irail aramas sarawi kei, ahpw dahme Siohwa mahsanih ong irail?
19 Mendahki mehn Israel kan kin wiahda sapwung, re men mwomwehda me re wiahla aramas sarawi kei. Edetehn Kosonnedo kin padahkiong aramas en kaisihsol ni Rahnen Tomw, re kin tepida kaisihsol pak tohto. (Lipai 16:30, 31) Ahpw Siohwa kadeikada irail, mahsanih: “Ahpw ih soangen kaisihsol me I kin perenkien: kamweidpeseng sahl me pirepenehr irail kan me mihmi nan kehnaudek, oh kauwehla sahl me pirepenehr pwuhng, oh kasaledekala irail kan me mihmi nan apwal. Mweidong me semwehmwe kan en iang tungoale amwail kisin tungoal akan, oh langadahng imwamwail kan ong irail kan me sohte imwarail. Kalikawihada irail kan me sohte ar likou, oh dehr kahng sewesehda kisehmwail kan.”—Aiseia 58:3-7.
20. Dahme kahrehda Sises kadeikada kaun en pelien lamalam mwalaun akan?
20 Irail mehn Israel aklapalap ako kin duwehte irail kaun en pelien lamalam mwalaun kan me Sises mahsanihiong irail: “Kumwail kin meirongkihong Koht eisek kis ehun amwail dipwisoun sampah, pil doaloapene mwenge duwehte mint, dil, kumin, ahpw sohte nsenohki peikiong padahk kesempwal kan en Kosonnedo, duwehte pwuhng, kalahngan oh mehlel. Ih mepwukat me kumwail uhdahn pahn kapwaiada, ahpw pil iangahki meteio.” (Madiu 23:23; Lipai 27:30) Mahsen en Sises pwukat soh kin sewese kitail en wehwehki dahme Siohwa kin uhdahn kupwurki kitail en wia?
21. Iaduwen soukohp Maika kin oarapene dahme Siohwa kin kupwurki oh sohte kupwurki kitail en wia?
21 Pwehn kasansalehda dahme Siohwa kin kupwurki de sohte kupwurki kitail en wia, sapwellimen Koht soukohp Maika idek: “Dahme I pahn patohwanohng Kauno [“Siohwa,” NW] Koht en nanleng, ni ei pahn patohwan kaudokiong? I pahn meirongkihong koupwul me keieu mwahu kan? Ia duwe, Kauno [“Siohwa,” NW] pahn kupwurperenki ei meirongkihong kiden sihpw de lehn olip me pahn kin pwilipwiliwei poatopoat? Ia duwe, I pahn meirongkihong nei mesenih, mehn tomwki dipei kan? Soh! Pwe Kauno [“Siohwa,” NW] ketin padahkihongkitailehr dahme mwahu. Eri, iet me Kauno [“Siohwa,” NW] kin ketin kupwurki kitail en wia: kitail en wiahda me pwung; kitail en kin kasalehda atail limpoak poatopoat, oh peikiong atail Koht ni karakarahk.”—Maika 6:6-8.
22. Dahme Siohwa kupwurki irail akan me mih pahn Kosonnedo en wia?
22 Eri, dahme Siohwa kupwurki irail akan me mih pahn Kosonnedo en wia? Ni mehlel, re anahne poakohng Siohwa Koht. Oh pil wahnpoaron Pohl koasoia: “Pwe audepen Kosonnedo pwon kin wia oaralap ehute: Poakohng mehn mpomw duwen omw kin poakong pein uhk.’” (Kalesia 5:14) Met kin duwehte dahme Pohl padahkiong Kristian akan nan Rom: “Mehmen me kin poakohng mehn mpe kin kapwaiada Kosonned en Moses. . . . Eri, limpoak iei kapwaipen Kosonnedo pwon.”—Rom 13:8-10.
Kaidehn Mehkot me Nohn Daulihla
23, 24. (a) Dahme kahrehda kitail en dehr ahneki madamadau me e nohn laud ong kitail en wia dahme Siohwa kin kupwurki kitail en wia? (b) Dahme kitail pahn sukuhliki mwuhr?
23 Kitail soh kin mwekidki sapwellimen Siohwa limpoak, kadek oh mahk kalahngan? Sapwellime Ohl, Iehros, Sises Krais, ketido nin sampah pwehn kasansalehda sapwellimen Koht limpoak—pwehn kawehwe ong aramas akan me Siohwa kin kesempwaliki irail. Sises kin kihda ehu karasaras duwen sapwellimen Koht limpoak, ni ahnsou me e koasoia duwen kisin menpihr kan: “Ahpw sohte emen ira pahn pwupwudiong nanpwel, oh Samamwail sohte ketin mwahngih.” Eri, ni kaimwiseklahn eh karasaras, e mahsanih met: “Eri, kumwail dehr masak, pwe kumwail kesempwalsang mehlel menpihr tohto.” (Madiu 10:29-31) Ni mehlel, dahme Koht limpoak men kin kupwurki rehtail, kitail en dehr ahneki madamadau me e nohn laud ong kitail en kapwaiada!
24 Ahpw, dahme Siohwa kin kupwurki kitail en wia nan rahnpwukat? Oh dahme kahrehda ekei kin lemeleme me Koht kin kupwurki kitail en wia mehkan daulihla dahme kitail kakohng? Sang ni atail pahn kasawihada peidek pwukat, e pahn sewese kitail en kilang dahme kahrehda e wia pwais kaselel ehu en kapwaiada soahng koaros me Siohwa kin kupwurki kitail en wia.
Komw Kak Sapeng?
◻ Dahme kahrehda ekei aramas sohte men papah Siohwa?
◻ Soangsoangen sapwellimen Siohwa kosonned dah kei me wiawihda erein sounpar tohto?
◻ Ia kahrepen Kosonned en Moses?
◻ Dahme kahrehda e sansal me Siohwa kin kupwurki kitail en wia ihte mehkan me kitail kakohng?
[Kilel nan Pali 18]
Kosonned akan me aramas pein wiahda me duwehte widen peh me nohn daulihla kahrehong kaudok en wia mehkot katoutou ong aramas akan