Dahme Seri Kan Anahne Sang Rehn Pahpa Oh Nohno
PAHPA oh nohno kan koaros kin pidada wiewia ehu me aramas sohte kak uhdahn wehwehki. Emenemen kin kihda mehkot sang ni paliwere. Met kin imwikihla kekeirdahn seri men nan kapehden nohno. Ihme kahrehda ni ahnsou me seri men kin ipwidi, aramas kin nda me met uhdahn mehkot kapwuriamwei.
Wiahda seri iei ih tepin pwukoa en pahpa oh nohno. Nin tapio, kisin seri kan kin uhdahn anahne epwel sang arail pahpa oh nohno. Ahpw ni arail kin kekeirda, irail anahne sawas laudsang mahs, kaidehn ihte sawas en paliwar. Irail anahne sawas pwehn kakairada arail madamadau, pepehm, tiahk oh en kaiahnehda irail ren esehla Koht.
Pwe seri kan en kekeirda mwahu, irail anahne limpoak en pahpa oh nohno. Mendahki e kesempwal en kasalehda limpoak ni lokaia kan, ara wiewia kan pil anahne kasalehda met. Seri kan anahne mehn kahlemeng mwahu en pahpa oh nohno. Irail anahne kaweid kan me pid tiahk me re pahn momourki. Oh irail anahne mepwukat sangete ni arail tikitik. Soahng kansensuwed kan kak wiawi ma seri kan sohte kin mwadang ale sawas, oh met kin uhdahn wiawi.
Kaweid kan me keieu mwahu kak dierek nan Paipel. Kaweid kan me kohsang nan Paipel kin mwahusang kaweid teikan. Sang ni kaweid pwukat, seri kan kin tepida wehwehki me dahme re kin sukuhlki sohte kin kohsang rehn aramas ahpw sang rehn arail Sounkapikada, Samarail nanleng. Met kin kihong kaweido manaman me sohte ehu kaweid kak pahrekiong.
Paipel kin kangoange pahpa oh nohno en doadoahk laud pwehn sewese seri kan en wehwehki kesempwalpen kaweid pwung kan oh tamataman oh doadoahngki kaweid pwukat. Ahpw ni seri kan arail kin lalaudla, pahpa oh nohno kin kalapw diarada me e apwal en koasoiaiong irail duwen soahng kan me keieu kesempwal. Pwuhk wet, Sukuhlki Sang Sounpadahk Lapalapo, wiawihda pwehn irehdi soangen kahpwal wet. E pahn kihong uhk oh noumw seri kan pwuhk ehu me kin kasalehda mehkan me pid kaudok oh tiahk pwe kumwail en kak wadekpene. Laudsang met, e pahn kahrehiong seri kan oh irail me kin iang irail wadek pwuhk wet en kin koasoakoasoipene.
Ke pahn diar me pwuhk wet kin kangoange seri kan en kasalehda arail madamadau. Peidek mwahu tohto mie nan pwuhk wet. Ni omw pahn lel ehuehu peidek pwukat, ke pahn kilang kilel wet (—). Met iei mehn kataman ehu pwehn uhdi oh kangoange serio en kasalehda eh pepehm. Seri kan kin men iang koasoi. Ma pahpa oh nohno sohte kin mweidohng serio en kasalehda eh madamadau, e pahn sohla perenki wadawad.
Kesempwal sang met, peidek pwukat pahn sewese iuk en ese madamadau en serio. Serio ele pahn nda pasapeng me sohte pwung. Ahpw, dahme ntingdi mwurin ehuehu peidek pahn sewese serio en kakairada madamadau pwung.
Mie kilel me tohtohsang 230. Mie nting kan nan pali laud en kilel pwukat me kin kangoange serio en kasalehda eh madamadau sang dahme e kilang oh wadek. Iang serio kilang kilel kan. Kilel pwukat kak wia mehn kasukuhl mwahu pwehn kasalehda ire kesempwal kan.
Ni ahnsou me serio esehla wadawad, kangoange ih en wadek ong uhk pwuhk wet oh pil ong pein ih. Ma e pahn pwurepwurehng wadek pwuhk wet, kaweid mwahu kan pahn lel eh madamadau oh mohngiong. Ahpw pwehn kakehlaka amwa limpoak oh wauneki emenemen, kowe oh serio anahne kaukaule wadekpene pwuhk wet. Nan ekei wasa, lepin lokaia “kita” kin kadoadoahk. Met pahn wia sawas ni omw kin wadek ong noumw seri emen. Ahpw ma ke kin wadek ong seri kei, ke pahn uhd doadoahngki “kitail.”
Seri kan rahnwet kin lelohng soahng kan me duwehte nenek, wunahni oh tiahk samin teikan laudsang sounpar kei samwalahro. Eri, irail anahne pereparail oh pwuhk wet kin sawas ni elen wahu ahpw inen. Ahpw seri kan kin keieu anahne kilangwohng Utupen erpit koaros, Samatail nanleng, Siohwa Koht. Sounpadahk Lapalapo, Sises, kin ketin sewese aramas akan en kilangwohng Siohwa Koht ahnsou koaros. Se koapworopworki me pwuhk wet pahn sewese iuk oh omw peneinei en doadoahngki amwail mour pwehn kaperenda Siohwa oh kumwail pahn ale kapai kan kohkohlahte.