Ihs Sises?

Siohwa ketin kadarodo Sises nin sampah. 1 Sohn 4:9

Ma kitail men kaperenda Siohwa, kitail anahne pil rong emen me kesempwal. Mahsie mwohn Siohwa eh ketin kapikada Adam, e ketin kapikada emen ngehn kehlail nanleng.

Mwuhr Siohwa ketin kadarodo ngehn menet pwehn ipwsang meipwon men me adaneki Mery nan Pedleem. Serio adaneki Sises.​—Sohn 6:38.

Ni eh ketin wia aramas pohn sampah, Sises ketin kasalehda ni unsek sapwellimen Koht irair kan. E kin ketin kadek, limpoak, oh mengei ong meteikan en koasoiong ih. Ni eimah e ketin padahkihong meteikan dahme mehlel duwen Siohwa.

Sises kin ketin wia dahme mwahu ahpw aramas kin kailongki. 1 Piter 2:21-24

Sises pil ketin kamwahwihala me soumwahu kan oh e ketin kaiasada ekei me melahr akan.

Kaunen pelien lamalam akan kin kailongki Sises pwehki eh kin ketin kasalehda arail padahk likamw akan oh arail wiewia suwed kan.

Kaunen pelien lamalam akan kahrehiong kaunen Rom akan arail kaloke Sises oh kemehla.