Lokolok Pahn Imwisekla?

DAHME PAIPEL MAHSANIH

“Koht . . . pahn kin ketin limwihasang pilen masarail koaros. Mehla solahr pahn wiawi, solahr mwahiei, solahr nsensuwed, solahr medek.”​—Kaudiahl 21:3, 4, Pwuhk Sarawi ni Mahsen en Pohnpei.

DAHME MET KAK WIAHIONG UHK

Kamehlelehla me Koht sohte kin ketin kahrehda atail kahpwal kan.​—Seims 1:13.

Kamweit me kohsang atail ese me Koht kin ketin mwahngih atail pepehm ni atail kin lokolok.​—Sekaraia 2:8.

Koapworopwor me lokolok koaros pahn imwisekla.​—Melkahka 37:9-11.

KITAIL KAK UHDAHN KAMEHLELE DAHME PAIPEL MAHSANIH?

Ei, pwehki kahrepe riau pwukat:

• Koht kin ketin kalahdeki lokolok oh koasoandi sapwung. Medewehla ia pahn sapwellimen Siohwa Koht pepehm ni ahnsou me sapwellime aramas akan kin lokolok laud mahso. Paipel mahsanih me e kupwur toutoukihla “ar lokolok laud pahn ar imwintihti kan.”​—Sounkopwung 2:18.

  Koht kin inenen kupwur suwedki irail me kin kamedekih meteikan. Karasepe, Paipel mahsanih me “peh kan me kin kemehla aramas me soh-dipe” iei mehkot me Koht inenen kalahdeki.​—Lepin Padahk 6:16-19.

• Koht kin ketin nsenohki emenemen kitail. Aramas men sohte kelehpwiki pein eh kahpwal oh medek, pwe Siohwa pil ketin mwahngih!​—2 Kronikel 6:29, 30.

  Ni ahnsou keren Siohwa pahn ketin kaimwisekala ahn emenemen lokolok ni eh pahn ketin doadoahngki sapwellime Wehi. (Madiu 6:9, 10) Ahpw ahnsouwet, e kin ketin kansenamwahwihala irail me kin sohpeiong ih ni mehlel.​—Wiewia 17:27; 2 Korint 1:3, 4.