Mehkot Rir me Kitail Perenki Ese

Mie pak me emen ndaiong uhk mehkot me e sohte koasoiaiong meteikan?—a Ma iei, met mehkot rir pwehki aramas teikan sehse duwen met. Paipel mahsanih duwen mehkot rir oh tohrohr me kohsang rehn Koht. Tohnleng kan pil men esehla duwen met. Ke men ese dahkot ire rir wet?—

Mahs mahsie, Koht kapikada tepin ohl oh lih. Adara iei Adam oh Ihp. Koht ketikihong ira wasa kaselel ehu me adaneki mwetuwel en Ihden. Ma Adam oh Ihp peikiong Koht, ira oh neira seri kan pahn kak kahrehiong sampah pwon en paradaisla duwehte mwetuwel en Ihden. Oh irail pahn kak mihmi nan Paradais kohkohlahte. Ahpw ke tamataman dahme Adam oh Ihp wia?—

Adam oh Ihp sapeikiong Koht. Ihme kahrehda kitail sohte mihmi nan paradais rahnwet. Ahpw Koht mahsanih me e pahn ketin kahrehiong sampah pwon en wiahla wasa kaselel ehu. Aramas koaros pahn momour kohkohlahte oh pereperen. Ia duwen Koht eh pahn ketin wia met? Ahnsou werei aramas akan sehse met. Met wia mehkot rir.

Ahnsou me Sises ketiket sampah, e ketin padahkihong aramas duwen ire rir wet. E mahsanih me ire wet pid Wehin Koht. Sises ketin padahkihong irail en kapakapki Wehi wet en pweida. Wehi wet pahn kahrehiong sampah wet en wiahla paradais kaselel ehu.

Ke perenki esehla duwen ire rir wet?— Tamataman me irail kante me kin peikiong Siohwa me pahn mihmi nan Paradais. Paipel padahkihong kitail duwen ohl oh lih tohto me kin peikiong Siohwa. Ke men esehla duwen irail?— Kitail pahn kilang ihs irail oh ia duwen atail kak duwehla irail.