Samuel Wiewiahte Dahme Pwung

Sangete ni ahnsou me Samuel wia kisin seri, e kin mihmi oh doadoahk ni impwal sarawio, wasa me aramas kin kohla pwehn kaudokiong Siohwa. Ke ese ia duwen Samuel eh mihla ni impwalo? Kitail pahn sukuhlki mahs duwen ahn Samuel nohno, Ana.

Ahnsou reirei, Ana sohte kak naineki seri mendahki e uhdahn men naineki seri. Eri e kapakapohng Siohwa oh peki reh en sewese ih. Ana inoukihda me ma e pahn nainekihda emen pwutaken, e pahn kadarala ih en mihmi oh doadoahk ni impwal sarawio. Siohwa ketin sapengala eh kapakapo oh e nainekihda pwukat emen. Ana kihong ede Samuel. Ana eri wia dahme e inoukihdao. Ahnsou me Samuel sounpar siluh de pahieu, Ana wahla ih ni impwal sarawio pwehn papah Koht wasao.

Ilai me wia samworo lapalap ni impwal sarawio. Nah pwutak riemen pil doadoahk wasao. Tamataman, impwal sarawio iei imwen kaudok en Koht oh aramas pahn kin wia me mwahu wasao. Ahpw nein Ilai pwutak ko kin wia soahng kan me uhdahn suwed. Samuel kin kilang dahme ira kin wiewia. Ia duwe, Samuel pil kin wia soahng suwed kan duwehte nein Ilai pwutak ko?— Soh, e wiewiahte dahme pwung, duwehte dahme eh pahpa nohno padahkihong ih en wia.

Dahme ke leme me Ilai anahne wiahiong nah pwutak riemeno?— E anahne panawih ira oh solahr mweidohng ira en doadoahk ni imwen kaudok en Koht. Ahpw Ilai sohte wia met. Eri Siohwa ketin nsensuwedla pah oh pahn nah pwutak riemeno. Siohwa ketin koasoanehdi en kadeik irail.

Ehu pwohngo, Samuel wie memeir, e ahpw rong emen likwerih nda: ‘Samuel!’ E tangala rehn Ilai, ahpw Ilai nda: ‘I sohte eker uhk.’ Met pil pwurehng wiawi pak riau. Mwurin kesilipak, Ilai padahkihong Samuel me ma e pwurehng rong met, e pahn nda: ‘Maing Siohwa, komw ketin mahsen, pwe I wie rongorong.’ Ih met me Samuel wia. Siohwa eri mahsanihong Samuel: ‘Padahkihong Ilai me I pahn kadeik eh peneinei pwehki soahng suwed kan me re wiahda.’ Ke leme me e mengei ong Samuel en padahkihong Ilai duwen met?— Soh. Samuel masak wia met, ahpw e wia dahme Siohwa ketin padahkihong ih. Dahme Siohwa mahsanih pweida. Nein Ilai pwutak riemeno kamakamala, oh Ilai pil mehla.

Samuel wia mehn kahlemeng mwahu ong kitail. E kin wia me mwahu mendahki e kin kilang me meteikan kin wia me suwed. Ia duwen kowe? Ke pahn duwehte Samuel oh wiewiahte dahme pwung? Ma ke pahn wia met, ke pahn kaperenda Siohwa oh pil ahmw pahpa nohno.