Emen Kisin Pwutak Papahong Koht

KAIDEHN kisin seri menet masamwahu? Eden seri menet Samuel. Oh ohlo me kihong peh pohn mwoangen Samuel iei samworo lapalap en Israel, Ihlai. Ohl teio iei semen Samuel me ede Elkanah oh ah nohno Annah. Ira wahdo Samuel ong Ihlai.

Samuel ansouwet mahki sounpahr pahieu te. Ahpw e kin koukousoan wasaht nan tehnpas en Siohwa iang Ihlai oh ekei samworo teikan. Dahme kahrehda Elkanah oh Annah wahdo kisin seri menet me nohn pwulopwul duwehte Samuel pwen papahong Siohwa nan ihmwen kaudoko? Kitail pahn kilang.

Sounpahr kei mwohn met Annah kin insensuwed laud. Kahrepen ah insensuwed iei pwehki e men naineki emen seri, oh met uhdahn e inengieng kowahlap. Eri rahn ehu Annah pwarado ni ihmwen kaudok en Siohwa, oh kapakap: ‘Maing Siohwa, dehr manokeiehla! Ma ke pahn ketikihong ie emen pwutak, I inoukihda me I pahn kihong uhk ih pwen papahong uhk erein ah mour.’

Siohwa sapeng ahn Annah kapakap, oh sounpwung kei mwuhri lih menet kaipwidi Samuel. Annah uhdahn poakong nah kisin pwutako, oh e tapiada padahkiong ih duen Siohwa sangete ni ah tikitik. Liho padahkiong ah pwoud: ‘Ni ansou me Samuel pahn ekiste laudla me sohlahr anahne emen en apwali ih, I pahn wahla Samuel ni ihmwen kaudok pwen papahong Siohwa wasao.’

Ihme kitail kilang Annah oh Elkanah wia nan kilel wet. Oh pwehki Samuel aleiehr padahk mwahu sang rehn ah pahpa-nohno, e inenen perenki me e pil kak papahong Siohwa wasaht nan sapwellimen Siohwa tehnpas sarawi. Pahr koaros Annah oh Elkanah kin kohdo wasaht pwen kaudok nan impwal sarawi wet, oh tuhong neira kisin pwutako. Oh ehu ehu pahr Annah kin wahdo ahn pwutako sekid kapw me e wiahda.

Kadekadeo pahr kei dower powe, Samuel kin wia papah nan sapwellimen Siohwa tehnpas sarawi, oh Siohwa oh aramas kan uhdahn limpoak ong ih. Ahpw nain samworo lapalap Ihlai nah ohl riemen Opni oh Pinias kin inenen sakanakan. Ira kin wia soahng suwed koaros, oh wiaiong mehteikan en sapeik ong Siohwa. Ihlai konehng en sikenla ira sang nan doadoahk en samworo, ahpw e sohte wia met.

Samuel sohte mweidong me suwed kan me wiawi nan tehnpas sarawio en kahreong ih uhdi sang papahong Siohwa. Ahpw pwehki aramas malaulau kei me limpoak ong Siohwa, ansou wereilahr me Siohwa mahsan ong aramas kan. Ni ansou me Samuel ekiste laudla iet me wiawiehr:

Samuel memeir nan ihmwen kaudoko ni ah rongada ngihl ehu oh pwourda. E sapeng: ‘Iet Ngehi.’ Ih eri pwourda oh tangala rehn Ihlai, oh inda: ‘Ke likweri ie, oh iet Ngehi.’

Ahpw Ihlai sapeng: ‘I sohte likweri uhk; pwurala meir.’ Samuel eri pwurala meir.

Pil mwuhri ehu likwer kohdo: ‘Samuel!’ Samuel pil pwourda oh tangala rehn Ihlai. ‘Ke likweri ie, iet Ngehi,’ e inda. Ahpw Ihlai sapeng: ‘I sohte likweri uhk, nai pwutak. Kohla wendi.’ Samuel eri pil pwurala nan ah lohs.

‘Samuel!’ ngihlo pil pwarada kasilipak. Samuel pil tangala rehn Ihlai. ‘Iet Ngehi, pwe mwein ke uhdahn likweri ie ansouwet,’ e inda. Ihlai ese met me mwein Siohwa me liklikwer. Ih eri padahkiong Samuel: ‘Kohla wendi, oh ma likwero pwurehng kohdo, ke pahn uhdahn inda: “Mahsan, Siohwa, pwe omwi ladu kin rongerong.”’

Iet me Samuel inda ni ansou me Siohwa likwer. Siohwa eri padahkiong Samuel me e pahn kaloke Ihlai oh nah pwutak ko. Mwuhri Opni oh Pinias mehla nan mahwin me mehn Pilisdihn kan wiaiong irail, oh ni en Ihlai rongada dahme wiawiehr ih eri pwupwedi, tapin were tipw oh e mehla. Sapwellimen Siohwa mahsan kan pweidahr.

Samuel eri laudla, oh wiahla kaimwisekelahn sounkopwung en Israel. Ni ansou me e mahlahr, aramas kan peki reh: ‘Pilada emen nanmwahrki pwen kaunda kiht.’ Samuel sohte men wia met, pwehki ni mehlel Siohwa iei arail nanmwahrki. Ahpw Siohwa padahkiong ih en rong aramas akan.