PALI RIAU
Pwunod—“Soangen Apwal Koaros”
“Ngehi oh ei pwoudo mweipeseng mwurin at pwopwoudkier sounpar 25. Nei seri ko kohkohsang padahk mehlel. I ahnekihda ekei kahpwal kan en roson. Ngehi eri mwoarosala oh nsensuwedla. I pehm me sohla ei koapworopwor oh I sohla kak wia mehkot pwehn powehdi mepwukat. I uhdihsang iang towehda mihting kan, oh I sohla iang mwomwohdiso papah Siohwa.”—June.
PWUNOD kin lelohng aramas koaros, pil iangahki sapwellimen Koht aramas akan. Sounmelkahkao ntingihedi: “I kin pwunodada oh pahtoula.” (Melkahka 94:19) Oh Sises mahsanih me erein imwin rahn akan, “pwunod kan en sampah wet” uhdahn pahn kak kahrehda en apwal en papah Siohwa. (Luk 21:34) Ia duwen komwi? Ke kin pehm me kahpwal kan en mwohni, kahpwal kan en peneinei, de omw pwunodki omw roson kin poweiukedi? Ia duwen Siohwa eh kak ketin seweseiuk en powehdi kahpwal pwukat?
“Manaman Lapalap”
Kitail sohte kak kelehpwki atail pwunod akan. Pohl ntingihedi: “Soangen apwal koaros kin lel kiht . . . ; se kin mihla nan peikasal ekei ahnsou . . . ; oh ekei ahnsou paliwarat lellel.” Ahpw, e pil koasoia, “se sohte kin ohkihla,” “e sohte kin kauwehla at koapworopwor,” oh “se . . . sohte ohla douluhl.” Dahme pahn kin sewese kitail en dadaurete? “Manaman lapalap,” me iei manaman me pwilisang rehn atail Koht wasa lapalahpie, Siohwa.—2 Korint 4:7-9.
Medewe ia duwen omw alehdi “manaman lapalap” mahso. Ia duwe, ke tamatamante duwen ehu padahk kangoang me kahrehiong uhk ken uhdahn kalahnganki sapwellimen Siohwa limpoak poatopoat? Omw pwoson sapwellimen Siohwa inou kan kin kehlailla ni omw kin padahkihong meteikan duwen koapworopwor en Paradais? Ni atail kin iang towehda mihting en Kristian kan oh ehukihong meteikan atail pwoson, kitail kin alehdi kehl pwehn dadaurete pahn atail pwunod kan, oh kitail kak ahneki madamadau meleilei pwe kitail en kak papah Siohwa ni peren.
“Kumwail Pein Rapahki Ia Uwen Kalahngan en KAUN-O”
Ni mehlel, ele ke pahn pehm me ke anahne idawehn soangen kaweid tohto ni ahnsou tehieu. Karasepe, Siohwa ketin mahsanihong kitail en kin rapahki mahs Wehio oh en kolokolete koasoandi mwahu ong soahng kan me pid atail kaudok. (Madiu 6:33; Luk 13:24) Ahpw, ia duwen ma uhwong, kahpwal en roson, de kahpwal en peneinei kin kahrehiong uhk ken pwangada? De ia duwen ma omw doadoahk en mwohni kihsang omw ahnsou oh kehl en iang patehng mwomwohdiso? Ni omw pwukoa kan eh nohn tohtohla, soh itar oh ahnsou tikitik oh kehl pwehn kapwaiada soahng pwukat, ele ke pahn pehm me ke sohla kakohng. Ele ke pahn medewe me Siohwa ketin kupwurki ken wia laudsang dahme ke kak wia.
Siohwa kin ketin mwahngih kitail. E sohte kin ketin kasik laudsang soahng kan me kitail kak wia. Oh e kin ketin mwahngih me kitail kin anahne ahnsou laud pwe kitail en kak mwahula sang atail luwet en paliwar oh pepehm en pwunod.—Melkahka 103:13, 14.
Karasepe, tehk mwomwen Siohwa eh ketin apwalih soukohp Elaisa. Ni ahnsou me Elaisa mwoarosala oh masepwehkada oh tang kohkohla nan sapwtehno, ia duwe, Siohwa ketin engiengda pahn soukohpo oh ketin ruwese en pwuralahng eh pwukoa? Soh. Siohwa ketin kadarala tohnleng men pak riau en pangenda Elaisa oh kihong ih kene mwenge. Mendahte met, mwurin rahn 40, Elaisa kin pwunpwunodte oh masmasepwehkte. Dahme Siohwa pil ketin wia pwehn sewese ih? Keieu, Siohwa ketin kasalehda me e pahn kak ketin pere ih. Keriau, Siohwa ketin kansenamwahwihala Elaisa ni “ngilen mwenginingin.” Mwuhr, Siohwa ketin kasalehda me mie meh kid kei me kin kaudokiong Koht ni lelepek. Mwurinte mwo, Elaisa pwurehng wia soukohp ngoang men. (1 Nanmwarki 19:1-19) Dahme kitail kak sukuhlkihsang met? Ni ahnsou me pwunod kipehdi Elaisa, Siohwa ketin apwalih ih ni kanengamah oh kadek. Siohwa sohte kin ketin wekila. E kin ketin apwalih kitail ni soangen ahlohte.
Ni ahnsou me ke medewehda soahng kan me ke kak patohwanohng Siohwa, ken mehleliong. Dehr kapahrekihong dahme ke kak wia met ong dahme ke kin wia mahso. Pwehn karasahda met: Soun weiren tang men me uhdihsang rensuh erein sounpwong kei de sounpar kei, sohte kak ni ahnsowohte pwurehng wia dahme e kin wia mahso. Ahpw, e pahn tepida wiahda eh kisin mehn akadei me pahn kakairada eh kehl oh dadaurete. Kristian kan duwehte soun weiren tang kan. Re kin kaiahnehda pein irail ni arail kin wehwehki ni sansal dahme re kin akadeiong. (1 Korint 9:24-27) Ke sou nantihong ehu mehn akadei me ke kak kapwaiada ni ahnsou wet? Karasepe, ke kak koasoanehdi omw mehn akadei en kin iang towehda mihting en mwomwohdiso. Peki rehn Siohwa en ketin seweseiuk en kak lel omw mehn akadei. Ni omw nanpwungmwahu rehn Siohwa eh pahn pwurehng kehlailda, ke pahn “pein rapahki ia uwen kalahngan en KAUN-O.” (Melkahka 34:8) Tamataman me soahng koaros me ke kin wia pwehn kasalehda omw limpoak ong Siohwa kin kesempwal ong ih, sohte lipilipil uwen tikitik en dahme ke kin wia.—Luk 21:1-4.
Siohwa sohte kin ketin kasik laudsang soahng kan me kitail kak wia
“Soangen Mehn Kangoang me I Kin Kasikasik”
Ia duwen Siohwa eh ketin kakehlakahda June en pwurodo reh? E koasoia: “I kin pwurepwurehng kapakap ong Siohwa, pekipeki en ketin sewese ie. Eri ahn nei pwutako pwoud ndaiong ie duwen mihting tohrohr ehu me pahn wiawi nan ei wasao. I koasoanehdi en iang towehda ehu rahn en mihting tohrohr ko. Ia uwen kaperen en pwurehng pwurodo rehn sapwellimen Siohwa aramas akan! Mihting tohrohro iei soangen mehn kangoang me I kin kasikasik. Met I kin pwurehng papah Siohwa ni peren. Met mie katepen ei mour. Laudsang mahs, I ese me I sohte kak katohreiiesang riei Kristian akan oh I anahne ale arail sawas. I inenen kalahnganki me miehte ei ahnsou en pwurehng pwurodo.”