Ia Duwen Atail Kaudok Eh Kak Kaperenda Koht?

Nin duwen me iren mehn kasukuhl en mwoweo kasalehda, kaidehn pelien lamalam koaros me kin kaperenda kupwuren Koht. Ahpw, kitail kak kaudokiong Sounkapikpatailo ni ahl me kin kaperenda kupwure. “Soangen kaudok [de pelien lamalam]” dah me kin kaperenda kupwure? (Seims 1:27, nting tikitik pah) Tehk dahme Paipel mahsanih.

1. Dahme atail kaudok pahn poahsoankihda?

Atail kaudok pahn poahsoankihda Paipel. Sises patohwanohng Koht: “Sapwellimomwi mahsen iei me mehlel.” (Sohn 17:17) Ekei pelien lamalam kan kin pohnsehse padahk mehlel kan me mi nan Mahsen en Koht, Paipel. Re kin wiliankihdi met padahk oh tiahk en aramas akan. Ahpw Siohwa sohte kin ketin kupwurperenki irail akan me kin “sapeikiong kehkehlik en Koht.” (Wadek Mark 7:9.) Ni pali teio, kitail kak kaperenda kupwure ni atail kaudok eh kin poahsoankihda Paipel oh ni atail kin idawehn kaweid kan loale.

2. Ia duwen atail pahn kaudokiong Siohwa?

Kitail anahne kaudokiong Siohwa kelehpw, pwehki ih me Sounkapikpatail. (Kaudiahl 4:11) Met wehwehki me kitail anahne poakohng ih oh kaudokiong ih kelehpw, ni atail sohte doadoahngki dikedik, kilel de sansal kan.​—Wadek Aiseia 42:8.

Kitail anahne kaudokiong Siohwa ni ahl me sarawi oh me e pahn ketin kupwurki. (Rom 12:1) Met wehwehki me kitail anahne mour pahrekiong sapwellime koasoandi kan me pid tiahk. Karasepe, irail akan me kin poakohng Siohwa kin kesempwalki oh idawehn sapwellime koasoandi kan me pid pwopwoud. Oh re kin soikala wiewia keper kan, me duwehte kang pwuh, simoak sika de doadoahngki wini en kasahliel de sakau en wai ni ahl sapwung.a

3. Dahme kahrehda kitail anahne iang iengatail tohnkaudok kan kaudokiong Siohwa?

Mihting kan me kitail kin wia nan ehuehu wihk kin kihong kitail ahnsou mwahu en kapinga Siohwa nan mwomwohdiso. (Melkahka 111:1, 2) Ehu ahl me kitail kin wia met iei ni atail kin koulkihong Koht koulen kaping kan. (Wadek Melkahka 104:33.) Siohwa ketin kupwurki kitail en iang towehda mihting kan pwehki e ketin poakohng kitail oh e ketin mwahngih me mihting kan pahn sewese kitail en pereperenki mour kohkohlahte. Nan mihting kan, kitail kin kangoange meteikan oh re kin kangoange kitail.

KALAUDEHLA OMW ESE MET

4. Kitail en dehr doadoahngki sansal kan nan atail kaudok

KISIN KASDO: Does God Approve the Use of Images in Worship? (3:26)

• Dahme wiawi ni ekei sapwellimen Koht aramas ako ni mwehin Paipel ar song kaudokiong ih oh doadoahngki sansal ehu?

Ekei aramas kin song karanihala Koht ni ar kin doadoahngki sansal kan nan ar kaudok. Ahpw met kak uhdahn kahrehiong ren karanihala Koht? Wadek Eksodus 20:4-6 oh Melkahka 106:35, 36, oh mwuri koasoiapene peidek pwukat:

• Soahng dah kan de sansal dah kan me ke kin kilang aramas akan kin doadoahngki nan ar kaudok?

• Ia sapwellimen Siohwa pepehm duwen doadoahngki sansal kan?

• Ia omw pepehm duwen doadoahngki sansal kan?

5. Kaudokiong Siohwa kelehpw kin kasaledengkitailla sang madamadau sapwung kan

KISIN KASDO: Liberated by Truth (5:16)

Wadek Melkahka 91:14, oh mwuri koasoiapene peidek wet:

• Dahme Siohwa ketin inoukihda en wiahiong kitail ni atail poakohng ih oh kaudokiong ih kelehpw?

6. Kitail kin kaudokiong Koht nan mihting en mwomwohdiso kan

Kitail kin kapinga Siohwa oh kangoange emenemen ni atail kin koul oh pasapeng nan mihting en mwomwohdiso kan. Wadek Melkahka 22:22, oh mwuri koasoiapene peidek pwukat:

• Ke kin perenki rong pasapeng kan nan mihting kan?

• Ke men kaunopada ken iang pasapeng?

7. Siohwa kin ketin kupwurperenki ni atail kin ehukihong meteikan dahme kitail sukuhlki

E kin mie ahnsou mwahu tohto me kitail kak ehukihong meteikan padahk mehlel kan nan Paipel. Wadek Melkahka 9:1 oh 34:1, oh mwuri koasoiapene peidek wet:

• Soahng dah kan me ke sukuhlkiher sang nan Paipel me ke men ehukihong meteikan?

DAHME KE SUKUHLKIER

Kitail kin kaperenda Sounkapikpatailo ni atail kin kaudokiong ih kelehpw, kapinga ih nan mihting en mwomwohdiso kan oh ehukihong meteikan dahme kitail sukuhlkiher.

Kousapahl

• Dahme atail kaudok pahn poahsoankihda? Dahme kahrehda?

• Dahme kahrehda kitail anahne kaudokiong Siohwa kelehpw?

• Dahme kahrehda kitail anahne iang meteikan me kin men kaperenda Koht oh kaudokiong ih?

PIL TEHK

Nan koasoi wet “I No Longer Slave for Idols,” wadek duwen koasoipen emen lih me saledeksang eh pwongih dikedik en eni.

“The Bible Changes Lives” (The Watchtower, July 1, 2011)

Sukuhlki dahme kak seweseiuk en iang pasapeng nan mihting en mwomwohdiso kan.

“Kapinga Siohwa nan Mwomwohdiso” (Kahn Iroir, January 2019)

Kilang duwen mwahnakapw men me paiekihda mihting en mwomwohdiso kan mendahki e apwalki iang towehda.

Jehovah Cared for Me (3:07)

Aramas tohto kamehlele me lohpwu wia kilelepen Kristian, ahpw e konehng kitail en doadoahngki nan atail kaudok?

“Why Don’t Jehovah’s Witnesses Use the Cross in Their Worship?” (Web article)