TEPIDA KOASOIONG EMEN
IREN MEHN KASUKUHL 4
Aktikitik
Ire Mehlel: “Ni aktikitik, kumwail wiahki meteikan lapalapasang kumwail.”—Pil. 2:3.
Dahme Pohl Wia
1. Kilang KISIN KASDO, de wadek Wiewia 26:2, 3. Mwuri koasoiapene peidek pwukat:
Ia duwen Pohl eh kasalehda aktikitik sang ni mwomwen eh koasoiong Nanmwarki Akripa?
Ia duwen Pohl eh kamwakid me rongorong ko ren medewe duwen Siohwa oh Paipel a kaidehn ih?—Kilang Wiewia 26:22.
Dahme Kitail Sukuhlkihsang Pohl?
2. Kitail kin kalaudehla en aramas akan ar kin men rong ni atail koasoi ni aktikitik oh wahu.
Kahlemengih Pohl
3. Dehr kilengdiong aramas akan. Dehr kahrehiong aramas akan ren medewe me ke leme me ke ese soahng koaros a re sehse mehkot. Koasoiong irail ni wahu.
4. Kasansalehda me dahme ke padahngki kin poahsoandahsang nan Paipel. Mahsen en Koht kin kak sair mohngiong en aramas akan. Ni atail kin doadoahngki Paipel, kitail kin sewese ren pwoson Mahsen en Koht a kaidehn dahme kitail koasoia.
5. Kolokol omw mpahi. Dehr ngihtehtehki me kowe me pwung, pwe kitail sohte kin men akamai. Kasalehda aktikitik sang ni omw kolokol omw meleilei oh ese iahd me ke pahn kohkohla. (Lep. Pad. 17:14; Taitus 3:2) Ma omw lokaia kin mpahi, mwein met kak kahrehiong aramas akan en men rong mwuhr.