Komw Pahn Kamourla Ni Ahnsou Koht Kasorehla Aramas Suwed Akan?
“Koht eri ketin kamalaulaulahr rahn ako; eri, ma e sohte ketin wia met, sohte aramas emen pahn pitla. A pwehki sapwellime me pilipil kan me e pahn ketin kamalaulaukilahr rahn ako.”—MADIU 24:22.
1, 2. (a) Dahme kahrehda e konehng kitail en men esehla dahme pahn wiaiong kitail ni ahnsou kohkohdo? (b) Arail ineng en men esehla dahme pahn wiawi ni ahnsou kohkohdo me kahrehong irail en wia peidek kesempwal dah kei?
IA WEN laud komw kin nsenokin pein kowe? Tohto aramas nan rahnpwukat kin nohn daulihlahr nsenokin pein irail. Ahpw, Paipel sohte kin sapwungki ma kitail pahn nsenohkin pein kitail ni ahl me konehng. (Episos 5:33) Met pil pahn pidada en nsenohkin dahme pahn wiawiong pein atail mour ni ahnsou kohkohdo. Eri e pahn konehng ong kitail en men ese dahme pahn wiawiong kitail ni ahnsou kohkohdo. Komw men esehla met?
2 Kitail kak kamehlele me sapwellimen Sises wahnpoaron ko men ese duwen dahme pahn wiawiong irail ni ahnsou kohkohdo. (Madiu 19:27) Ihme, met ehu kahrepe ahr wia peidek kan ahnsou ihr pahmen mih rehn Sises ni Nahna en Olip. Re wia peidek wet: “Maing, komw ketin mahsanihong kiht iahd me mepwukat pahn wiawi, oh kilel dah me pahn kasalehda me mepwukat nektehn pweida?” (Mark 13:4) Sises sohte pohnsehsehlahr ahr men ese duwen dahme pahn wiawi ni ahnsou kohkohdo—ahr men ese oh pil kitail. Pak tohto e pwurehng kasansalehda iaduwen sapwellime tohnpadahk kan pahn mwekidki dahme pahn wiawi ni ahnsou kohkohdo oh ia imwilahn mehpwukat koaros.
3. Dahme kahrehda kitail kin kadoadoahkong ahn Sises pasepeng ong atail ahnsou?
3 Pasepeng en Sises me kin pid ehu kokohp me pweida laud nan atail ahnsou. Kitail kak kilang pweidahn kokohp wet sang mahwen keieu oh kariau oh mahwen teikan nan atail century, rerer en sahpw me kamehla aramas tohto, lehk me kin kahrehong aramas en soumwahuda mehla, oh soumwahu kan—sang Spanish influenza nan pahr 1918 lel atail ahnsou soumwahu en AIDS. Ahpw, pali laud en kokohp en Sises kin pil pid mwohn oh pil ni ahnsoun kamakamalahn Serusalem sang mehn Rom kan nan pahr 70 C.E. Sises peneuwiki sapwellime tohnpadahk kan: “Kumwail mwasahn oh kaleke pein kumwail. Pwe aramas akan pahn salihkumwaildi oh pangkumwaillahng ni mwoalen kopwun kan. Kumwail ahpw pahn wowoki nan sinakoke kan; kumwail pahn wisikdohng mwohn kaun akan oh nanmwarki kan pwehki ngehi, pwe kumwail en kadehdehiong irail duwen Rongamwahu.”—Mark 13:9.
Dahme Sises Kohpada, oh Iaduwen e Pweida
4. Ia ekei peneu kan me Sises kapataiong?
4 Sises sohte ihte kohpada duwen dahme aramas teikan pahn wiaiong sapwellime tohnpadahk kan. Ahpw, e pil padahkiong irail, dahme re anahne wia. Karasepe: “Kumwail pahn kilang ‘Sansal Kansensuwed Likemisiko’ eh uhda nan wasa me e sohte konehng en uhda ie.” (Mehmen me wadewadek met en wehwehki ia wehwe!) “Eri, irail kan me mihmi Sudia re pahn tenge pohn nahna kan.” (Mark 13:14) Nan pwuhken en Luk 21:20 mahsanih: “Ni amwial pahn kilang karis ensounpei kei me kapilpenehr Serusalem.” Iaduwen kokohp wet pwepweida mahs mahsie?
5. Dahme wiawi nanpwungen mehn Suhs akan nan Sudia nan pahr 66 C.E.?
5 The International Standard Bible Encyclopedia (1982) koasoia: “Mehn Suhs ako me uhweng kaundahn mehn Rom kan oh irail ohpiser kan en koperment en Rom me kin lemei oh mwersuwed, sohte mehlel. Uhweng laud tepida nan pahr A.D. 66. . . . Mahwen tepida ni ahnsou Zealots kalowehdi Masada oh mwuri, Menahem, kohla lel Serusalem. Oh ni ahnsowohte mehn Suhs akan nan kanihmw en Caesarea me kamakamala, nuhs en wiewia lemei wet kin kohkohseli wasa koaros nan wehio. Mwohni kapw kan (coins) me wiawihda oh ntingihdi Sounpahr 1 lel Sounpar 5 ahnsou uhweng wiawi.”
6. Uhweng en mehn Suhs ako kahrehong mehn Rom kan en wia dah?
6 Pwihn en Sounpei en mehn Rom kaeisek riau pahnangin Cestius Gallus tepida sang Syria oh kalowehdi irail kan me mih nan Kalili oh Sudia, oh mwuhr irail song en kalowehdi poasen kaun oh irail pil mih ni pali powe en “Serusalem iei kanihmw sarawio.” (Nehmaia 11:1; Madiu 4:5; 5:35; 27:53) Pwuhk The Roman Siege of Jerusalem me kosapahlih wiewia kan ni ahnsowo: “Erein rahn limau, mehn Rom kan song en douda pohn kehlo, ahpw pak tohto irail song ahpw sohte pweida. Ahpw mwurin ahnsou reirei irail mehn Suhs ako me lohdi pahn ketieu kan. Sounpei en Mehn Rom kan doadoahngki soangen style me adeneki testudo—kerenpene doadoahngki neirail [shield] mehn perepe kan pohnangin moangarail kan—irail kasorehla kehlo oh tepida isikada wenihmwo. Towe kan me inenen masapwekada.” Irail kristian akan me mih nan kanihmwo me tamanda mahsen en Sises oh dehdehkihla Sansal Kansensuwed Likemisiko eh uhda nan wasa me sarawi.a Ahpw iaduwen irail kak kapwaiada dahme Sises kaweidki en tangasang kanihmwo, pwehki sounpei kan me kapilpene kanihmwo?
7. Ni ahnsou mehn Rom kereniong kalowehdi mehn Serusalem nan pahr 66 C.E., dahme mehn Rom kan wia?
7 Sounpoadoapoad Flavius Josephus ripohtki: “Cestius [Gallus], pohnsehse duwen pepehmw en irail mehn Suhs akan, ni mwadangete padahkiong nah sounpei kan en uhdi, kasehla eh koapworoapwoar en kana edetehn eh sohte lose, oh sohte kahrepe mwahu ieu irail pwureweisang kanihmwo.” (The Jewish War, II, 540 [xix, 7]) Dahme kahrehda Gallus pwureweisang kanihmwo? Kitail sehse ia kahrepe, ahpw met mweidong Kristian akan en peikiong sapwellimen Sises kaweid en tangala pohn nahna kan oh doarehla ahr mour.
8. Dahme mehn Rom kan pwurehng song en wia, oh dahme irail kan me pitsang mahweno lelong?
8 Peikiong Koht me wehwehki doarehla mourarail. Pwehki sohte nohn werei sang met, mehn Rom akan tepida kalohwei mehn Suhs akan. General Titus me kahre sounpei en mehn Rom kan en kapilpene Serusalem sang sounpwong en April lel August 70 C.E. Inenen kamwasepwek en wadek ripoht en Josephus ong ia mwomwen mehn Suhs akan ale kalokolok. Likin irail me kamakamala ahnsou re peiong mehn Rom kan, mehn Suhs teikan kamakamala pwehki pwihn en mehn Suhs teikan me kin uhweng irail kamehla irail, duhpek kin kahrehong mehn Suhs akan en kangala neirail seri kan. Ni ahnsou me mehn Rom kan kalohweidi irail, mehn Suhs me 1,100,000 mehla.b Sang rehn irail me 97,000 me pitsang, ekei rehrail me mwadangete kamakamala; mehteikan wia ladu kan. Sosephus ripohtki: “Irail me mahsang sounpar eisek isuh me selmete oh kadaralahng en doadoahk laud nan Egypt, oh Titus kadaralahng tohto nan wasahn kapokon kan oh kamakamkihla kedlas de mahn lawalo kan.” Ni ahnsou mehn Rom kan kin katohrepeseng ia wasa mehn Suhs kan pahn kohla ia, irail meh 11,000 duhpekla oh mehla.
9. Dahme kahrehda Kristian akan sohte ekspiriens dahme mehn Suhs akan lelong, ahpw peidek dahieu pwarada?
9 Kristian akan kin kalahnganki me re peikiong mahsen en Kauno oh tangweisang kanihmwo mwohn sounpei en Mehn Rom kan pwurodo. Ihme re doarehla ahr mour, oh met pid dahme Sises mahsanih ‘Pwe apwal en ni ahnsowo pahn laudsang apwal me kin wiawi sang mahs kohdo lel met; pil sohte me pahn duwe sang met kohla.’(Madiu 24:21) Sises kapataiong: “Koht eri ketin kamalaulaulahr rahn ako; eri, ma e sohte ketin wia met, sohte aramas emen pahn pitla. A pwehki sapwellime me pilipil kan me e pahn ketin kamalaulaukihlahr rahn ako.” (Madiu 24:22) Ia wehwehn iren Paipel wet ni ahnsowo, oh dahme e wehwehki nan atail ahnsou?
10. Mahs,iaduwen kitail kawehwehda pwuhken Madiu 24:22?
10 Kawehwehn iren Paipel wet, ahnsou mahs, me ‘aramas emen pahn pitla’ kin wehwehkiong irail akan mehn Suhs ako me pitsang kamakam en Serusalem nan pahr 70 C.E. Kristian ako me tangala pohn nahna kan, eri Koht mweidong mehn Rom akan en mwadangete kasorehla Serusalem. Met wehwehki, pwehki sapwellime me “pilipil kan” me sohlahr mih nan wasa keper, kak kamwotolahr rahn en kamakam, mweidong ekei mehn Suhs akan en pitla. Irail mehn Suhs akan kin mwete irail kan me kin pitsang kahn kamakam kohwalap nan atail ahnsou.—Kaudiahl 7:14.
11. Ahpw dahme kahrehda kitail anahne pwurehng kawehwehda pwuhekn Madiu 24:22?
11 Ahpw kawehweh wet kin pahrekihong dahme wiawi nan pahr 70 C.E.? Sises mahsanih me “uduk” de mour en aramas pahn “pitala” sang kamakamo. Ke pahn doadoahngki lepin lokaia “pitala” ong irail mehn Suhs meh 97,000, oh aramas kid kid kei rehrail duhpekla oh mehla, de mehla nan wasahn kapokon kan? Josephus koasoiahki duwen ehu wasahn kapokon, nan Caesarea: “Nempe en irail kan me mehkihla mahn lawalo kan de pei nanpwungarail de isikala ahnsou momour me dauli aramas 2,500.” Mehndahki irail sohte mehla ahnsou mahwen wiawi, re sohte doarehla de pitla.” Oh, Sises pahn lemehong irail nin duwen aramas me peren pitla sang “kahn kamakam kohwalap” ni ahnsou kohkohdo?
Doarehla Mour—Iaduwen?
12. Ihs me tepin Kristian “pilada kan” me Koht kin nsenohkin?
12 Sang ni pahr 70 C.E., Koht sohlahr kupwurki irail me uhdahn pwilidak en mehn Suhs akan nin duwen sapwellime aramas pilipil kan. Sises kasansalehda me Koht soikala wehio oh pahn mweidong poahson kaun, tehnpaso, oh koasondi en kaudok en imwsekila. (Madiu 23:37–24:2) Koht ketin pilada wehi kapwo, Israel en ngehn. (Wiewia 15:14; Rom 2:28, 29; Kalesia 6:16) Wehio wiakihla ohl oh lih akan me kin kohsang wehi kan koaros oh irail me keidi ngehn sarawi. (Madiu 22:14; Sohn 15:19; Wiewia 10:1, 2, 34, 35, 44, 45) Ekei sounpahr kei mwohn Cestius Gallus kalowehdi Serusalem, Piter ntingwohng “aramas pilipil kan nin duwen kupwur en Koht.” Irail me keidi ngehn sarawi kan me “wia keinek pilipil ehu, pwihn samworo en Nanmwarkio, kumwail wia wehi sarawi.” (1 Piter 1:1, 2; 2:9) Koht pahn alehda aramas pilipil pwukat en kohdala nanleng pwen iang Sises kakaun.—Kolose 1:1, 2; 3:12; Taitus 1:1; Kaudiahl 17:14.
13. Ia wehwehn mahsen en Sises nan pwuhken Madiu 24:22?
13 En esehla ihs aramas pilipil pwukat kin kihda sawas laud ong kitail, pwe, Sises kohpadahr me rahn en kahn kamakam kohwalap pahn kamalaulaulahr, “pwehki irail me pilipil kan.” Lepin lokaia Krihk “pwehki” pil kak wehwehki “kamwahupen.” (Mark 2:27; Sohn 12:30; 1 Korint 8:11; 9:10, 23; 11:9; 2 Timoty 2:10; Kaudiahl 2:3) Eri Sises kakete mahsanih mahsen wet, ‘Koht eri ketin kamalaulaulahr rahn ako; eri, ma e sohte ketin wia met, sohte aramas emen pahn pitla. A ong kamwahupen irairen sapwellime me pilipil kan me e pahn ketin kamalaulaukilahr rahn ako.’c (Madiu 24:22) Mehkot mwahu wiawi ong ‘kamwahupen’ irail Kristian pilipil kan me mih nan Serusalem?
14. Iaduwen “aramas” de “uduk” me pitsang ni ahnsou karis en mehn Rom mwadangete pwuraweisang Serusalem nan pahr 66 C.E.?
14 Tamanda nan pahr 66 C.E., mehn Rom akan kalowehdi sahpw me mih pohnangin Serusalem, oh tepida kaluwetala kehl en Serusalem. Josephus kosoia: “Ma e nantiong en kareireila ahnsoukiste eh song en kalowehdi Kahnihmwo, e pahn pweida.” Idek pein kowe, ‘Dahme kahrehda karis en mehn Rom kehlail kan pahn mwadangete pwurala, uhdi sang ahr kalowehdi Serusalem ni soh kahrepe?’ Rupert Furneaux, emen ohl me samani en kawehwehda duwen poadoapoad en sounpei, koasoia: “Sohte emen sounpoadopoad me pweida ong kawehwehda dahme kahrehda ahn Gallus mwekid kan me kapwuriamwei oh pilipil sapwung.” Ahpw sohte lipilipil ia kahrepe, rahn en kamakam me kamalaulaulahr. Mehn Rom kan pwuraweisang kanihmwo, oh mehn Suhs akan me pwakih irail. Ahpw dahme wiawihong irail Kristian me “pilipil kan”? Ahnsou irail mehn Rom kan me pwuraweisang kanihmwo, irail me doarehla sang kamakamo. Ihme, irail Kristian pwukat me paiekihda sang kamalaulaulahr rahn akan en kamakamo nan pahr 66 C.E. irail me aramas akan me kamourala nan Madiu 24:22.
Dahme Pahn Wiawi ni Ahnsou Kohkohdo?
15. Dahme kahrehda Madiu irelaud 24 kesempwal kitail en nsenohki nan atail ahnsou?
15 Emen ele pahn wia peidek wet, ‘Dahme kahrehda I anahne nsenohkin mahsen en Sises me pwurehng sansalda ong kitail ni ahnsowet ni kawehweh kapw? Pwehki, mie kahrepe tohto en kamehlele me sapwellimen Sises kokohp pahn pweida laudsang dahme wiawi nan pahr 70 C.E.d (Pil kilang Madiu 24:7; Luk 21:10, 11; Kaudiahl 6:2-8.) Erein sounpahr tohto, Sounkadehdehn Siohwa kan kalohkihseli me kokohp wet me wia pweipweida ni atail ahnsou oh met kin kadehdehda me “kahn kamakam kohwalap” kerendohr. Ni ahnsou kahn kamakam kohwalap pahn wiawi, iaduwen mahsen en Madiu 24:22 pweida?
16. Kangoang dah me pwuhken Kaudiahl ketikihda me pahn pid kamakam laudo ni ahnsou keren?
16 Mpen sounpahr rieisek samwa mwurin kamakamalahn Serusalem, wahnpoaron Sohn ntingihdi pwuhken Kaudiahl. E kasansalehda duwen kahn kamakam kohwalap me pahn wiawi ni ahnsou kohkohdo. Oh, en nsenohkin dahme pahn wiawiong pein emen emen kitail, kitail pahn nsenamwahukihla en wehwehki me pwuhken en Kaudiahl padahkiong kitail me aramas pahn pitsang kahn kamakam kohwalap me pahn wiawi ni ahnsou keren. Sohn kohpadahr duwen “pokon kalaimwun . . . re kohsang nan wehi koaros, ni kadaudok koaros, nan sahpw koaros, oh lokaia koaros.” Ihs irail? Ngihl sang nanleng mahsanih: “Ih irail me keidier nan kamakam laudo.” (Kaudiahl 7:9, 14) Ei, pahn mie aramas me pahn pitsang! Pwuhken Kaudiahl kin sewse kitail en wehwehki dahme pahn wiawi nan kamakam laudo oh iaduwen pwuhken Madiu 24:22 pahn pweida.
17. Dahme pahn keieu tepda wiawi ni ahnsou kamakam laudo pahn tepda?
17 Tepidahn Kamakam Laudo iei kalokolok pahn kohwong “Papilon Lapalap”, lihen netiki paliwere ndand meno. (Kaudiahl 14:8; 17:1, 2) E kin karasaraiong kaudok likamw pwon, iangahki Kristendom iei ih me keieu pwukoahki. Nin duwen pwuhken Kaudiahl 17:16-18, Koht pahn ketin kamwekidada mwongiong en wehi kan en uhwengada lihen netiki paliwere ndand meno.e Medemedewe iaduwen sapwellimen Koht me keidi kan “pilipil kan” oh iangarail “pokon kalaimwun” pahn kilangwong mwekidwet. Ahnsou wehi kan pahn tepida kalokolok pelien lamalam kan, e pahn mwomwen wehhi kan pahn kasorehla pelien lamalam kan koaros, iangahki sapwellimen Siohwa aramas akan.
18. Dahme karehda likamwete sohte “aramas” pahn pitsang tepin kamakam laudo?
18 Mahsen en Sises me diarekda nan pwuhken Madiu 24:22 pahn pweida. Nin duwen irail pilipil kan nan Serusalem lelong keper laud ehu, sapwellimen Siohwa ladu kan nan atail ahnsou pil mwomwen pahn kasorehla ahnsou wehi kan pahn tepida kalokolok pelien lamalam akan, mwomwen “aramas” akan me Koht sapwellimaniki pahn pil kamakamala. Ahpw, kitail pahn tehk dahme wiawi nan pahr 66 C.E. Kamakam me mehn Rom kan wia ong mehn Suhs akan me kamwotomwotolahr, oh met mweidong sapwellimen Koht keidi pilipil kan ahnsou itar en pitala oh kamourala. Eri, kitail kak liki me kamakam me pahn kohwong pelien lamalam akan, sohte pahn kasorehla mwomwohdisohn tohnkaudok mehlel akan nin sampah pwon. E pahn mwadangete, mwomwen “rahn ehute.” Ahpw, Koht pahn kamwotomwotolahr kalokoloko, pwe sapwellimen Koht aramas akan pahn “kamourala.”—Kaudiahl 18:8.
19. (a) Mwurin tepin kamakam laudo pahn wiawi, dahme pahn sansalda? (b) E pahn imwikihla dah?
19 Pwihn teikan en ahn Sehdan me Tepil pwihn nin sampah pahn mihmihte ni ahnsoukiste, mwahieiki ahr sohlahr kak wia pisnes rehn kompoakparail pelien lamalam akan. (Kaudiahl 18:9-19) Ahnsou ehu irail pahn kilang me sapwellimen Koht tohnkaudok mehlel akan kin “meleilei oh onepek mwahu, me kisin kahnihmw kan sohte kehl oh poadoarepe, oh mwomwen mengei en kalohwedi irail. Irail, wehi kan pahn inenen kapwuriamwei! Ahnsou irail pahn tepida uhweng sapwellimen Koht ladu kan, Koht pahn ketin tepida kadeik sapwellime imwintihtih kan ni kaimwesekalahn kamakam laudo.—Esekiel 38:10-12, 14, 18-23.
20. Dahme kahrehda ni kaimwsekelahn kamakam laudo sohte pahn wia mehkot keper ong sapwellime Koht aramas akan?
20 Kasoralahn imwintihti kan en Koht nan kamakam laudo pahn pahrekiong dahme wiawi nan Serusalem oh towe kan ni ahnsou mehn Rom kan pwurala Serusalem oh kalowehdi irail nan pahr 70 C.E. E pahn sansal me “kamakam laudo pahn pahn laudsang apwal me kin wiawi sang mahs kohdo lel met; pil sohte me pahn duwe sang met kohla.” (Madiu 24:21) Ahpw kitail kak liki, me, sapwellimen Koht pilipil kan oh iengarail kan sohte pahn mih nan wasa keper ehu oh kamakamala. Irail sohte pahn tangewei nan ehu wasa tohrohr. Tepin Kristian kan nan Serusalem kak tangaweisang kanihmwo oh kohla ni nahna kan Pella me mih palio pillap Sordan. Ahpw ni ahnsou kohkohdo, sapwellimen Koht Sounkadehde lelepek kan kin mihseli nan sampah pwon, eri, met wehwehki perepe ong irail sohte kin pid wasa tohrohr ehu.
21. Ihs me pahn iang peipei ni kaimwesekelahn mahweno, oh dahme pahn imwikihla?
21 Kamakam sohte pahn kohsang mehn Rom kan de aramas teikan. Ahpw, pwuhken Kaudiahl kawehwehda pwihn en wia kamakam me pahn kohsang nanleng. Ehi, kaidehn karis en aramas pahn wia kaimwsekelahn kamakam laudo, ahpw “Sapwellimen Koht Mahseno,” iei Nanmwarki Sises Krais, oh me pahn sewese ih ‘karis kan me mihmih nanleng,’ iangahki irail Kristian me keidi kan me iasadahr. “Nanmwarki en nanmwarki kan oh Kaun en kaun akan” pahn wia kamakam ehu me laud sang dahme Mehn Rom kan wia nan pahr 70 C.E. Irail pahn kasohrehla aramas koaros me kin uhweng Koht—nanmwarki kan, kaun en sounpei kan, lidu oh me maiauda kan, me lapalap oh me tikitik kan. Pil pwihn en aramas me ahn Sehdan sampah pahn kamakamala.—Kaudiahl 2:26, 27; 17:14; 19:11-21; 1 Sohn 5:19.
22. Oh pil ia wehwehn me “aramas” de “uduk” pahn kamourala?
22 Tamanda me “aramas,” luhwen me keidi kan oh “pokon kalaimwun,” pahn pitsangehr ni ahnsou Papilon Lapalapo pahn kamakamala ni unsek oh mwadang ni tepidahn kamakam laudo. Duwehte ni kaimwesekelahn kamakamo, “aramas” me kin uhki Siohwa pahn doarehla ahr mour. Weksang dahme wiaiong mehn Suhs akan me sohte kin peikiong Koht nan pahr 70 C.E.!
23. Dahme irail kan “aramas” me pahn kamourala kak kaskasikong?
23 Ni ahnsou ke pahn medemedewe duwen pein omw mour ni ahnsou kohkohdo oh pil koampoakpahmw kan, tehk dahme me inoukihdahr nan pwuhken Kaudiahl 7:16, 17: “Re solahr pahn kin men mwengehda de men nimpilda; ketipin de pil ehu soangen karakar solahr pahn kamwasikei irail; pwe Sihmpwulo, me mi nanwerengen mwoahlo, pahn wialahr sileparail, oh ih me pahn kin kahluwairaillahng ni pilen komour; oh Koht pahn ketin limwihasang pilen masarail kan.” Ni mehlel, iet “kamourala” ni ahl kaselel oh kohkohlahte.
[Nting tikitik kan me mi pah]
b Josephus koasoi: “Ni ahnsou Titus pedelong nan kanihmwo e inenen pwuriamweikihla en kilang ia uwen kehlail kanihmwo . . . E koasoi ni ngihl laud: ‘Koht me ketin sewese kitail; Koht me kalowehdi mehn Suhs akan sang ahr kanihmw kehlail; pwe aramas de dipwisou en mahwen kan sohte kak kalowedi kanihmw wet?’”
c Kapwuriamweikihla en ese me nting kan en Shem-Tob ong Madiu 24:22 kin doadoahngkihla lepin lokaia Ipru ʽa·vurʹ, me wehwehki “kamwahupen emen de mehkot.”—Kilang artikel en mwowe, pali 13.
d Kilang The Watchtower en February 15, 1994, pali 11 oh 12, oh pil chart nan pali 14 oh 15, me koasonehdi mahsen en Sises kan nan Madiu irelaud 24, Mark irelaud 13, oh Luk irelaud 21.
e Kilang pwuhken Revelation—Its Grand Climax At Hand!, pali 235-58, wiawihda nan pahr 1988 sang Watchtower Bible and Tract Society of New York, Inc.
Iaduwen Komw Pahn Sapeng?
◻ Ia ahnsoun riau me karis en mehn Rom akan kin mahwenong Serusalem?
◻ Dahme kahrehda irail meh 97,000 mehn Suhs akan me pitsang nan pahr 70 C.E. kaidehn irail me “aramas” me koasoiada nan Madiu 24:22?
◻ Iaduwen kalokolok en rahn akan en Serusalem kamwotomwotolahr, oh iaduwen “aramas” kamourala?
◻ Ni ahnsou kamakam laudo pahn wiawi, iaduwen rahn akan pahn mwotomwotolahr oh “aramas” pahn kamourala?