Sewese Meteikan En Sukuhlki Kosonned Kan En Koht
“Sohte ei pwuhng en suweiki ei kin kapahrengki rongamwahu, pwe e uhdahn koasoandiong ie I en wia doadoahk wet. Oh meid suwediong ie, ma I sohte pahn lohkiseli rongamwahu!”—1 KORINT 9:16.
1, 2. (a) Siohwa kupwurki kitail en iang kisehn doadoahk riau dahieu? (b) Dahme aramas mongiong mehlel kan anahne sukuhlki pwe ren kak wiahla tohn Wehin Koht?
SIOHWA sapwellimanki rongamwahu ong tohnsampah. E sapwellimanki Wehi ehu, oh e men aramas kan wasa koaros en rong duwen wehi wet! Ni ahnsouwohte me kitail rong duwen roangamwahu wet, Koht kupwurki kitail en ehukiong meteikan. Met kin oarepene doadoahk riau. Keiou, kitail anahne kalohngki rongamwahu en Wehin Koht. Nan ah kokohp me pid “kaimwseklahn koasoandi en mehkan,” Sises mahsani: “Oh rongamwahu en Wehin Koht pahn lohkseli wasa koaros nin sampah, pwe kadehde en mie ong aramas koaros-a mwuri, imwin sampah ahpw pahn kohdo.”—Madiu 24:3, 14.
2 Pali keriau en doadoahk wet kin pidada padahki irail ko me perenki pakair en rongamwahuwo. Mwurin ah kaiasada, Sises padahkiong pokon kalaimwun en nah tohnpadahk kan: “Kumwail eri kohwei wasa koaros oh padahkihong tohn wehi kan koaros; pwe re en wiahla nei tohnpadahk: papidaisihirailla ni mwaren Sahm, oh Sapwelime oh ngehn sarawi, oh kehkehlingkihong irail re en peikiong mehkoaros me I koasoanediong kumwail. Eri, kumwail en ese pwe I pahn ieiang kumwail ahnsou koaros lel ni imwin kawa.” (Madiu 28:19, 20) ‘Mehkan me Krais kehkehlingki’ sohte kin tepsang pein reh; e kin padahkihong meteikan ren peikiong kosonned kan en Koht, de peikiong dahme Koht kupwurki. (Sohn 14:23, 24; 15:10) Padahki meteikan en ‘peikiong mehkan me Krais kehkehlingki’ eri kin pidada sewese irail en sukuhlki kupwur en Koht kan. Irail aramas mongiong mehlel kan anahne kapwaiada dahme Koht kupwurki pwe ren kak wiahla tohn sapwelime Wehio.
3. Dahkot Wehin Koht, oh dahme e pahn wiahda me karehda rong en Wehio kin wiahki rongamwahu?
3 Dahkot Wehin Koht? Oh dahme e pahn wiahda me karehong rong en Wehio en wia rohng ehu me mwahu? Wehin Koht iei koperment en lahng ehu. E kin wia mehkot me kesemwpwal ong Siohwa, pwe ih Wehi wet me e pahn doadoahngki pwehn kasarawihla mware, oh kihsang powe karaun koaros. Wehio ih me Koht pahn doadoahngki pwehn wahdo kupwure pohn sampah duwen me wiawi nanleng. Ihme karehda Sises padahkihong kitail en kapakapki Wehin Koht en kohdo oh kangoangehkin kitail en mwohneki mahs Wehio nan atail mour. (Madiu 6:9, 10, 33) Ke kilang karepen e inenin kesemwpwalki ong Siohwa me kitail en padahkihong meteikan duwen kupwure?
Apwal ahpw Kaidehn Katoutou ehu
4. Iaduwen atail kak karasahda me atail pwukoa en kalohki rongamwahuwo kaidehn katoutou ehu?
4 E wia katoutou ehu en kalohngki rongamwahu wet? Soh! Pwehn karasahda met: Papah men ahneki pwukoa en apwalih ah peneinei ni pali war. Ma e sohte wia pwukoa wet kin duwehte ah kamahmkihla pwoson en Kristian. Wahnpoaron Pohl intingihdi: “Eri, ma emen sohte kin apwalih kiseh kan, ahpw mehlel uhdahn kisehn pein eh peneinei, e kahmahmkilahr eh pwosonm oh e suwedsang irail kan me sohte arail pwoson.” (1 Timoty 5:8) Ahpw pwukoa wet kin toutou ehu ong Kristian ohlo? Soh, ma e poakepoake ah peneinei, pwe nan irair wet e men apwalih irail.
5. Mendahki atail pwukoahki doadoahk en kalohk oh katohnpadahk , dahme karehda kitail en perenki iang wia doadoahk wet?
5 Me rasehng met, doadoahk en kalohk oh katohnpadahk kin wia pwukoa ehu, mehkot me kitail anahne kapwaiada, pwehki atail mour kin poahsonda pohn met. Pohl indahki met: “Sohte ei pwung en suweiki ei kin kapahrengki rongamwahu, pwe e uhdahn koasoandiong ie I en wia doadoahk wet. Oh meid suwediong ie, ma I sohte pahn lohkiseli rongamwahu!” (1 Korint 9:16; Kapahrekiong Esekiel 33:7-9) Ahpw ineng me kin kamwekid kitail en kalohk kin poahsonda pohn limpoak, kaidehn pwehki ihte pwukoa. Keiou kitail kin poakohng Koht, ahpw kitail kin pil poakohng mehn impetail kan, oh kitail kin ese ia uwen e kesemwpwal ong irail en rong rongamwahuwo. (Madiu 22:37-39) E kihong irail koapworopwor ong ahnsou kohkohdo. Wehin Koht pahn ahnsou keren kapwungala sapwung kan, kihsang lokolok koarso, oh kapwurehdo popohl oh minimin—e pahn wia mepwukat ong kamwahupen irail ko me kin uhpaiong ah kaunda pwungo. Kitail sohte kin perenki, ehi en ehukiong meteikan soangen rongamwahu wet?—Melkahka 110:3.
6. Dahme karehda doadoahk en kalohk oh katohnpadahk kin kapwarehda irair kan me kitail anahne powehdi?
6 Ni ahnsouwohte, doadoahk en kalohk oh katohnpadahk wet kin pil kapwarehda irair kan me kitail anahne powehdi. Aramas koaros wekpeseng. Soahng kan me re perenki de arail koahiok kan wekpeseng. Ekei sukuhl laud ah ekei soh. Wadawad—me mahs wia mehkot me aramas perenki wia—kin ahnsouwet wia mehkot me duwehte doadoahk laud ehu. Lepin lokaiahn wai wet aliteracy, me kin wehwheki “koahiok en wadawad ahpw sohte men wadawad,” kin wia kahpwal ehu me wie kekeirada, pil nan sahpw akan me pali moaron en aramas kan ese wadawad. Eri, iaduwen atail kak sewese soasoangen aramas pwukat en sukuhlki dahme Koht kupwurki ren wia?
Onopada Mwahu Pwehn Kak Sewese Meeteikan
7. Iaduwen “ladu lelepek oh loaloakong” kin kaunopada kitail en sewese meteikan en sukuhlki kupwuren Koht?
7 E pahn mengei en wiahda doadoahk apwal ehu me ke doadoahngki kepwe de dipwsoun doadoahk ehu me pwungiong doadoahko. Kepwehn doadoahk ehu me pahn pwungiong doadoahk ehu rahnwet kakete wekila de welialihda lakapw pwehn kak peipeian anahn akan me kin wekiwekila. Met kin parekiong atail pwukoa en pakairki rongen Wehin Koht. Erein sounpar kan, “ladu lelepek oh loaloakong” kin ketikiohng kitail soangen mehn doadoahk pwung kan, me duwehte pwuhk kan me wiawihda pwehn kadoadoahkohng wia onop en Paipel ong meteikan. (Madiu 24:45) Ihme karehda mie atail mehn sawas kan pwehn sewese aramas en “wehi kan oh keinek kan oh. . . lokaia koaros” en sukuhlki kupwuren Koht. (Kaudial 7:9) Erein ahnsou kan, pwuhk kapw kan kin wiawihda pwehn kak apwaliala wekwekdeklahn anahn kan nan wasahn kalohk kan. Kitail en tehkpene ekei karasaras kan.
8. (a) Iaduwen pwuhko “Let God Be True” kin iang kalaudehla kasukuhl en Paipel? (b) Pwuhk en onop Paipel dahieu me kohda nan 1968, oh iaduwen ah intingda? (c) Iaduwen pwuhko Padahk kin wia sawas ehu nan doadoahk en katohnpadahk?
8 Sang nan pahr 1946 lau lel nan pahr 1968, pwuhko me adaneki ni lokaiahn wai “Let God Be True” kin wia mehn onopki Paipel, oh kopi 19,250,000 samwa intingda ni soangen lokaia 54. Pwuhko me adaneki Padahk Mehlel Me Kahlwalahng Mour Soutuk kohpeseng nan 1968, oh erein sounpar tohto e kin wia mehn kasukuhli irail kan me perenki onop Paipel. Mwohnte met, irail ko me kin onop rehn Sounkadehde kan en Siohwa erein sounpar tohto sohte kin kalap papdaisla. Ahpw pwuhk wet kin wiawihda pwehn kamwekid aramaso me onop, oh kangoange en kapwaiada dahme e sukuhlki. Ia imwilahn met? Pwuhko me adaneki Jehovah’s Witnesses—Proclaimers of God’s Kingdom kosoia: “Erein sounpar silu en kalohk me tepiada sang Septempe 1, 1968, oh imwisekla Oahkos 31, 1971, impen aramas 434,906 papdaisla—tohtosang pak riau uwen tohtohn aramas kan me papdaisla erein sounpar silu mwowe!” Sangete ni ahnsouwo me e kohda, uwen tohtohn kohpeseng en pwuhko Padahk Mehlel, mihmi ni uwen pohnangin me—107,000,000 ni lokaia 117.
9. Ire kesemwpwal dahkei me pwarada nan pwuhko Mour Kohkohlahte, oh iaduwen ah kamwekidada sounkalohk en Wehio?
9 Nan 1982 pwuhko Ke Kak Mour Kohkohlahte Nan Paradais Nin Sampah kin uhd wia mehn kasukuhl en Paipel. Nan pwuhk wet mie kilel 150, oh pahn kilel pwukat mie lokaia kan me kin kalasehda mouren padahk en kilelo. Neitail kisin doarepwe me adaneki Atail Doadoahk En Wehio en Oktope 1982 kosoia: “Erein sounpar 20 samwa me pwuhko ‘Let God Be True’ kin wia atail mehn kasukuhli meteikan (sang 1946 lau lel nan werengen 1960 samwa) pohnangin sounkalohk kapw en Wehio me 1,000,000 papdaisla. Pil mwurin mwo sounkalohk 1,000,000 pil papdaisla ni en pwuhko Padahl Mehlel Me Kahlwalahng Mour Soutuk kin wia mehn kasukuhl mwurin ah kohda nan 1968. Ni atail kin doadoahngki neitail pwuhk kapwo, Ke Kak Mour Kohkohlahte Nan Paradais Nin Sampah, kitail pahn pil kilang soangen kekeirada ohte rehn sounkalohk kan en Wehio? Ehi, ma ih met kupwuren Siohwa!” E sansal me met iei kupwuren Siohwa, pwehki sang nan 1982 lau lel 1995, pohnangin aramas 2,700,000 papdaisla oh wiahla sounkalohk en Wehio!
10. Pwuhk kapw dahieu me kohda nan 1995, oh dahme karehda e kak karehong irail kan me sukuhlki Paipel en kak mwadang kekeirada ni pali ngehn?
10 Sises mahsani: “Mehlel pwe rahket me inenin laud, a tohndoadoahk kan me malaulau.” (Madiu 9:37) Mehlel, rahk me inenin kalaimwun. Miehte doadoahk tohto me anahne wiawihda. Nan ekei sahpw aramas tohto kin iang awiawih iad me re pahn kak iang onop en Paipel. Eri pwehn kak mwadang kasukuhlikiong irail pwukat duwen Koht, nan 1995 “ladu lelepek oh loaloakong” wiahda pwuhk kapw ehu, pwuhko me mih ni pali 192 me oarelape kosoia ni lokaiahn wai Knowledge That Leads to Everlasting Life. Pwuhk kesemwpwal wet sohte kin nohn kosoia duwen padahk likamw kan en kaudek likamw kan. E kin padahkiwei padahk mehlel en Paipel ni ahl katapan ehu. Karepen pwuhk wet ah wiawihda iei pwe irail kan me onopki en kak mwadang kekeirada ni pali ngehn. E sansal me pwuhko Knowledge kin mie lipwen ah doadoahk nan wasahn kalohk kan pwehki mieiehr kopi 45,000,000 me intingdahr ni lokaia 125 oh lokaia 21 pil wie kaukauwehwe ahnsouwet.
11 Pwuhk lipwalipw dahieu me kohda pwehn sewese irail ko me sohte sukuhl de irail ko me sehse wadawad, oh iaduwen e wia sawas laud ehu atail koasoandi en padahkih meteikan nan sampah pwon?
11 Erein ahnsou kan, ‘ladu lelepek oh loaloakong’ kin intingihda pwuhk kan me kin wiawihda ong soangen anahn ehu, de ongete soangen aramas kei. Karaspe ehu, iaduwen soangen aramas kan me pahn anahne sawas tohror kan pwehki arail tiahk de pelien lamalam weksang en meteikan? Iaduwen atail kak sewese irail en sukuhlki kupwuren Koht? Nan 1982 kitail alehdi dahme kitail anahne—brochureo me mih ni pali 32 me oarelape kosoia Paieki Mour Pohn Sampah Kohkhlahte! Pwuhk wet me audaudki kilel tohto kin wia mehn onop lipwalipw ehu pwehn kak kasukuhli irail kan me sehse wadawad. E audaudki padahk en Paipel kan me kawehwehdi ni lokaia mengei me aramas kak wehwehki. Sangete ahnsou me e kohpeseng, brochureo Mour pohn Sampah kin wiahda doadoahk lipwalipw ehu ong atail koasoandi en onopiohng aramas Paipel me kin wiawi nan sampah pwon. Pohnangin kopi 105,100,000 ingtingdiehr ni lokaia 239, me karehda e wia pwhuk ehu me Watch Tower Society keiou kawehwehda tohto lau lel rahnwet!
12, 13. (a) Sangete nan 1990, dahme ‘ladu lelepek’ wiahda pwehn kak lelohng aramas tohto? (b) Iaduwen atail pahn doadoahngki nein Society video nan atail doadaohk en kalohk? (c) Pwuhk kapw dahieu me ahpwten kohda pwehn sewese atail doadoahk en katohnpadahk?
12 Me patohngete pwuhk pwukat me re intingihda, tepida sang nan 1990 ‘ladu lelepek’ wiahda ong kitail mehn kasukuhl kapw ehu me pahn kak lelohng aramas tohto—met iei video cassette. Nan Oakos en sounpwongo, video me reireiki minit 55 me oarelape kosoia ni lokaiahn wai Jehovah’s Witnesses—The Organization Behind the Name kohpesengehr—tepin video me Watch Tower Society wiahda. Audepen video kalele wet, me mih ni lokaia 35, kin kasalehda sapwelimen Siohwa pwihnen aramas lelepek kan sampah pwon ar kin kapwaiada kehkehlik en Sises en kalohki rongamwahuwo nan sampah pwon. Video wet kin keiou wiawihda pwehn sewese atail doadoahk en katohnpadahk. Sounkalohk kan en Wehio kin mwadang doadoahngki video wet nan doadoahk en kalohk. Ekei kin weuwa video wet nan arail ehd en kalohk kan, pwehn kasalehong aramas kan me perenki de kihong irail en pein kilang video wet. Mwurinte ah kohpeseng, emen soundoulik intingihdi: “Video kan kin wiahlahr mehn kasukuhl nan senturi 21 me pahn lel madamadau oh mongiong en aramas rar kan, eri ihme se koapworopworki me video wet kaidehn ihte video me Society pahn doadoahngki pwehn kekeirada doadoahk en Wehio.” Mehlel, video tohto pil wiawihda iangahki video me mihmi ni pali silu me adaneki The Bible—A Book of Fact and Prophecy oh Jehovah’s Witnesses Stand Firm Against Nazi Assault. Ma nein Society video pwukat mih ni pein amw lokaia, komw kin doadoahngki nan amw wasahn kalohk?a
13 Nan ahnsou keren kan brochure kapwo, Dahme Koht kupwurki Kitail en Wia?, wiawihda pwehn sewese atail doaodoahk en katohnpadahk. Dahme karehda e intingkihda? Iaduwen ah pahn kadoadoahk?
Kawsawih Pwuhk Kapwo
14, 15. Ong ihs me brochureo Kupwurki kin wiawiahda ong, oh dahme e audadauki?
14 Brochure kapwo me oarelape kosoia Dahme Koht Kupwurki Kitail en Wia? kin intingdahng aramas kan me kamehlele Koht oh wauneki Paipel. Sounapwalih en doulik kan iangahki misineri kan sang Kilied me ahneki eksperiens tohto sang nan sahpw semwehweh kan kin iang sewese wiahda brochure wet. Pwuhk wet kin audaudki padahk mengei kan koaros nan Paipel. Lokaia kan loale me mengei oh inen. Ni ahnsouohte padahk kan kaidehn padahk en seri. E sohte ihte padahkiwei tepin padahk mengei kan me rasehng “pilen dihdi” ahpw e kin pil padahngki padahk me rasehng “mwenge kekelewak” de padahk loal kan sang Mahsan en Koht ni ahl ehu me aramas tohto kak wehwehki.—Ipru 5:12-14.
15 Nan ahnsou keren kan sounkalohk en Wehio nan sahpw tohto kin pekih ren naineki soangen pwuhk wet. Karaspe ehu, rahn ohpis en Watch Tower Society nan Papua New Guinea intingihdi: “Aramas kan kin pwonopwonki padahk kan me kin wekpeseng. Re anahne padahk kan me mehlel oh inen, me poahsonda pohn iren Paipel tohto me re kak kilangada nan pein neirail Paipel. Re anahne padahk kan me sansal oh oaretik me pid dahme Koht kupwurki Kristian mehlel en wia oh duwen tiahk oh wiewia kan me Koht kin sapwungki.” Dahme kitail anahne pwehn sewesehki soangen aramas pwukat en sukuhlki kupwuren Koht kan iei brochureo Kupwurki.
16. (a) Ihs me pahn keiou paikihda kawehweh mengei nan brochureo kapwo? (b) Iaduwen irail ko me kitail kin kalohk ong pahn paikihda brochureo Kupwurki?
16 Iaduwen amw pahn doadoahngki pwuhk kapw wet? Keiou, e kak kadoadoahk pwehn kasukuhlih aramas kan me sehse wadawad de aramas kan me sohte perenki wadawad. Soangen aramas pwukat pahn paikihda kawehwe mengei nan kisin pwuhk wet. Mwurin kousapahl en ehu kopi en pwuhk wet, rahn ohpis kan en Watch Tower intingihdi: “Brochure wet uhdahn pahn wia sawas laud ehu nan sahpw kan me towe kan sohte kalap wadawad.” (Brazil) “Mie irail kan me keseusang nan sapwarail kohdo wasaht me sohte kak wadek pein arail lokaia oh pil apwalki wadek lokaiahn French. Brochure wet pahn wia mehn sawas en kasukuhli soangen aramas pwukat.” (France) Komw kak tamanda aramas kan nan amw wasahn kalohk me pahn kak paikihda brochureo Kupwurki?
17. Ni ahl dahkei brochure kapwo pahn wia sawas laud nan sahpw tohto, oh pwehkida?
17 Keriou, nan sahpw tohto brochureo kin wia sawas laud en tepiada onop en Paipel kan rehn aramas kan me kin lahn koht mendahki ia uwen arail sukuhl laud. Ni mehlel, kitail en nantiong tepiada onop kapw kan nan pwuhko me mih ni lokaiahn wai Knowledge That Leads to Everlasting Life. Ahpw ekei pak e pahn mengei en tepiada ehu onop nan brochureo. Eri ni ahnsou me konehng, onopo kak uhd doulahng nan pwuhko me adaneki Knowledge, neitail mehn sawas en onop me kitail pahn keiou doadoahngki. Me pid kadoadoahkpen brochure wet me adaneki Kupwurki, rahn ohpis kan en Watch Tower kan intingihdi: “Tepiada onop en Paipel kan me apwal, ahpw ni ahnsou kan me sounkalohk kan kin doadoahngki brochureo, e mwomwen me onop kan kak tepiada.” (Germany) “Soangen brochureo kin lipwalipw en tepiada onop en Paipel kapw kan, me kak mwuhr uhd kosoulahng nan pwuhko me adaneki Knowledge.” (Itali) “Mendahki mehn Sapahn kan me loaloakongki arail sukuhl laud, me tohto sohte nohn wehwehki Paipel oh padahk mengei kan. Brochureo kin wia mehn tepiada onop nan pwuhko Knowledge.”—Sapahn.
18. Dahme kitail en tamataman duwen peikiong kosonned kan en Koht?
18 Rahn ohpis kan en Society nan sampah pwon kin pekih ren naineki brochure wet, oh mweimwei kohdaier en kawehwehdiong brochure wet ong ni lokaia 221. Brochure kapw wet en wia mehkot me kesemwpwal ong kitail en sewesehki meteikan sukuhlki dahme Siohwa Koht kupwurki ren wia. Ahpw ong kitail, kitail en tamataman me mour parekiong kupwuren Koht kan, iangahki kehkehlik en kalohk oh katohnpadahk, kin kihong kitail ahnsou mwahu en kasalehong Siohwa ia uwen atail poakohng ih. Ehi, dahme Koht kupwurki kitail en wia sohte kin wia katoutou ehu. Met iei ahl me keiou mwahu en mour!—Melkahka 19:7-11.
[Nting tikitik me mi pah]
a Pwuhko me adaneki Jehovah’s Witnesses—Proclaimers of God’s Kingdom kosoia: “Video cassette pwukat sohte pahn wiliandi pwuhk en sawas kan en Paipel de atail kalohk. Pwuhk kan en Society kin kaukaule kaitarala anahn ehu me pid kaparaseli rongamwahuwo. Doadoahk en kalohk sang ihmw lel ihmw wiahte ehu kisehn arail doadoahk en kalohk. Ahpw, video cssette pwukat kin ahnsouwet wia kalaudpen doadoahk mepwukat nin duwen wiepen kalohk kesemwpwal kei mehn kekeirada pwoson sapwelimen Siohwa inou kaselel kan oh en kamwekid aramas en kalahnganki dahme e ketin wiahda pahn sampah nan atail ahnsou.”
Komw Kak Kawehwe?
◻ Siohwa kupwurki sapwelime ladu kan en iang kisehn doadoahk riau dahieu?
◻ Dahme karehda atail pwukoa en kalohk oh katohnpadahk sohte kin wia katoutou ehu ong kitail?
◻ “Ladu lelepek oh loaloakong” wiahda mehn doadoahk dahieu me kitail en doadoahngki nan atail doadoahk en kalohk oh katohnpadahk?
◻ Ihs me bruchureo Kupwurki kin wiawihdahng, oh iaduwen atail en doadoahngki nan atail doadoahk en kalohk?